“В” продакшны отгон дуучин Б. Эмүүжиний  “Cool and Bad” дуу сарын хугацаанд 100 мянга гаруй хандалт авсан юм. Тэрбээр зургадугаар сард тус продакшнд харьяалагдаж, одоо хоёр дахь уран бүтээл дээрээ ажиллаж байна. Эрч хүч, урам зориг, хүсэл мөрөөдөл дүүрэн 16 настай,дуучин Б.Эмүүжинтэй цөөн хором ярилцлаа. 

-Манай уншигчдад анхны уран бүтээлийнхээ талаар сонирхуулахгүй юу?

-Би жилийн өмнө дуу бүтээж, түүнийхээ үр дүнд “В” продакшнд саяхан харьяалагдсан. Дууныхаа үгийг өөрөө бичсэн. Аяыг нь А.Энхзориг, продюсер, найруулагч Д.Булгуун, миксер мастер дээр .Цогтоо, хоолойн көүчөөр н.Шинээ, ерөнхий продюсерээр Д. Болд ах ажилласан. “Ирээдүй басс” жанрын дуу. Монголд иймэрхүү төрлийн дуу ховор байдаг. 

-“B” продакшнд орсноос хойш хоёр дахь уран бүтээлээ эхлүүлж байгаа гэж сонссон. Ямар төрлийн дуу гаргахаар төлөвлөж байна вэ?

-Одоо ажиллаж байгаа дуу хуучны төрөл жанртай, 2000-аад оны стильтэй, хайрын тухай дуу. Удахгүй сонсогчдын хүртээл болгоно.Та бүхэн сонсоорой.

 -Залуу уран бүтээлчийн хувьд бусад хамтлаг, дуучнаас юугаар ялгарахыг хичээж байна вэ. Мөн бусдаас хамгийн түрүүнд юу сурч авахыг эрмэлздэг вэ?

-Шинэлэг, содон байхыг эрмэлздэг учраас ганц төрөлд баригдахгүй олон төрлийн дуу хийх хүсэлтэй. Миний хийсэн уран бүтээл намайг хэн гэдгийг тодорхойлох байх. Зөвхөн дуулахаас гадна бусад чадвараа нээж,  түүгээрээ ялгарна гэж боддог. Тэгээд сурсан зүйлээ бусдад түгээхийг зорьж байна.

-Дуу хөгжмөөр дамжуулан хүнд ямар мэдрэмж өгөхийг хүсдэг вэ. Дуулахаас гадна ямар сонирхолтой вэ?

-Миний дууг сонсож буй хүнд дуу зохиох хүсэл төрүүлэх хэмжээний мэдрэмж өгөх юм сан гэж боддог. Би үүнийг дуунд дурлах, хайрлах хамгийн дээд хэлбэр гэж үздэг. Надад  сонирхдоггүй зүйл байдаггүй. Загвар, кино урлаг гэх мэт дургүй салбар тун ховор доо.

-Өөрийгөө сорьж, уралдаан тэмцээнд оролцож байв уу?

-Урлагийн тэмцээнээс гадна олон төрлийн тэмцээнд оролцож бүх талаараа өөрийгөө сорихыг хичээдэг. 

-Чиний амьдралд дуу хөгжим хамгийн үнэтэй, том орон зай эзэлдэг байх. Энэ талаар яриач?

-Би дөрвөн настайгаасаа дуулж эхэлсэн. Хэлд орохтойгоо зэрэгцээд дуулсан учир дуу миний биеийн нэг хэсэг болсон гэж хэлж болно. Дууг зөвхөн дуулдаггүй. Түүн дотор амьдардаг, түүнийг мэдэрдэг. Энэ бүхэн надад гэрэл, гэгээтэй ирээдүйг бэлэглэнэ гэдэгт найдаж байна.

-Урлагийн салбарт хөл тавьсан хэн бүхэнд энэ олон бэрхшээл тулгардаг байх. Чамд ямар нэгэн бэрхшээл тулгарч байв уу?

-Би сургуулийнхаа найрал дуунд долоон жил тасралтгүй явж байна. Өнгөрсөн хугацаанд маш олон зүйл сурч, мэдэж, алдаа оноог ялгаж, хатуужиж бэрхшээлийг даван туулах чадварт суралцсан. Мэдээж, олон бэрхшээл тулгардаг. Түүнийг даван туулах чадвар хамгийн чухал санагддаг. 

-Уран бүтээл болон амьдрал дээр хэнээс зөвлөгөө авдаг вэ?

-Ойр дотны хүмүүсээс зөвлөгөө авч, тэдний шүүмжийг сонсохыг  хүсдэг. Миний хайртай хүмүүс ч надад харамгүй урамын үг болоод зөвлөгөө өгдөг. Амьдрал дээр аав минь илүү анхаарч, дэмжиж, зөвлөдөг. Уран бүтээлд продюсертэйгээ ойлголцдог.

-Дуу хөгжим чиний амьдралын харах өнцгийг өөрчилж чаддаг уу?

-Хэрвээ урлаг миний амьдралд байгаагүй бол би хэн ч биш. Өнөөдрийн Б.Эмүүжин өөр хүн болж хүмүүжих байсан.