Өнөө үед загварын салбарт том алаг нүдтэй, өндөр хамартай европ төрхтэй загвар өмсөгчдөөс гадна ази төрхтэй моделиуд ч  хүч түрэн орж ирж байна.  Сүүлийн хэдэн жилд Азийн загвар өмсөгчид олон улсын хэмжээнд нэр хүндэд хүрч,  гоо үзэсгэлэн, бие бялдар, соёлын өвөө дэлхий даяар гайхуулж эхэллээ. Загварын шинэ эрин үеийг тодорхойлж буй “Азийн нүүр царай”,  эдгээр таван модель нь олон улсын үзэгчдийг байлдан дагуулж буй.

Лю Вэн

“H&M”, “Kenzo”, “Givenchy” нар Лю Вэнийг өөрсдийн брэндийн нүүр царайгаар сонгосноор Хятадын загварын од тэрбээр хамгийн алдартай (барууны)  загвар өмсөгчидтэй мөр зэрэгцэж, энэ салбарт өөрийн гэсэн томоохон байр суурийгэзэлсэн.

2012 онд“Нью-Йорк Таймс” сэтгүүлд түүнийг Хятадын сайхан сэтгэлтэй супермодель хэмээн тодорхойлсон. Парисын загварын долоо хоног, Шанель, Жан Пол Готье нарын шоунууд нь түүний  хувьд анх удаа алхсан олон улсын тайз байв.

Загвар өмсөгч бүсгүй анхны гараагаараа магтаалын үгс сонсож,  ”Эсте Лаудер”-ын нүүр царайгаар шалгарч,2009 оны “Victoria's Secret”-ийн загварын шоунд алхсан анхны хятад загвар өмсөгч болжээ. Тэрбээр  Орос гаралтай Наталья Водянова, Карли Клосс, Алессандро Амбросио нарыг ардаа орхисон төдийгүй “Форбс” сэтгүүлээс жил бүр хамгийн их ашиг орлоготой загвар өмсөгчдийн жагсаалтад багтсан анхны ази модель болжээ.

Сяо Вэн Жү

Загварын ертөнцөд дур булаам төрх, уян хатан биеэрээ олны анхаарлын төвд орсон “хүүхэлдэй төрхт” хэмээх Сяо Вэнь Жү 2012 онд Марк Жейкобсын кампанит ажилд оролцсон анхны хятад гаралтай загвар өмсөгч болж,  түүний карьерийн эхлэл тавигдсан юм. Дэлхийд танигдсан брэндийн нүүр царай болсны дараа Вэн Жү олон улсын анхаарлын төвд орж, удалгүй “Louis Vuitton”, “Dior”, “Kenzo” зэрэг бусад томоохон загварын компаниуд түүнд санал тавих болжээ.

Загвар өмсөгч бүсгүй “Vogue China”, мөн “Numero China”-г сурталчилж буй нь загварын салбарыг сонирхож буй залуу охидод  урам зориг хайрладаг.

Түүний гэрэлтсэн царай, гоо үзэсгэлэн нь“L'Orеal Paris”-ийн дараачийн шинэ нүүр царай болоход нөлөөлсөн.Тэрбээр ногоо баялаг хоол иддэг нь гоо сайхан харагдахад  хамгийн чухал  хэмээн Их Британийн “Vogue” сэтгүүлд өгсөн ярилцлагадаа дурджээ .

Мин Си

Мин Сигийн алаг нүд, өвөрмөц содон төрх  нь түүнийг загварын гараагаа эхлүүлэхэд нөлөөлсөн. Тэрбээр анх 2009 онд “Elite Model Look” тэмцээнд Хятадыг төлөөлөн оролцож байжээ. Загвар зохион бүтээгч Риккардо Тисчи түүнийг 2011 оны“Givenchy”-ийн бэлэн хувцасны цуглуулгыг танилцуулах, мөн  уг брэндийн намар өвлийн сурталчилгааны кампанит ажлын нүүр царайгаар сонгосон.

Шанхайд төрж, өссөн залуу загвар өмсөгч тэрбээр Зак Позен, Жереми Скотт зэрэг загвар зохион бүтээгчтэй хамтран ажилладаг  бөгөөд “Victoria's Secret”-ийн тайзнаа алхсан анхны цөөн ази загвар өмсөгчдийн нэг байв.

Сүн Фэй Фэй

Сүн Фэй Фэй  нь анх 2008 оны “Elite Model Look” тэмцээнд загвар өмсөн оролцож, хоёр жилийн дараагаар буюу 2010 оны хоёрдугаар сард Лондоны загварын долоо хоногт оролцсон юм. Үүнээс хойш тэрээр загварын томоохон шоунуудад алгасалгүй оролцсон бөгөөд хамгийн амжилттай ази моделиудийн тоонд зүй ёсоор багтжээ.

Сү Парк

Сүн Жү Парк нь Солонгос улсад төрсөн ч амьдралынхаа ихэнх хугацааг Америкт өнгөрөөсөн бөгөөд Калифорнийг гэрээ гэж боддог. Тэрээр “Chanel”, “Moschino”, “Jeremy Scott” нарын сурталчилгааны нүүр царай болсон, карьер нь өсөн дэвжиж буй ази гаралтай загвар өмсөгч.