Төв аймгийн Зуунмод сумын “Хүмүүн” цогцолбор сургуулийн дунд сургуулийн сурагчдыг засвар дуусаагүй байхад оруулсны улмаас хүүхдүүд будгаас хордож, эмнэлэгт хүргэгдсэн гэх мэдээлэл бий. Энэ талаар “Хүмүүн” цогцолбор  сургуулийн захирал Л.Эрдэнэцэцэгээс тодрууллаа.

    Тэрбээр “Бид арваннэгдүгээр сарын 15-нд сургуульдаа засвар хийж дууссан. Засвар хийснээс 20 хоногийн дараа сургалтын үйл ажиллагааг өчигдөр эхлүүлсэн. Мөн 5Ё ангид шинэ хулдаас дэвссэн юм. Гэтэл тус ангийн зургаан сурагч дотор муухайрч, толгой өвдсөн гэх оноштойгоор эмнэлэгт хүргэгдэж, шинжилгээ өгсөн. Өнөөдөр Төв аймгийн Эрүүл мэндийн газрын дарга хүүхдүүдийн шинжилгээнээс химийн төрлийн бодис илэрсэн. Тиймээс шинжилгээг ХӨСҮТ-д шилжүүлсэн болохыг мэдэгдсэн. Одоогийн байдлаар эмнэлэгт болон гэрээр эмчилгээ хийлгэж буй хүүхэд байхгүй. Өнөөдөр тус ангид сургалтын үйл ажиллагаа явуулаагүй” гэлээ.