Монголчууд ямар мундаг тэсвэр тэвчээртэй, хүчирхэг, зоримог байгааг “Physical Asia” тэмцээнд оролцсон манай баг тамирчид харуулж чадлаа. Тэд усан онгоц руу ачаа зөөхөд ч, олсноос зүүгдэхэд ч, чулуун хана барин зогсоход ч, хүнд ачааг 100 тойруулахад ч цуцаагүй, хамгийн дайчин, эрэмгийгээрээ байсан. Тэмцээнээс тэмцээний хооронд улам хүчирхэгжин, дийлдэшгүйгээр хүчээ нэгтгэн зориглосон. Монголчуудын тэвчээр, хатуужил, чанар, чансааг харуулсан тамирчдад бахархал дүүрэн байлаа, баярлалаа гэдгийг олон хүн омогшил дүүрэн хэлж байна. Үнэхээр ч бахархлаа, баярлалаа.

      Ухаан, бяр, өөртөө итгэлтэй байдлыг улсын арслан Б.Орхонбаяраас, уян зөөлөн атлаа тэсвэр тэвчээрийн туйлыг МУГЖ, уран нугараач Э.Лхагва-Очироос, шавилхан биедээ баймгүй тэнхээ, хурдтайг холимог тулаанч Б.Энх-Оргилоос, монгол эмэгтэйн чадал чансаа, зориг тэвчээр, итгэл дүүрэн байдлыг жүдогийн шигшээ багийн гишүүн А.Адъяасүрэн, Монголын волейболын спортын анхны легонер тамирчин Г.Хандсүрэн нараас, хөнгөн, тэгсэн атлаа басхүү дайчин чанарыг 3x3  сагсан бөмбөгийн үндэсний шигшээ багийн тамирчин Э.Дөлгөөнөөс харлаа, мэдэрлээ, бахархлаа. Эх орон, элгэн садан гэх сэтгэлээрээ хүчийг олж авсан дэлхийн тамирчдын амь тэмцсэн өрсөлдөөнд хэчнээн гарамгай, дайчин, чин зоригтой, итгэл дүүрэн оролцов оо. Шүд зуун эцсээ хүртэл тэссэн, тэмцээн эхэлсэн л бол бүгдийг даван туулж гарна гэсэн итгэл тасрахгүй байдал, цаг ямагт хамаг байдгаа зориулан тэмцэж байсан зүтгэл, хөдөлмөр, сэтгэл, тэнхээ бүхэнд нь талархлаа.