Г.Занданшатарын Засгийн газар огцорсноос даруй долоон сар, УИХ-ын даргын суудлаа хүлээлгэж өгснөөс хойш хоёр жилийн нүүр үзлээ.  Гэтэл МАН-ынхан түүнийг хэрүүл дундаа байнга хавчуулж ирлээ.

     Тэр тусмаа МАН-ын 30 бүлэглэл хэмээн нэрлэгдэх болсон МАН-ын залуу гишүүд мэдээлэл хийх бүрдээ шахам Ерөнхий сайд асан Г.Занданшатарыг өөрсдийнх нь бүх бурууд буруутай мэтээр ярьж, мэдээлэл хийх болов. Хариуцлагаа хүлээж, албан тушаалаасаа огцорсон түүнд төрийн хэрэг хамааралгүй болоод удаж байна. Гэтэл өчигдөр УИХ-ын гишүүн Э.Болормаа хэрэгт холбогдон шалгуулж байгаа тухайгаа хэвлэлд ярихдаа “Ах нарын мэхэнд” унасан хэмээсэн. Цаад утгаараа “ах нар” гэх халхавчаар түүний яриа Ерөнхий сайд асан Г.Занданшатар руу чиглэж байгаа нь ч илт байлаа.

Тодруулбал,  УИХ-ын гишүүн Э.Болормаа “Сонгуулийн үеэр намайг хууль бусаар мөнгө тараасан гэх шалгаж байгаа. Л.Оюун-Эрдэнийн Засгийн газар 2025 оны зургадугаар сарын  3-нд бүрэн бүрэлдэхүүнээрээ огцорсон. Гэтэл Л.Оюун-Эрдэнийн Засгийн газар огцорсны маргааш буюу зургадугаар сарын 4-нд Сонгуулиар мөнгө тараасан хэргээр надад хэрэг үүсгэсэн. Ингээд би зургадугаар сарын 13-нд өөрийн бланк дээр 30 гишүүний гарын үсэг бүхийн албан бичиг бүхий шаардлагыг шинэ Ерөнхий сайдад хүргүүлсэн. Энэ албан бичгийн гол санаа нь намыг дотоод ардчилалыг хангах, жендерийн мэдрэмжтэй Засгийн газрыг бүрдүүлэх агуулгатай шаардлага тавьсан. Гэтэл үүнийг араас сар хүрэхгүй хугацааны араа намайг яллагдагчаар татааж, шүүхээр хилийн хориг тавих арга хэмжээ авсан. Тиймээс би олон улсын шүүхэд эрхээ хангуулахаар хандсан. Ах нарын хавханд уначихлаа” гэсэн юм.

Улмаар УИХ-ын гишүүн Х.Булгантуяа цахим хаягтаа “2024 оны сонгуулийн дараа Үндэсний аудитын газар Э.Болормаагийн сонгуулийн данс, орлого, зарлагад нь аудит хийж ямар ч зөрчилгүй хэмээн дүгнэлт гаргаж, Сонгуулийн ерөнхий хороо тогтоол гаргаж УИХ-д хүргүүлснээр гишүүний тангараг өргөсөн. Гэтэл 2025 оны зургадугаар сард Г.Занданшатар шинэ Засгийн газраа бүрдүүлж байхад нь жендэрийн квотоо хангах гэх мэт 2-3 маш энгийн зарчмын санал хүргүүлсэн. Үүнд, 30 гаруй гишүүд дэмжин гарын үсэг зурсан. Тэр даруйд сонгуулийн үеэр мөнгө тараасан гэж эрүүгийн хэрэг үүсгэсэн. Монголын топ баячууд, хоёр намын том улстөрчид тэр тойрогт өрсөлдсөн юм. Гэтэл 32 настай залуухан эмэгтэй тэр хэцүү тойргоос сонгогдоод, Ерөнхий сайддаа зарчмын санал хэлсэн нь л буруудсан бололтой” хэмээн нийтэлсэн байна.

         Эндээс дүгнэвэл, Э.Болормаад хэрэг үүсгэн шалгаж байгаа асуудлын буруутан нь Ерөнхий сайд асан Г.Занданшатар гэж байгаа мэт харагдана. Харин Ерөнхий сайд Г.Занданшатарыг 2025 оны зургадугаар сарын 9-нд  МАН-ын Бага хурлаар Монгол Улсын Ерөнхий сайдад дэвшүүлэх санлыг хэлэлцэж, дэмжсэн. Улмаар зургадугаар сарын 12-нд УИХ-ын чуулганаар уг асуудлыг хэлэлцэж, УИХ-ын гишүүдийн олонх дэмжснээр Монгол Улсын 34 дэх Ерөнхий сайдаар томилсон түүхтэй.

      Угтаа бол цаг хугацааны хувьд Ерөнхий сайд асан Г.Занданшатарыг Засгийн газраа бүрдүүлж, бүрэн эрхээ хэрэгжүүлэхээс өмнө УИХ-ын гишүүн Э.Болормаад хэрэг үүсгэн шалгаж эхэлсэн байдаг. УИХ-ын сонгуулийн үеэр Ерөнхий сайд, МАН-ын даргаар Ерөнхий сайд асан Л.Оюун-Эрдэнэ ажиллаж байсан. Тэгэхээр УИХ-ын гишүүн Э.Болормаад хэрэг үүсгэн шалгаж эхэлсэн нь Г.Занданшатарыг эрх бүхий албан тушаалд очихоос өмнөх хугацааных гэдгийг УИХ-ын гишүүн Э.Болормаа, Х.Булгантуяа тэргүүтэй гишүүд мэдэж байлтай.

       Энэ мэтээр УИХ дахь МАН-ын 30 бүлэглэлийнхэн санаатай, санамсаргүй байдлаар Ерөнхий сайд асан Г.Занданшатарын нэрийг барьж, муу л бол хойд хар овоохой гэгчээр хамаг муу муухай, болохгүй, бүтэхгүй асуудлаа түүн рүү чихэхийг оролдож эхэлсэн нь Ерөнхийлөгчийн сонгууль ойртсоны илрэл гэлтэй.