Өмгөөлөгч Г.Батбаярын охин А нь Сүхбаатар дүүргийн цагдаагийн нэгдүгээр хэлтэст байцаалт өгөх үедээ албан хаагчид дээрэлхүүлсэн, зодуулсан тухай бичлэгээ цахим орчинд цацаж, “Ариун цэврийн өрөө орох гэтэл байцаагч миний биед халдаж, гар утсыг минь булааж авсан. Би бага насны хүүхдүүд олон нийтийн газар зүй бус харьцаж, нэгнийгээ гэмтээсэн хэрэгт гэрчийн мэдүүлэг өгөхөөр очсон” гэсэн билээ.

           Тэгвэл тэрбээр гэрчээр биш, бусдын биед санаатайгаар халдсан хэрэгт буруутгагдаж, байцаалт өгөхөөр цагдаагийн газарт очсон тухай бичлэг цахим орчинд цацагдаад байна. Тодруулбал, тэрбээр кофе шопод сууж байсан охины толгой дээр нь аягатай кофегоо асгажээ.

       Цагдаагийн албан хаагчдад зодуулсан, бусдын толгой дээр халуун кофе асгасан гэх А нь цахим хуудастаа “Аавыг минь хуулийн салбарт явуулахгүй гээд л явуулж байгаа хэрэг шүү дээ. Аавыг машинаа унаад явахаар зургийг нь дараад “Тамхи татаж, архи уудаг” гээд хэнд ч хэрэггүй зүйл бичдэг байсан шиг. Миний тухай бичлэгийг бүтнээр нь үзвэл тэр охин намайг “Сөгдөөд суу” гээд явуулахгүй, татаж, чангаагаад байгаа нь харагдана. Та нар буруу талдаа ороод байна. тэр охины толгой дээр асгасан кофе халуун байгаагүй. Гэмтлийн зэрэг байхгүй л гэж байгаа биз дээ” гэжээ.  

Харин бид энэ талаар түүний аав, өмгөөлөгч Г.Батбаяраас тодруулахад “Охиныгоо бусдын толгой дээр халуун кофе асгасан гэдгийг мэдээгүй” гэх тайлбарыг өгсөн юм.