Непалд болсон хүчтэй үерийн үеэр сургуулийн захирал шуурхай шийдвэр гарган 900 орчим сурагчийг гамшгийн бүсээс нүүлгэн шилжүүлж, амь насыг нь аварсан байна.

   Нувакот мужийн Трибхуван Тришули дунд сургуулийн захирал Ражендра Давади орон нутгийн цагаар 09:10 цагийн үед үерийн аюулын талаар дөрвөн өөр хүнээс дараалан сэрэмжлүүлэг хүлээн авчээ. Тэрбээр нөхцөл байдлыг үнэлээд сурагчдыг нэн даруй өндөрлөг газар руу гаргах шийдвэр гаргасан байна.

   Мөн сурагч тээвэрлэж явсан автобуснуудад буцаж, аюулгүй бүс рүү явахыг үүрэг болгожээ. Түүний хэлснээр, нүүлгэн шилжүүлэх шийдвэрийг ердөө 10 минутын өмнө гаргасан бөгөөд багахан хугацааны саатал гарсан бол олон хүүхдийн амь нас эрсдэх байжээ.

   Тэрбээр “Хэрэв бид хурдан шийдвэр гаргаагүй, 10 минут хожимдсон бол сурагчид болон би өнөөдөр та бүхэнтэй ярьж чадахгүй байх байсан” хэмээн ярьжээ.

   Тэрбээр мөн эцэг, эхийн нэг нь сургууль дээр ирж, “их үер ирж байна” хэмээн охиноо авахаар ирснийг хэлжээ. Эцэг эхчүүд ямар нэгэн ноцтой шалтгаангүйгээр хүүхдээ хичээлээс нь авч явах гэж яарахгүй тул энэ нь аюулын талаарх сэрэмжлүүлгийг баталгаажуулсан гэж үзсэн байна.

   Үерийн ус маш богино хугацаанд хүчтэй нэмэгдэж, сургуулийн байрнаас 100 орчим метрийн зайд байсан дотуур байр хүртэл ус, шавар, нурангид автаж, сургуулийн барилга их хэмжээний шавар, хог хаягдалд дарагджээ.

    2026 оны эхэн үе, Непалийн Трибхуван Тришули дунд сургууль

Үерийн дараах зураг буюу наймдугаар сарын 29-ний өдөр

   16 настай сурагч Юниша Аматягийн ярьснаар, үер буухаас хэдхэн секундын өмнө найзуудынхаа хамт сургуулийн арын нарийн зам, шат ашиглан өндөрлөг газар руу зугтсан байна. Тэрбээр “Би найзуудынхаа хамт ердөө 10 секундын зөрүүгээр үерээс амьд үлдсэн” хэмээн ярьжээ.

   Сурагчид болон багш нар эхлээд сургуулийн ойролцоох өндөрлөг газар руу гарч, улмаар хөрш тосгон руу шилжсэн байна. Үерийн улмаас зам, тээврийн хэрэгсэл тасалдсан тул олон хүн хоёр өдрийн турш аврах ажиллагааны ажилчдыг, тусламж ирэх хүртэл гацжээ.

   Непалын үер, хөрсний нуралтын улмаас наад зах нь 794 хүн амиа алдаж, 2,426 хүн сураггүй болсон талаар BBC мэдээлжээ.