Японы уншигчдын дийлэнх хувь нь зохиолч Норихиро Яагиг “Claymore” цувралаар нь илүүтэй мэддэг. Харин түүнээс ч өмнө, сар тутмын “Шонен Жамп” сэтгүүлд 15 б?лгээр хэвлүүлсэн “Домогт сахиусан тэнгэр” цувралын тусгай хоёр ангийг “Тоэй Анимейшн” студиэс 1996 онд бүтээснээр түүний амжилтын гараа сайнаар эхэлсэн гэж болох юм. Зохиолын тухайд Японы ахлах сургуулийн нэгэн хөвгүүний тухай өгүүлэх бөгөөд хүмүүс түүнтэй харц тулгарах, харилцах дургүй. Харин ч бүр түүнээс зугтааж, айж эмээдэг. Сэичиро Китано нь үг дуу цөөтэй эелдэг, боловсон нэгэн. Бусадтай харилцах, найз нөхөдтэй болоход нь түүний нүүр царай асуудал болдгоор зохиогч дүрээ бүтээжээ.

Зохиол доторх өгүүлэмжүүдээс харвал Китаног “Чөтгөрийн царайтай”, “Цуврал алуурчны харцтай” зэрэг илэрхийлэл гарч ирнэ. Тэрбээр тусгай ангид Хэкикүү ахлах сургуульд шилжин ирснээс үйл явдал эхэлдэг.

Сургуулийн захирал болон ангийн багш нь Китаног хүлээж авахаар тохирсон ч түүнийг харсан даруйдаа өрөөнөөсөө хөөж, цагдаа дуудна. Мөн тус сургууль дахь танхай сурагчдын бүлэг “Шинэ сурагч” ирснийг дуулаад зүгээр өнгөрөөхгүйн тулд уулзахаар араас нь ирнэ.

Гэвч толгойлогч нь Китаног харсан даруйдаа зугтах бөгөөд бусдадаа “Хүн андуурсан бололтой” гэж хэлэн аргацаадаг. Шинэ сургуулийн эхний өдрөө ийнхүү ээдрээтэй эхлүүлсэнд Китано өөрийгөө буруутгаж, өөрийн дураар сургууль орчмын хог хаягдлыг цэвэрлэнэ.

Түүнийг цэвэрлэгээ хийж явахад нь өнөөх танхай сурагчдын бүлэг таарах бөгөөд Китано өөрсдийг нь дуусгахаар ирсэн гэж тэд ойлгодог. Улмаар тэд Китаногоос өршөөл эрж, амь гуйдаг.

Харин юуг нь ч бүрэн ойлгоогүй байсан Китано тэдэнд “Хүн хүнээсээ амь эрж болохгүй” гэж эелдгээр хэлээд цэвэрлэгээгээ үргэлжлүүлэн хийнэ. Хүн бүрт туслах бодолтой, хэнд ч баймгүй сайхан сэтгэлт Китано шилжиж ирсэн эхний өдрөө л Хэкикүү сургуулийн бүлэглэлүүдийн удирдагч болох нь тэр.

Санамсаргүй байдлаар өөрөө ч мэдэлгүй сургуулийнхаа бүлэглэлийн толгойлогч болсон түүний түүх цаашлаад Японы хамгийн том, хамгийн алдартай мафийн бүлэглэлийн босс болно гэж уншигчид ч санаагүй биз ээ. Энгийн нэгэн ахлах сургуулийн сурагч Сэичиро Китаног буруугаар ойлгож, ялгаварлан гадуурхах үзэгдэл бидний эргэн тойронд өдгөө ч байсаар байгаа нь эмгэнэлтэй. Хүн төрөлхтний олонх нь нэгнийхээ зүс царай, өмссөн зүүсэнд ач холбогдол өгдөг. Харин дотоод сэтгэл, нэгнээ гэсэн тус дэмжлэгийн талаар нэг их боддоггүй нь гунигтай. Чөтгөрийн царайтай ч сахиусан тэнгэр мэт тусч, сайхан сэтгэлтэй Сэичиро Китано хүүгийн түүхийг ямар адал явдал, санаанд оромгүй өөрчлөлтүүдээр өрнөхийг үргэлжлүүлэн уншаарай.