Дуучин Magnolian буюу Б.Дөлгөөний “The Bride & the Bachelor” дууг “Netflix” компани 3000 ам.доллароор худалдан авч “Outer Banks” цувралын хоёрдугаар бүлгийн тавдугаар анги дээрээ ашигласан билээ. Түүний дууг цуврал дээр 30 секунд эгшиглүүлсэн байна. Тэгвэл энэ талаар дуучин Б.Дөлгөөнтэй холбогдож сэтгэгдлийг нь хуваалцсан юм.

      Тэрбээр “2021 онд "Outer Banks" цуврал хоёрдугаар бүлгийнхээ тавдугаар ангид миний "The Bride and the Bachelor" дууг ашиглах хүсэлтэй байгаа талаараа мэйл ирүүлсэн. Ийм сайхан саналд үнэхээр татгалзах шалтгаан байгаагүй ээ. “Netflix” компанийн цуврал дээр өөрийнхөө дууг сонсоход үнэхээр бахархмаар сайхан санагдсан. Кино, шоу уран бүтээлд  өөр хүний уран бүтээл ашиглах гэж байгаа бол оюуны өмчийг нь шалгаж эзэмшигчээс нь худалдаж авах ёстой шүү дээ. Яг журмын дагуу л ажилласан. “Outer Banks” цувралаар дамжуулж миний дууг маань олж сонсоно гэдэг сайхан санагдаж байсан” гэсэн юм.

      Б.Дөлгөөн 12 настайгаасаа гитар тоглож, өсвөр наснаасаа дуу зохиож эхэлжээ. Тэрбээр 2015 онд "Playtime" хөгжмийн фестивалиар анх удаа соло уран бүтээлээ толилуулж, Монголын хөгжмийн салбарт шинэ өнгө төрх болон гарч ирж байжээ.Түүнийг "Од ба гэгээ" киноны гол дүрд тоглосныг манай уншигчид санаж байгаа байх.

         Түүний дуу эгшиглэсэн “Outer Banks” цуврал нь 2020 оны дөрөвдүгээр сарын 15-нд "Netflix" дээр нээлтээ хийсэн Жош Пэйт, Йонас Пэйт, Шэннон Бёрк нарын бүтээсэн Америкийн адал явдалт өсвөр насны өсвөр үеийнхний адал явдалт, нууцлаг драм телевизийн цуврал юм. Тус цуврал Хойд Каролинагийн Оутер Бэнксд өрнөх ба алдагдсан эрдэнэсээ хайж буй өсвөр насны хоёр бүлгийн мөргөлдөөний талаар өгүүлдэг билээ.