Бяцхан дуучин Б.Бат-Энэрэл хоёрдугаар сарын 17- нд “Талархал” бие даасан тоглолтоо хийсэн билээ. Тоглолтын үеэр түүнд Соёлын тэргүүний ажилтан гэх цол тэмдэг гардуулж өгсөн байдаг.

Тэгвэл Соёлын яамнаас олгодог МУСТА цол тэмдгийг Б.Бат-Энэрэлд Соёлын яамнаас олгоогүй гэнэ. Тодруулбал, энэ талаар Соёлын яамны хэвлэл мэдээллийн ажилтны өгсөн мэдээллээр "Манай яамнаас Б.Бат-Энэрэлд албан ёсоор Соёлын тэргүүний ажилтан гэх цол тэмдэг, гэрчилгээ гардуулаагүй. Өнгөрсөн тав дахь өдөр шагналын талаар яриа гарахад "Манай шагналын хэлтэст тодорхойлолтоо гаргаж өгөөрэй" гэж хэлсэн. Түүнээс биш албан ёсоор гэрчилгээ тамга тэмдэг гаргаад өгчихсөн зүйлгүй. Харин ямар тэмдэг гардуулсныг нь зохион байгуулагч нараас нь асуух нь зүйтэй болов уу. Соёлын тэргүүний ажилтан цол тэмдэг Соёлын сайдын гарын үсэгтэй гардаг. Гэхдээ Б.Бат-Энэрэлд гарын үсэгтэй гэрчилгээ, тэмдэг олгосон зүйлгүй" гэлээ.

Мөн “Талархал” тоглолтыг зохион байгуулсан багийн Б.Ба-Энэрэлд өөрсдөдөө байсан цол тэмдгээ гардуулж өгсөн гэх мэдээлэл цацагдаад байна.

Тэгвэл Б.Бат-Энэрэлийн тоглолтын үеэр Монголын зохиолчдын эвлэлийн шагналт яруу найрагч В.Нэргүй шагналыг гардуулж өгчээ. Тэрбээр тоглолтын үеэр үг хэлэхдээ “Соёлын яамны Захиргаа, удирдлагын хэлтсийн дарга Ч.Энх-Амгалан гардуулж өгөх ёстой байсан ч ажил амжихгүй, ирж чадсангүй. Ч.Энх-Амгаланг төлөөлж би ирлээ. Б.Бат-Энэрэл дүүдээ баяр хүргэе, баяртай байна” гэжээ.

Өөрөөр хэлбэл, Соёлын яамны Захиргаа, удирдлагын хэлтсийн дарга Ч.Энх-Амгалангийн нэрийг барьж яруу найрагч В.Нэргүй Б.Бат-Энэрэлд СТА цол гардуулж өгчээ.