Монгол Улсын Шадар сайд Т.Доржханд тэргүүтэй төлөөлөгчид Арабын Нэгдсэн Эмират Улсын Дубай хотноо зохион байгуулагдаж буй AIM Congress 2026 буюу Олон улсын хөрөнгө оруулалтын чуулганд оролцож байна.

   Шадар сайд Т.Доржханд чуулганы нээлтийн ажиллагаанд оролцож, “Олон улсын удирдагчдын өндөр түвшний хэлэлцүүлэг”-т байр сууриа илэрхийллээ. Тэрбээр дэлхийн эдийн засагт гарч буй өөрчлөлт, хөрөнгө оруулалтын шинэ боломж, Монгол Улсын эдийн засгийн хөгжлийн тэргүүлэх чиглэлийн талаар онцлон танилцуулсан байна.

   Мөн АНЭУ-ын Гадаад худалдааны сайд Др. Тани бин Ахмед Аль Зейюдитай уулзаж, хоёр орны худалдаа, хөрөнгө оруулалт, эдийн засгийн хамтын ажиллагааг өргөжүүлэх боломжийн талаар санал солилцжээ.

   “Дэлхийн хөгжил цэцэглэлтийг шинэчлэн тодорхойлох нь: Тогтвортой, хүртээмжтэй ирээдүйд чиглэсэн хөрөнгө оруулалтын шинэ боломжуудыг нээх нь” сэдвийн дор зохион байгуулагдаж буй тус чуулган нь төр, засгийн төлөөлөл, олон улсын хөрөнгө оруулагчид, бизнесийн удирдагчид, инновац, технологийн салбарын төлөөллийг нэгтгэсэн хөрөнгө оруулалтын томоохон платформ юм.

   AIM Congress 2026 нь Монгол Улсын хөрөнгө оруулалтын боломж, эдийн засгийн хөгжлийн тэргүүлэх чиглэлийг олон улсын хөрөнгө оруулагчдад танилцуулах, эдийн засгийг төрөлжүүлэх, шинэ хөрөнгө оруулалт, технологи, бизнесийн түншлэл татахад чухал ач холбогдолтой юм.