Эрүүгийн хуулийн 13.14 дүгээр зүйл заалтаар сэтгүүлчдийг яллагдагчаар татаж буйг сэтгүүлчид эсэргүүцэж, ҮХЦ-д шаардлага хүргүүлж байна. Энэ үеэр Сэтгүүлч Ж.Баттуул “Бид Ардчилсан улсад амьдарч байгаа учраас Үндсэн хуулиар олгогдсон үг хэлэх, үзэл бодлоо чөлөөтэй илэрхийлэх эрхээ хамгаалж, Үндсэн хуулийн цэцэд хандаж байна. Монголын нийгэм ямар байдалтай байгааг дүгнэх хэрэгтэй. Иргэд өөрийнхөө цахим хаяг дээр үзэл бодлоо чөлөөтэй илэрхийлэх эрхээ эдлээд Эрүүгийн хуулийн 13.14 дүгээр зүйл заалтаар яллагдагч болдог, шоронд ордог нийгэм бий болчихлоо. МАН-ыг залуучууд шүүмжилж болдоггүй, авлигчдын талаар ярьж болдоггүй, хулгайчдыг ярьж болдоггүй цаг ирсэн байна.Ч.Хүрэлбаатарын талаар пост бичээд би дөрвөн удаа яллагдагчаар татагдсан. Монгол Улсын иргэн өөрийн цахим хаягтаа үзэл бодлоо илэрхийлэхэд хувь хүний бодлыг хуулийн байгууллагынхан худал гэдгийг нь тогтоож байгаа. МАН-ын сайд нарыг шүүмжилсэн иргэд хэд хэдээрээ яллагдагчаар татагдсан. Үндсэн хуулиар олгогдсон хэвлэн нийтлэх эрхээ эдэлсэн сэтгүүлч нар МАН-ын дарга нарын гомдлоор шүүх, цагдаа, прокурорын хаалга сахиад ажлаа хийж чадахгүй явж байна. Эрүүгийн тухай хуулийн 13.14 гэх заалтыг МАН-ынхан 2020 онд баталсан. Худал мэдээлэл тараавал гэдэг малгайн дор боловч өөрсдийг нь шүүмжилсэн, үнэнийг нь хэлсэн болгоныг шүүх, цагдаад өгч байна. Бид Үндсэн хуулиар олгогдсон эрхийнхээ төлөө тууштай явна. Биднийг Эрүүгийн хуулиар айлгаж байвал бид айхгүй. Бид үгээ хэлсээр байх болно гэдгээ илэрхийлж байна. Тийм болохоор бид Үндсэн хуулийн цэцэд гомдол гаргаж байгаа юм” гэв.