Ард түмний гавьяат цол, тэмдгийг зарж борлуулж байна гэх мэдээлэл цахим орчинд тархаад байгаа билээ. Тодруулбал, нэгэн иргэн цахим хуудастаа “600 мянган төгрөгөөр Ард түмний гавьяат болох уу” гэж байна. Авахаа хүрвэл мөнгө өгөхгүй авч чадна” гээд явуулчихлаа. Төрийн бус байгууллагаас ийм санал тавьсан” хэмээн бичсэн юм.

Бид уг мэдээллийг цахим хуудастаа бичсэн “Алт богц” ХХК-ийн үүсгэн байгуулагч Д.Энхболдоос тодрууллаа.

           -Танд мөнгөөр гавьяат цол авах санал ирсэн гэдэг нь үнэн үү?

-Тийм ээ, миний утас руу залгаж, надаас асуусан. Мөн бас ажил дээр нэг эмэгтэй ирж уулзаад, энэ тухай хэлсэн. Надад шагнал мөнгөөр авах ямар ч хэрэг байхгүй. Би эх орондоо баялаг бүтээгээд явж байгаа жирийн нэг иргэн. Миний утасны дугаарыг хаанаас олсон юм бүү мэд. Утсаар залгаж асуухаас гадна ажил дээр хүртэл ирсэн.

           -Ямар болзол тавьсан бэ?

-600 мянган төгрөг тушаагаад, хоёр хувь цээж зураг байхад болно гэж байна лээ. Хоёр жилийн өмнө надад яг ийм санал ирж байсан. Хоёр жилийн өмнө надтай ирж уулзаж байсан эмэгтэй мөн байх шиг байна лээ. Хаанаас ч гэсэн бэ, ямар ч гэсэн нэг төрийн бус байгууллагын нэр хэлсэн хоёр хавтас барьсан эмэгтэй явна лээ.

         -Шагналыг нь хаана гардуулна гэж хэлсэн бэ?

-Тэрийг нь мэдэхгүй, олон газрын нэр хэлээд байсан. Миний хувьд энэ үйлдэл луйвар байх гэж бодож байна. Хүмүүсийг сэрэмжтэй байж, худал хуурмагт итгэж, мөнгө төгрөгөөрөө хохирохгүй байхыг хүсэж байна.