“Ширхэг ширхгээр будран хаялах цасан ширхэгүүд

Сэвшин үлээх өвлийн салхи нь намуухан дулаахан

Сэтгэл хүртэл нэг л хачин тайван жаргалтай

Шинэ жилийн цагаан шөнө дулаахан амгалан” хэмээх “Цагаан шөнө” дууг монголчууд төрсөн цагаас нь буюу жил бүрийн шинэ жилээр сонсдог, дагаж дуулсаар байна. Бид энэ удаагийн “Дуу төрсөн түүх” буландаа “Цагаан шөнө” дуу хэрхэн бүтсэн болохыг онцолж байна. Тус дууны тухай МУГЖ дуучин Б.Сарантуяа “2004 оны есдүгээр сард “Чингис хаан” хамтлагийн ахлагч Л.Жаргалсайхан ахтай АНУ-д хандивын тоглолтод оролцохоор явсан юм. Тэр үеэр УГЗ, хөгжмийн зохиолч Л.Балхжавын “Миний дуунууд” тоглолт болдог байсан юм л даа. Харин биднийг хандивын тоглолтоор явдаг жил Балхаа концертоо “Цагаан шөнө” гээд нэрлэчихсэн байсан. Тэгээд намайг “Цагаан шөнө” гэдэг дуу дуулна шүү” гэхээр нь “Би сураагүй шүү дээ. Яаж дуулах юм бэ” гэтэл “Зүгээр ээ, амархан дуу учир чи дор нь сурчихна” гэсэн. Тэгээд биднийг  Улаанбаатар хотод иртэл хөгжмийн зохиолч, УГЗ Г.Пүрэвдорж ах найруулга дээр нь ажиллаж байсан. “Цагаан шөнө” дууг дуулаад л шууд дурласан. Миний урын санд шивнэж юм уу, хагас хоолойгоор дуулсан дуу байдаг. Тухайлбал, “Хайрын бурхан”,  “Би жаргалтай” гэх мэтчилэн дууг нэрлэж болно. “Ширхэг ширхгээр будран хаялах цасан ширхгүүд” гээд аялсан хэсэг нь сонсогчдын сэтгэлд их нийцдэг болов уу гэж бодсон. Би “Цагаан шөнө” дууг дуулсны дараа клипыг нь хийлгэмээр санагдаж байсан. Яруу найрагч Р.Эмүжингийн шүлэг, Л.Балхжавын хөгжим “Мөрөөдлийн арал” дууныхаа клипыг Куб Улсад хийчихээд тус дууны клипыг хийж байсан. Тус дууны клипыг олон хэсэг олон газар хувааж авсан. Шарга морьтод аавынхаа зуслангийн гадаа, нэг хэсэг нь манай гэрт рок, попынхон зочилж байгаагаар мөнх "Баянгол" зочид буудлын гадаа лемузингээс бууж байгаа дүрсийг нь авч байсан. “Цагаан шөнө” дуу сайхан аялгуунаас гадна  клиптэйгээ их холбоотой дуу. Өөрөөр хэлбэл, тус дууны утга учир нь, клип нь болсон гэж боддог. Би зүгээр ч нэг дуулаагүй. “Сайн дуулчих юм сан, сайн клип хийчих юм сан” гэж их хичээсэн. Тэр хэрээрээ үзэгч түмэнд хүрсэн гэж боддог. "Цагаан шөнө" дууныхаа клипыг одоо ч үзсэн сэтгэлд дотно сайхан байдаг. Тэр үед би 34-хөн настай байсан. Мөн монголчуудад шинэ жилийн уур амьсгал төрүүлж чаддаг дуу болсноороо онцлог. Тиймээс жил бүр дуртай дуулдаг. "Цагаан шөнө" дууг бүтээхэд олон хүн зүтгэсэн" гэв.

ЦАГААН ШӨНӨ

Ширхэг ширхгээр будран хаялах цасан ширхэгүүд

Сэвшин үлээх өвлийн салхи нь намуухан дулаахан

Сэтгэл хүртэл нэг л хачин тайван жаргалтай

Шинэ жилийн цагаан шөнө дулаахан амгалан

Сэтгэл хүртэл нэг л хачин тайван жаргалтай

Шинэ жилийн цагаан шөнө дулаахан амгалан

Өнгө өнгөөр анивчих хотын гудамжаар

Өвлийн улирал гэрэл нэмэн саруулхан гэгээтэй

Уйтгар үргээх хосын инээд дүүрэн баясалтай

Учралын цагаан шөнө дөлгөөхөн намуухан

Уйтгар үргээх хосын инээд дүүрэн баясалтай

Учралын цагаан шөнө дөлгөөхөн намуухан

Ширхэг ширхгээр будран хаялах цасан ширхэгүүд

Сэвшин үлээх өвлийн салхи нь намуухан дулаахан

Цав цагаахан цасан ширхэгүүд нь дээрээс зөөлхнөөр

Цантах цонхыг шүргэнхэн аажмаар бударна

Алаг үрс нь ногоохон гацуурхнаа чимээд

Аз жаргалын цагаан шөнө ариухан жаргалтай

Алаг үрс нь ногоохон гацуурхнаа чимээд

Аз жаргалын цагаан шөнө ариухан жаргалтай

Дун цагаанаараа гялтганах шинэ жилийн шөнө

Дурласан сэтгэл догдлуулаад нэгийг бодуулна

Дуу хуурын аялгуу хаа ч юм сонсогдоод

Шинэ жилийн цагаан шөнө дулаахан жаргалтай

Дуу хуурын аялгуу хаа ч юм сонсогдоод

Шинэ жилийн цагаан шөнө дулаахан жаргалтай