Энэ намрын тайзнаас хайр, эрх чөлөө, ганцаардлыг мэдэрч болохоор байна. Театрын тайзнаа дэлхийн сонгодог зохиолууд шинэ хэлбэрээр амилж, үзэгчдийн  үзэх дуртай жүжгүүд эргэн ирж, олон улсын жишгээр бүтээсэн бүрэн хэмжээний мюзиклыг толилуух гэж байна.

ВАЛЕНТИН, ВАЛЕНТИНА ХОЁР

         Улсын драмын эрдмийн театрын уран бүтээлчид 96 дахь үзвэрийн жилээ аравдугаар сарын 13-нд Оросын драматург Михаил Рощины “Валентин, Валентина хоёр” жүжгээс сэдэвлэсэн саунд драмаар нээлээ. Энэ жил их зохиолч Д.Нацагдоржийн мэндэлсний 120 жил, театрын 95 жилийн ой давхцаж байгаагаараа онцлог. Жүжгийг театрын залуу найруулагч Э.Билгүүн найруулж, гол дүрүүдэд Ц.Цэлмэг, Т.Намсрай нар тоглож байна. Театрын захирал Н.Наранбаатар жүжигчний хувиар тайзнаа эргэн гарч байгаа нь сонирхолтой. Тус зохиол 1971 онд бичигдсэн энэ жүжиг бие биедээ дурласан 18  настай Валентин, Валентина хоёр үл ойлголцлын ханыг даван аз жаргалаа хайх тухай өгүүлдэг. Найруулагч сонгодог түүхийг өнөө цагтай холбож, хурдтай амьдралын дунд бие биеэ сонсож, ойлгохоо больсон хүмүүсийн тухай асуулт өрнүүлэх болно. Жүжгийн гол онцлог нь “саунд драм”, 1970–1980-аад оны өнгө аястай, дүрийн дотоод зөрчлийг хөгжимчид тайзан дээр жүжигчидтэй хамт илэрхийлэх аж.

АМЬТНЫ ФЕРМ

         Жорж Оруэллийн нэрт “Амьтны ферм” энэ намар “Dolma” театрын бүтээлээр тайзнаа амилна. Т.Мөнхбулган жүжгийн зохиол болгож, Т.Цэнд-Аюуш найруулсан энэ мета драм аравдугаар сарын 30-наас Тусгаар тогтнолын ордонд тоглогдоно. Гол дүрүүдэд Гавьяат жүжигчин П.Эрдэнэзаан тэргүүтэй Д.Батцэцэг, Ц.Ганзориг, Э.Намуун, М.Төгөлдөр, Г.Бямбадорж, Н.Даваадорж нар тоглоно. Жүжиг эрх мэдэл хүнийг хэрхэн өөрчилдгийг бус, эрх мэдэлд тэмүүлэх мөчид хүний ухамсар хэрхэн гажиж эхэлдгийг ёгтлон харуулахыг зорьжээ.

НОРСОН ЗҮРХ

          Төрийн соёрхолт “Хурд” хамтлаг 35 жилийн ойгоо угтан “Норсон зүрх” бүрэн хэмжээний мюзикл бүтээж байна. Зохион байгуулагчдын хэлснээр олон улсын мюзиклийн жишгээр Монголд анх удаа хэрэгжиж буй төсөл юм. Хамтлагийн гитарчин, Гавьяат жүжигчин Д.Отгонбаяр ерөнхий продюсероор ажиллаж байна. “Prо” театрын Б.Даваасүрэн, Б.Анхбаатар нар найруулж, хөгжмийн зохиолч Б.Чинбат хөгжмийн найруулгыг хийж байна. Зохиолыг Х.Чойдогжамц бичиж, Н.Наранбаатар зөвлөхөөр ажиллаж байна. Монгол, Их Британийн уран бүтээлчид хамтарч буй энэ төсөлд Вест-Эндийн туршлагатай мэргэжилтнүүд бүжиг дэглэлт, тайзны хөдөлгөөнийг хариуцаж байгаа аж. Залуу жүжигчдийн тоглох мюзикл арваннэгдүгээр сарын 11-нд “UG Palace”-т нээлтээ хийнэ.

LOVE LETTERS

          “Монгол” театр Америкийн зохиолч А.Р.Гернийн “Love Letters” жүжгийг Монголд тоглох албан ёсны онцгой эрхийг авчээ. Үүний тулд нэг жил орчим хугацаанд зохиогчийн эрх эзэмшигчтэй гэрээ байгуулсан нь оюуны өмчийг хүндэтгэх сайн жишиг болжээ. 1988 онд Нью-Йоркийн Офф-Бродвейд нээлтээ хийснээс хойш 50 гаруй оронд тоглогдсон энэ романтик драмд театрын үүсгэн байгуулагч Н.Баярмаа, Гавьяат жүжигчин С.Болд-Эрдэнэ нар тоглож, арваннэгдүгээр сард үзэгчдэд хүргэнэ.

ИНЭЭМТГИЙ ХҮН

          Виктор Хюгогийн романаас сэдэвлэсэн энэ визуал драмыг Б.Даваасүрэн найруулсан. Гуинплений дүрд Б.Билгүүн, Деягийн дүрд Т.Энэрэл, Урсусын дүрд Гавьяат жүжигчин Ц.Төмөрхуяг тоглодог. Жүжиг XVII–XVIII зууны Английн нийгэмд өрнөнө. Нялх байхдаа муу хүмүүсийн гарт орж зэрэмдэглэгдсэн язгууртны хүү Гуинплен тэнүүлч жүжигчин болж, сохор бүсгүй Деятай хайр сэтгэлээр холбогдоно. Хожим лордын цолоо олж авсан ч энэ нь түүнд аз жаргал авчирдаггүй. Баян, хоосны туйлшрал, нийгмийн шударга бус байдлыг метафорлог дүрслэлээр харуулдаг энэ бүтээл “Гэгээн Муза” наадмаас шилдэг найруулагч, шилдэг эрэгтэй гол дүрийн шагнал хүртсэн. Аравдугаар сарын 23-25-нд гуравхан удаа тоглоно.

СҮҮЛЧИЙН БОРОО

            Александр Вампиловын “Нугасны ан” жүжгээс сэдэвлэсэн энэ мета драмыг Б.Анхбаатар найруулж, Зиловын дүрд З.Булган тоглодог. Гол баатар Зилов нугасны анд гарахыг үргэлж мөрөөддөг. Гэвч найз нөхөд, эхнэр, амрагуудтайгаа харилцах явцад гаргасан алдаануудынхаа эцэст суманд оногдох нугас нь өөрөө болох нь тодорхой болно. Жүжиг мета драмын хэлбэртэй учир жүжигчид үзэгчидтэй ярилцаж буй мэт нээлттэй тоглодог. Зилов бусдаас тусгаарлагдан тэдэнтэй зөвхөн утсаар харилцаж, тасралтгүй шаагих борооны чимээ, бөмбөрийн хэмнэл түүний дотоод сэтгэлийг илэрхийлнэ. Аравдугаар сарын 30, 31, арваннэгдүгээр сарын 1-нд тоглоно.

ТҮҮНИЙ БУРУУ

             Андрей Ивановын “Это всё она” зохиолоос сэдэвлэсэн энэ сэтгэлзүйн драмыг Оросын театрын холбоотой хамтран, ОХУ-ын залуу найруулагч Екатерина Шихова найруулсан. Нэг гэрт амьдардаг ч бие биеэ ойлгохоо больсон бэлэвсэн эх, 14 настай хүү хоёрын түүх. Хүүтэйгээ ойлголцож чадаагүй эх онлайн орчинд “өөр хүн” болж түүний амьдралд орсноор драмын зөрчил хурцдана. Альтернатив, панк рок хөгжим хүүгийн дотоод ертөнцийг илэрхийлдэг нь жүжгийн онцлог. Арваннэгдүгээр сард дахин тоглоно.