УИХ-ын дарга С.Бямбацогт Европт ажиллаж амьдарч буй 70 шахам мянган монгол иргэдийн төлөөлөлтэй уулзлаа. Тэрбээр анхны гадаад айлчлалаа Люксембург, Бельги Улсад хийж Европт зорчих монгол иргэдийн визийг хөнгөвчлөх асуудлыг хөндөж тавиад байна. Европын хөрөнгө оруулалтын банкнаас Монгол Улсын хөгжлийн төсөл хөтөлбөрүүдэд нэг тэрбум ам. долларын зээл олгохоор болжээ.

   Бенилюксийн орнууд Монгол Улсын жолооны үнэмлэхийг хүлээн зөвшөөрдөг болсон байна. Мөн Европт амьдарч буй иргэддээ төрийн үйлчилгээг цахимаар хүргэдэг болжээ. Түүнчлэн дэлхийн монголчуудын анхдугаар фестивалийг энэ жил Брюссельд амжилттай зохион байгуулсан. Монгол хэл бичиг, өв соёл, дуу бүжиг, хөгжим, монгол тоглоом наадгай үндэсний спортоо зааж сургах, европт эх орноо сурталчлах хэрэгцээ шаардлага өндөр байгааг дуулгасан.

   Тиймээс Бельгид төрөл бүрийн сургалт болон соёл спортын арга хэмжээ явуулах “Монгол соёлыг төв”-тэй болох, одоо үйл ажиллагаа явуулж буй гурван монгол сургуульд УИХ, Засгийн Газраас дэмжлэг үзүүлэхийг УИХ-ын даргаас хүслээ. Мөн дэлхийд тэргүүлэгч Бельгийн их дээд сургуульд монгол залуусаа тэтгэлэгтэй сургах, гадаадад буй иргэдийнхээ эрүүл мэндийн даатгалын асуудалд анхаарал хандуулах талаар саналаа хэлж байна.

    Иргэдийнхээ тавьсан асуудал бүрийг УИХ-ын дарга С.Бямбацогт судлан үзэж нааштай шийдвэрлэнэ гэв. Мөн оршин суугаа оронтой нь нийгмийн хамгааллын хэлэлцээр байгуулж тэтгэвэр авах боломжийг нь бүрдүүлэх, эрүүл мэндээ хамгаалах боломжоор хангана гэдгийг онцлов. Эх орондоо эргэж очих үед нь ажил бизнесийг нь дэмжих, сурч мэдсэн туршлагыг нь монголд нутагшуулах бодлогын асуудалд гишүүдийнхээ хамт анхаарч ажиллана гэдгийг хэллээ.