Бүгд Найрамдах Беларусь Улсад төрийн айлчлал хийж буй Монгол Улсын Ерөнхийлөгч Ухнаагийн Хүрэлсүх нисэх онгоцны буудлаас Минск хотын ялалтын талбайд хүрэлцэн очиж, амь үрэгдсэн дайчдын дурсгалд зориулсан мөнхийн галд хүндэтгэл үзүүлж, цэцэг өргөлөө. Мөнхийн гал нь аугаа эх орны дайнд амь үрэгдсэн дайчдын дурсгалд зориулсан ялалтын хөшөөний дэргэдэх дурсгалын бэлгэдэл юм.

   Минск хотыг чөлөөлсний 17 жилийн ойгоор 1961 оны долдугаар сарын 3-ны өдөр ялалтын хөшөөний суурийн дэргэд мөнхийн галыг байрлуулж, ЗХУ-ын баатар, хурандаа генерал Алексей Бурдейный асааж байжээ. Ялалтын хөшөө нь Беларусийн ард түмний дайны үеийн баатарлаг тэмцэл, Минск хотыг чөлөөлсөн үйл явдлыг дурсан хүндэтгэх зорилгоор бүтээгдсэн байна.

   Хөшөөний оройд ялалтын одонгийн дүрсийг байрлуулж, суурийн хэсэгт дайны түүх, баатруудын гавьяаг харуулсан уран баримлын дүрслэлүүдийг харуулсан. Ялалтын талбай болон мөнхийн гал нь Минск хотын аялал жуулчлалын чухал цэг юм.