Уран бүтээлчийн амьдрал бол өвдөлт. Гэхдээ өвдөлтийн цаана ч, уучлалт, тайвшрал бий.

Зургаан жилийн турш урлагийн амьдралаа холдсон Английн нэрт дуучин бүсгүй “Easy On Me” буюу “Надад зөөлөн хандаарай” дуугаараа хүчтэй эргэн ирэлт зарлах нь тэр. Өдгөө 33 настай ч

“Надад зөөлөн хандаарай

Би одоо ч хүүхдээрээ байна” хэмээн дуулах Аделийн шинэ дуу цацагдсан өдрөө л энэ намрын дэлхийн шилдэг хит дуунуудын нэгт зүй ёсоор тооцогдов. Намрын улирал хүний сэтгэлийн өвтгөж бас эдгээдэг бол, Аделийн хоолой энэ намрыг уучилжээ.

“ТОЙРОН ХҮРЭЭЛЖ БУЙ ЕРТӨНЦӨӨ МЭДЭРЧ, ЮУ ХИЙХЭЭ СОНГОХ ЦАГ БАЙСАНГҮЙ”

          Адель Эдкинс 1988 оны тавдугаар сарын 5-нд Лондон хотын Тоттенхэм дүүрэгт төрсөн. Уг нь Аделийн жинхэнэ Адель Эванс байх байлаа. Гэвч түүний эцэг Марк Эванс нь Аделийг гурван настай байхад нь 20 настай ээжтэй орхиод явсан байдаг.

          Түүнээс хойш Адель ээж Пэнни Эдкинсийн хамтаар Лондон, Брикстон, Баруун Норвүүд, Кройдоноор аялж, 16 настайдаа анхны дуугаа бүтээхээс өмнө Английн ихэнх хот, дүүргээр амьдарч үзсэн байв. Бага ахуй насных нь олон нүүдэл, суудал Аделийг дуу хөгжмөөс илүүтэй уран зохиол руу хөтөлсөн талаар нэрт дуучин дурсан ярьсан байдаг.

Лондонгийн дүүрэг бүр уйтай. Уйтай дүүргүүдийн цонх болгон нь уйлдаг.

Адель Эдкинс багадаа ном их уншдаг байсан гэх. Зургаан настайгаа л Роалд Далийн “Матилда” зохиолыг уншиж өссөн түүнийг дуу хөгжимд хожим сонирхолтой болсон гэдэг.

          Адель Эдкинс 16 настайдаа буюу 2004 онд өөрийн анхны дуу болох “Hometown Glory” дуугаа бүтээжээ. Түүнээс хойш цаг гарахаараа л гадуурх дуу бичлэгийн студиудээр явж, аль хямдханыг олж, хоолойгоо бичүүлж, дүрс бичлэг хийлгэж байсан Адель 2006 онд Кройдон дахь “BRIT” сургуулийг төгсөхдөө цөөнгүй дуутай болсон аж. Гэсэн ч дуунуудаа олон нийтэд хүргэж чадаагүй явсан түүний нэг ангийнх нь найз “My Space” цахим сувагт Аделийн дуунуудыг байршуулснаар Кройдон, Лондон, Англи, тэгээд дэлхийд танигдаж эхэлсэн юм. Энэдээс л Адель дэлхийн шилдгүүдийн нэг болох уран бүтээлчийн гараагаа эхэлсэн.

-ДЭЛХИЙН ДУУ ХӨГЖМИЙН ОЛОН ШАГНАЛ ХҮРТЭЖ, ГИННЕСТ БИЧИГДСЭН УРАН БҮТЭЭЛЧ-

          “My Space” цахим сувагт байршуулсан Аделийн дуунууд лондончуудад хүрч, олон сая хандалт авсан байдаг. Түүнээс хойш долоо хоног ч өнгөрөлгүй өнгөрөөгүй байтал ''XL Recordings'' дуу бичлэгийн студийн захирал Ричард Рассел Адель руу залгаж, гэрээ байгуулах санал тавьжээ. Дэлхийд “гялалзах” боломжоо хүлээж байсан Адель ч гэрээ байгуулахыг зөвшөөрч, анхны цомгоо “19” нэртэйгээр гаргасан. 19 настай охины “19” цомогт багтсан "Chasing Pavements" дуу Их Британийн хөгжмийн чартуудыг дөрвөн долоо хоног тэргүүлж, нэг жилийн дотор 2.2 сая хувь борлуулагдсан юм.

Адель 2011 онд хоёр дахь “21” цомгоо гаргасан нь түүнийг дэлхийн хэмжээний уран бүтээлч гэдгийг нь нотолсон гэж болно. Тэрбээр “21” цомогтоо сонгодог, орчин үеийн, каунтри, сөүл зэрэг хөгжмийн урсгалуудыг тусгасан нь “шилдэг сонголт” болсон талаар урлаг судлаачид тайлбарласан байдаг. Биллбоардын жагсаалтаас түүнийг 2011, 2012 онд дараалан оны шилдэг уран бүтээлчээр шалгаруулсан нь Гиннесийн номонд бичигдэж, цомог нь ч дэлхий даяар эхний долоо хоногтоо 3.4 сая хувь борлуулагдсан. “21” цомгийн ''Rolling In The Deep'', ''Someone Like You'' дуу дэлхийн хөгжмийн чартуудыг долоо хоног тэргүүлж, алдарт “Жеймс Бонд 007” киноны дууг дуулж, “Оскар”, “Алтан бөмбөрцөг”-ийн наадмаас ч шилдэг дууны шагнал хүрэв. Гэсэн ч Аделийн “дэлхийн” гэх тодотголтой болох уран бүтээлийн замнал оргил цэгтээ хүрээгүй хэвээр байсан аж.

          Бие даасан хоёр дахь “21” цомгоо гаргасан Адель хэсэг хугацаанд чимээгүй байсныхаа дараагаар сонсогчиддоо “25” цомогтой, ''Hello'' дуутай эргэн ирсэн. ''Hello'' дуугаа интернэтэд байршуулснаас хойш 24 цагийн дотор 1.2 тэрбум хандалт авч, Тэйлор Свифтийн дээд амжилтыг эвдэв. Харин Адель Эдкинсийн “хуурай, сүнсгүй” замаас холдсон нэг зүйл нь “25” цомгоо интернэтэд худалдаагүй нь. Цомгийг биет өвөөр нь худалдах, хадгалах соёл устаж байсан онлайн эрин үед Адель “25” цомгоо зөвхөн биет хэлбэрээр худалдаалж, урлагийн жинхэнэ гоо үзэсгэлэнг авчирсныг нь одоо ч дэлхий нийт, урлаг судлаачид мартаагүй.

ОДОО Ч НЯЛХААРАА АДЕЛЬ

Зарим сонсогч Аделийн шинэ дууг шүүмжлэх “аргатай” үлджээ. Жишээлбэл, “Адель шинэ дуу гаргасан ч нөгөө л хэвээрээ, хуучны байшинтай, хуучны хэв маягтай” гэх. Гэвч тэдгээр сонсогч Калифорнийн байшин дахь Аделийн талаар үл мэдэх.

          Үнэн хэрэгтээ Аделийн бараг цомог бүртээ дурддаг Калифорнийн байшинд юу болсон, ямар дурсамж хадгалагдаж үлдсэн талаар мэдэхгүй. Адель “Some Like You” дуугаараа Калифорнийн байшинд өрнөсөн дурсамжийг хүүрнэж эхэлсэн. Тэрбээр “Some Like You” дуундаа

“Энэ дурсамж заримдаа хайр дүүрэн үргэлжилж

Заримдаа өвтгөдөг” хэмээн дуулжээ. Энэдээс л “Заримдаа хайрлуулж, заримдаа өвтгөдөг” Калифорнийн байшин дахь түүх эхэлсэн.

“Some Like You” дуунаас хойш Адель Эдкинс “Hello” дуундаа

“Намайг сонсож байна уу

Би Калифорнид байна. Урьд нь бид хэн байсан талаар мөрөөдөж байна

Тэр үед бид залуухан, эрх чөлөөтэй байж

Харин одоо бид амьдралд уусахаас өмнө ямар мэдрэмж төрдөг байсныг мартжээ” хэмээн дуулсан байдаг. Калифорнийн байшинд өнгөрсөн дурсамж Аделийг өвтгөж, шаналуулдаг ч, тэр эргэн санах, мөрөөдөх дуртай.

Тэгвэл Адель “Hello” дуунд “Залуухан, эрх чөлөөтэй байж” хэмээн дуулснаа өөр нэгэн дуундаа тайлбарлаж, “When We Were Young” дуундаа

“Бид хөгшрөхөөс айсан

Тэр л биднийг тайван бус байлгасан

Яг л кино шиг

Яг л дуу шиг байсан” талаар дуулсан билээ.

Зургаан жил гэдэг бага хугацаа биш. Тэр хугацаанд уран бүтээлээс хол байсан Адель сэтгэл зүй, бие бялдрынхаа ч хувьд өөрчлөгдсөн. 50 килограмм жин хасаж, хамтдаа хүүтэй болсон нөхрөөсөө ч салсан. Түүний хувьд хичээл зүтгэлтэй, түүнийхээ чинээгээр шаналантай зургаан жил өнгөрчээ.

Харин энэ бүхний дараа дээр дурдсанчлан Адель бүхнийг уучлахаар иржээ.

Зургаан жилийн турш уран бүтээлээсээ хол байсан Адель энэ ондоо багтааж “30” нэртэй цомгоо гаргах гэж байна. “30” цомог гарахаас урьтаж, сонсогчиддоо бэлэг болгон гурав хоногийн өмнө “Easy On Me” дуугаа цацсан. “Easy On Me” дууны шүлэг, дүрс бичлэг түүний “Some Like You”, “Rolling In The Deep”, “Hello” дуутай төстэй. Тэр төстэй зүйл нь гунигийн хэмнэл, Калифорнийн байшин.

          Өмнө нь дурсан санаж, шархалж, уй гуниг тээсэн дурсамжтай Калифорнийн байшинг орхин одож буй талаараа  “Easy On Me” дууны дүрс бичлэгт харуулжээ.

Адель Эдкинс “Easy On Me” дууныхаа шүлэгт

“Надад зөөлөн хандаарай

Би одоо ч хүүхдээрээ байна

Тойрон хүрээлж буй ертөнцөө мэдрэх боломж

Юу хийхээ сонгох цаг байсангүй

Тиймээс надад зөөлөн хандаарай” гэсэн юм.