Хууль зүй, дотоод хэргийн сайд Х.Нямбаатар шүүхээс гэм бурууг тогтоогоогүй байхад цагдан хорьж буй асуудалтай холбоотой мэдээлэл өглөө.

    Тэрбээр “Цагдан хорих шийдвэр гаргасан прокурор, шүүхээс энэ асуудлыг тодруулах нь зөв гэж бодож байна. Хууль зүй, дотоод хэргийн яам хэрэг бүртгэх, цагдах хорих асуудалд оролцдоггүй. Хаврын чуулганаар Эрүүгийн хуульд нэмэлт өөрчлөлт оруулах хуулийн төслийг манай яам боловсруулж байна. Энэ төсөлд таслан сэргийлэх арга хэмжээний нэг төрөл болох цагдан хорих үйл ажиллагааг зогсоож, хамгийн бага нэгжээр оруулдаг байхаар зохицуулах юм. Тодруулбал, бид гурван жил хэртэй зорчих эрхийг хязгаарлах ялыг хэрэгжүүлсэн. Өнөөдрийн байдлаар 1400 орчим хүн энэ ялыг эдэлж байна. Цаашид мөрдөн шалгах ажиллагаанд оролцох субъектүүд яллагдагчаар татагдсан этгээдэд цагдан хорих, таслан сэргийлэх арга хэмжээ авахаас илүүтэй зорчих эрхийг хязгаарлах хууль эрх зүйн боломжийг бий болгохоор зорьж ажиллаж байна. Бусдыг санаатай алах хэрэг хийсэн, эх орноосоо урваж, төрийн эсрэг гэмт хэрэг үйлдсэнээс бусад тохиолдолд тухайн этгээдэд цагдан хорих төрлийг сонгох боломж бий болгохоор эрх зүйн орчныг нь бүрдүүлэх юм. Мөн цаашид цахим хавтаст хэрэг нээж, цахимаар эрүүгийн хэргийн дугаар авдаг хэлбэрт шилжихээр төлөвлөж байгаа” гэв.