"Хүүхэд эрдэнэ сан”-гийн тэргүүн, “Unfriend” аяныг санаачлагч, дэлхийн гоо сайхны олимп гэгдэх “Miss Universe 2019” тэмцээнд оролцсон мисс, загвар өмсөгч Б.Гүнзаяагийн “Эргэлт” сэтгүүлиийн анхны дугаарт нийтлэгдсэн ярилцлагыг хүргэж байна.

-АЛИВАА ЗҮЙЛ ХЯЗГААРТАЙ, НАДАД ЭНЭ ТЭМЦЭЭНЭЭС ЦААШ ОРОЛЦОХ ТЭМЦЭЭН ҮЛДЭЭГҮЙ-

-Сайн байна уу. Та загварын гараагаа хаанаас эхлүүлсэн бэ?

 -Сайн байна уу. Намайг шинэхэн сэтгүүлдээ урьсанд баярлалаа. Бага байхаасаа л гоё, ганган хувцаслах дуртай, загварт хайртай хүүхэд байсан. Ахлах ангид байхдаа “Монгол модель” агентлагийн анхан шатны дугуйланд суралцаж, топ модель Д.Болормаа багшийнхаа шавь болон албан ёсоор загварын салбарт хөл тавьж байлаа. Тэр цагаас тасралтгүй загвар өмсөж, Монголын болон олон улсын томоохон тэмцээнүүдэд оролцож ирсэн. Загварын тайзнаа алхаад арав гаруй жил болчихсон байна.

-Нэг хүний амжилтын цаана маш олон хүний дэмжлэг, хөдөлмөр байдаг. Гэр бүл тань таныг хэр ойлгож, дэмждэг вэ?

-Миний оролцсон тэмцээн бүрд аавын минь нэрнээс урьтаж, Монголын минь нэр дуудагддаг. Эх орны минь нэртэй хамт та бүхэн ч дуудагддаг гэсэн үг. Үүнийг манай гэр бүл өндөр хариуцлага гэж хамгийн сайнаараа намайг бэлтгэж, дэмждэг. Би гурван хүүхэдтэй айлын бага охин. Намайг тэмцээнд оролцохоор явах үед ах маань ямар ч чухал ажилтай байсан миний авч явах зүйлсийг бэлтгэж өгдөг. Харин эгч хувцсыг маань индүүдэж, янзалж өгдөг. Ер нь хүүхэд байхаас одоог хүртэл гэр бүл, хамаатан садан маань намайг бүхий л чадлаараа дэмжсээр ирсэн.

-Дэлхийн тайзнаа алхах мэдрэмж ямар байдаг вэ?

    -Олон улсын тэмцээнд оролцсоноор дэлхийн өнцөг, булан бүрээс ирсэн авьяаслаг охидтой өрсөлдөж, тэднээс маш их зүйл сурдаг. Би дэлхийн загварын хамгийн том хот гэгдэх Нью-Йорк хотод амьдарч байгаад ирлээ. Тэнд байх хугацаандаа манай Монголын залуучууд дэлхийн загварын чиг хандлагаас хоцроогүй, мэдрэмжтэй, тэдэнтэй эн дүй­цэхүйц загварлаг хувцасладаг гэдгийг анзаарсан.

-Та загвараас өөр ямар ажил эрхэлж байна вэ?

    -Одоогийн байдлаар долоон компанийн маркетинг хариуцаж, ажиллаад явж байна. Олон ажил амжуулахын тулд хувийн зохион байгуулалт сайтай, аливаа зүйлүүдийг сайтар зохицуулах чадвартай, маш хариуцлагатай байх хэрэгтэй.  Энэ чанаруудаа би бага байхаасаа олон улсын тэмцээнүүдэд оролцсоноороо олж авсан гэж боддог.

-17 настай байхдаа дэлхийн тайзан дээр алхаж байсан шүү дээ. Тухайн үед танд юу бодогдож байсан бэ?

            -Бүх зүйл нь шинэ содон, “Хөөх, ийм гайхалтай зүйл байдаг юм уу. Энэ л миний мөрөөдөж байсан зүйл байна шүү дээ” гэж л бодож байлаа.

-Та дахин дэлхийн хэмжээний тэмцээнд оролцох уу?  

     -Дэлхийн гоо сайхны олимп гэгдэх “Miss Universe” тэмцээнд амжилттай оролцсон. Аливаа зүйл хязгаартай, надад энэ тэмцээнээс цааш оролцох тэмцээн үлдээгүй. Би олон жилийн өмнөөс хэдэн нас хүртлээ тэмцээнд оролцох, түүнээс цааш хувийн амьдрал, боловсролдоо хэрхэн анхаарах талаараа төлөвлөсөн байсан. Мэдээж загвараас хэзээ ч явахгүй, хөгшин болсон ч тайзан дээрээ алхсаар байх болно.

-Таны “Miss universe” тэмцээнд өмссөн дээл олны анхаарлыг татсан шүү дээ. Дээлнийхээ тухай яриач?

  -Энэхүү хувцас маань Америкийн алдарт олон ангит кинонуудын нэг болох “Star wars” кинонд монгол хатны дүрийг илтгэж байсан загвараас сэдэвлэн 100 хувь гар аргаар хийсэн бүтээл юм шүү дээ. “Miss Universe” тэмцээн дууссаны дараа  Америк, Япон, Хятад зэрэг орноос худалдаж авах, дуудлага худалгаагаар оруулах саналууд ирж байсан. 20 сая төгрөгийн өртгөөр уг дээлийг хийсэн. Миний хувьд энэ дээлээ зарахаас илүү хойч үедээ өвлүүлэн үлдээх хүсэлтэй байгаа.

-Эмэгтэйчүүд бид өөрийгөө бусадтай жишиж, сэтгэлээр унах үе байдаг шүү дээ. Энэ тал дээр ямар зөвлөгөө өгөх вэ?

  - Чи энэ долоон тэрбум хүнээс юугаараа ялгаатай, дахин давтагдашгүй  юм бэ гэдгээ л олох ёстой. Тэрнээс биеийн өндөр, царай зүс огт хамаагүй юм. Гоо сайхны стандартад нийцэхийн тулд амьдарна гэдэг утгагүй зүйл. Тэр  хэмжүүр ч цаг хугацаа өнгөрөх бүрд өөрчлөгдөж байдаг. Үүний оронд мэдлэг боловсрол, эрүүл мэнд, сэтгэл зүйн эрүүл мэнддээ анхаарч, өөрөө өөрийнхөө хамгийн төгс амьдралыг бүтээж яваарай гэж л зөвлөнө.

-Бидний урилгыг хүлээн авч, ярилцсан танд баярлалаа.

-Баярлалаа.