УИХ-ын дарга Д.Амарбаясгалан өнөөдөр хэвлэлийн бага хурал хийж, сэтгүүлчдийн асуултад нээлттэй хариулт өглөө.

      Тэрбээр “Өнгөрсөн хугацаанд маш олон төрлөөр гүтгэлэг тарааж, нэг ширхэг ч баримт үзүүлэхгүй, магадгүй, болзошгүй, хардаж байна гэх өнцгөөр хариуцлагатай албан тушаал хашиж байсан этгээд олон нийтэд увайгүйгээр гүтгэлгийг тараасан. Өнөөдөр энэ бүгдэд хариулт өгөхөөс гадна, сүүлийн арван жил улс төрд юу өрнөөд байгаа, улс төрчид, намуудын хооронд асуудал үүсээд байгааг өөрийнхөө мэдэж байгааг хэр хэмжээндээ хариулт өгнө. Би залуу хүн. Олон жил улс төрийн намыг бэхжүүлэх, улс төрийн намууд ард иргэдийн өмнө амласан амлалтаа биелүүлж чаддаг, төр өөрөө илүү чадвартай, төр түмнийхээ өмнө хүлээсэн үүргээ биелүүлж чаддаг байх ёстой гэдэг ганцхан зорилгыг барьж өнөөдрийг хүртэл ажиллаж ирсэн” гэв.

  СЭТГҮҮЛЧ: Нэгдүгээрт таны ЖДҮ-тэй холбоотой асуудал юу болсон бэ. Энэ хэрэг хэрхэн шийдэгдсэн бэ?

     Д.АМАРБАЯСГАЛАН: ЖДҮ гэж баахан шуугисан. 2014 онд манай ахын удирддаг компани ЖДҮ зээлийг АН засгийн эрх барьж байх үед УИХ-ын гишүүн Ц.Туваан дэд сайд байх үед зээл авч байсан юм билээ. Манай гэр бүлийн бизнес 1999 оноос хойш хэвлэл, хөдөө аж ахуй, мал аж ахуйн чиглэлээр явж ирсэн. Өөрсдийнхөө болгох хэмжээнд бизнесээ хийж ирсэн. Өнөөдрийг хүртэл тогтвортой үйл ажиллагаа явуулж ирсэн маш цөөхөн хэвлэлийн бизнес, үхрийн аж ахуй эрхэлж байгаа компаниудын нэг. Та бүхэн газар дээр нь очоод танилцаж болно. ЖДҮ авахад миний улс төрийн нөлөөлөл орох боломж тухайн цаг үед ерөөсөө байхгүй. Улс төрийн зорилгоор ЖДҮ-тэй холбоотой асуудлаар хэвлэлээр асуудал хөндөгдөж байсан. Хэрвээ би УИХ-ын гишүүн, сайд, дарга  биш  байх үед хууль зөрчсөн ямарваа нэг үйлдэл хийсэн бол монголын хууль хяналтын байгууллага шударга ажилладаг бол тухайн үед хариуцлага хүлээлгэх боломж байсан.

  СЭТГҮҮЛЧ: Ц.Чулуунзагдын компани тантай холбогддог, Админерал гэдэг нь Амарбаясгалан, Чулуунзагд гэдэг англи нэр гэж тайлбарладаг үүн дээр тайлбар өгөөч?

  Д.АМАРБАЯСГАЛАН: Админерал гэдэг үг англиар Чулуунзагд гэж орчуулагддаг гэж би мэдэхгүй юм байна.  “Админериал” ХХК гэдэг компанийг 2023 оны тавдугаар сарын 26-ны өдөр сайт дээр гарсан мэдээн дээрээс анх удаа сонсож байсан. Энэ бол миний үнэн. Надтай холбох гэж зургаан сар орчмын хугацаанд АТГ шалгалт явуулсан юм билээ. Харамсалтай нь, сэжүүр олдоогүй. Сүүлд нүүрсний сонсгол дээр надтай хамт төрийн бус байгууллага хамтарч эзэмшдэг Ц.Чулуунзагд гэдэг хүний ах нь гүйцэтгэдэг захирал хийж байгаа учраас надтай холбоотой гэж зарлагдсан. Ц.Чулуунзагд болон 1998 онд Говь-Алтай аймгийг төгссөн найзууд хамтраад “Төрөлх алтай” ТБС байгуулж, удирдах зөвлөлийн гишүүнд 11 хүн байдаг. Үүнээс болж Ц.Чулуунзагдтай холбогдсон. Чулуунзагд МАН-ын нарийн бичгийн дарга, МАН 479 бага хурлын гишүүд, дөрвөн нарийн бичгийн даргатай. Хэрвээ Ц.Чулуунзагд бид хоёр хамт ажилладаг гэдгээрээ холбогдож байвал надаас гадна дөрвөн хүн холбогдох байх. “Админерал” ХХК дээр ямар нэгэн холбоо байхгүй гэдгээ албан ёсоор удаа дараа хэлж байсан. Засгийн газрын хэрэг эрхлэх газрын дарга байхдаа  “Админерал” ХХК-тай холбогдсон байх үедээ хэвлэлд мэдээ өгч байсан. Манай гэр бүл, ах дүү нэг ширхэг ч уул уурхайн бизнес хийдэггүй. Уул уурхай тэр дундаа нүүрс олборлолт, нүүрс тээвэрлэлтийн үйл ажиллагаанд хүрз хутгаж оролцоогүй гэдгээ хэлж байсан. Манай гэр бүлийн бизнес ном хэвлэдэг. Манай аав бага байхаас газар хөндөх цээртэй гэж хүмүүжүүлж, өсгөсөн. Буян номын компани гэдэг утгаараа хэвлэлийн компани байгуулж, 26 жил тогтвортой үйл ажиллагаа явуулсан.

  СЭТГҮҮЛЧ: Таныг андуурч зурвас бичсэн Чингэлтэй дүүргийн МАН-ын гишүүн Амарбаясгалан гэдэг хүн дээр хэрэг үүсгэж шалгасан гэдэг асуудлыг Н.Энхбаяр гишүүн ярьсан үүн дээр тайлбар өгөөч?

    Д.АМАРБАЯСГАЛАН: Өчигдрийн нөхөр телевизээр орж яриа өгсөн байна лээ, би үзээгүй. Тэрийг үзэх шаардлагагүй. Юу ярьж, яаж гүтгэх гэж байгааг нь мэдэж байсан. Надтай адил нэртэй хүнийг андуурч барьж хэрэг үүсгэсэн бол хууль хяналтын байгууллагын байгаа дүр төрх ийм байгаа гэсэн үг. Арай ч ижил нэртэй хүнийг барьж, хорьж хэрэг үүсгэсэн асуудал гараагүй байх. Тийм зүйл болсон бол хууль хяналтын байгууллага өөрсдөдөө дүгнэлт хийх цаг  нь болсон.