Олимп, паралимпын наадамд оролцох үндэсний шигшээ багийн бэлтгэл ажлыг удирдлага, зохион байгуулалтаар хангах Үндэсний хорооны 2026 оны анхдугаар хуралдаан өнөөдөр болж, шигшээ багийн үйл ажиллагаа болон “Лос-Анжелес 2028” олимпын бэлтгэл ажлын явцтай танилцжээ.

Хуралдаанаар дараах гол асуудлуудыг хэлэлцэн шийдвэрлэв:

• Санхүүжилтийг нэмэгдүүлэх: Тамирчдын 2028 оны Лос-Анжелесийн олимп, паралимпын наадмын эрх олгох тэмцээнд оролцох, бэлтгэл сургалтыг хангахад шаардагдах зардал, түүнчлэн тамирчид, дасгалжуулагчдын цалин хөлсийг төсвийн тодотгол болон 2027 оны улсын төсвийг хэлэлцүүлэх үеэр нэмэгдүүлэн тусгаж санхүүжүүлэхийг Сангийн сайд З.Мэндсайхан, Соёл, спорт, аялал жуулчлал, залуучуудын сайд Ж.Алдаржавхлан нарт даалгав.

• Азийн наадмын дэмжлэг: Японы Айчи-Нагоя хотноо 2026 оны 9-10 дугаар сард болох Азийн XX наадам болон Азийн пара V наадамд оролцох Монголын баг тамирчдын тус улсад байх үеийн хоол, байрны зардалд санхүүгийн дэмжлэг үзүүлэх асуудлыг Засгийн газрын нөөц сангаас гаргуулах арга хэмжээ авахыг холбогдох сайд нарт үүрэг болголоо.