“America’s Got Talent: Fantasy League” буюу дэлхийн өнцөг булан бүрийн шилдгүүдийг хамруулсан шоуны эхний дугаарууд өнгөрсөн өдөр цацагдсан. Тус шоуны эхний дугаарт оролцож, "Монгол ковбой" хэмээн алдаршиж буй “Авьяаслаг монголчууд-2016” шоуны ялагч, дуучин О.Энх-Эрдэнийг уншигч танд танилцуулъя

-О.ЭНХ-ЭРДЭНЭ ГЭЖ ХЭН БЭ-

Авьяаслаг дуучин О.Энх-Эрдэнэ 2016 онд “Авьяаслаг монголчууд” шоуны хоёр дахь дугаарт оролцож, ялагч болсноороо үзэгч, сонсогчдынхоо эчнээ танил болсон. “Нуугдсан эрдэнэ” хэмээн үзэгчдийн хайр, хүндэтгэлийг хүлээсэн О.Энх-Эрдэнэ “Авьяаслаг монголчууд” шоуны эхний шатанд “Amarillo by Morning”, хагас шигшээд “Feeling Good” зэрэг дууг өвөрмөц, хүчтэй хоолойгоороо “амилуулан” тэргүүлсэн байдаг.

                      Харин “Авьяаслаг монголчууд” шоуны дараа буюу 2019 онд О.Энх-Эрдэнэ АНУ-д болсон “The Worlds’s Best” шоунд оролцож, “Amarillo by Morning” дууг дахин дуулж, дэлхийн олон орноос ирсэн шүүгчдийг гайхшруулаад байв. Энэ удаад тэрбээр “America’s Got Talent: Fantasy League”-ийн эхний шатанд Гарт Бруксийн “Friends in Low Places” дууг дуулсан. О.Энх-Эрдэнэ дуулж дууссаны дараа тус шоуны үзэгчдэд “хамгийн хатуу шүүгч” гэдгээрээ алдаршсан Саймон Коуэлл хамгийн эхэнд босож, “Чи сая ам барьсан уу. Үнэхээр гайхалтай, гайхалтай сайхан хоолой байна. Надад үнэхээр таалагдлаа. Би чамайг багтаа авахыг хүсэж байна” хэмээжээ. Түүнчлэн шоуны бүх шүүгч О.Энх-Эрдэнэд санал өгч, багтаа авах хүсэлтэйгээ илэрхийлжээ. Монголынхоо нэрийг дэлхийн хамгийн алдартай шоунд гаргаж, “Монгол ковбой” хэмээн алдаршиж байгаа дуучин О.Энх-Эрдэнэ шүүгч Хайдигийн багт нэгдсэн бөгөөд тус хагас финалын шат ирэх сард болох гэнэ.

Ташрамд дурдахад, “Монгол ковбой” О.Энх-Эрдэнэ анхны уран бүтээлийн цомгоо өнгөрсөн 2023 онд “Амьдрал баян” нэртэйгээр гаргасан бөгөөд “Арван тавны сар”, “Epilogy”, “Зүрхний хайр” зэрэг есөн дуунаас бүтсэн байдаг.