"Ханжоу 2022" Азийн спортын XIX наадмын жүдо бөхийн  эмэгтэйчүүдийн +78 кг-ын жинд хүрэл медаль хүртсэн “Алдар” спорт хорооны тамирчин ОУХМ Амарсайханы Адъяасүрэн ярилцлаа. Тэрбээр Азийн наадамд Казахстаны Камила Берликашийг нэмэлт цагт вазари үнэлгээгээр ялснаар их шөвөгт үлдсэн. Улмаар хүрэл медалийн төлөө Энэтхэгийн бөх Маан Туликаг нэмэлт цагт торгуулиар ялж “Ханжоу 2022” Азийн наадмын хүрэл медаль авсан билээ. ОУХМ Амарсайханын Адъяасүрэн бол Монголын эмэгтэй хүнд жингийн гол итгэл найдвар, бахархал төрүүлж байгаа ирээдүйтэй залуу тамирчин юм.

 –“Ханжоу 2022” Азийн наадмын жүдо бөхийн +78 кг-ын жинд хүрэл медаль хүртсэнд баяр хүргэе. Холимог багийн барилдаанд мөн хүрэл медаль хүртсэн үү?

-Баярлалаа. Манай улсын жүдочид Азийн наадмын холимог багийн тэмцээнд хүрэл медаль хүртсэн. Харин би багийн барилдаанд барилдаагүй. Хувийн барилдаан дээр бэртэл авсан тийм болохоор барилдаж чадаагүй.

 –Азийн наадамд анх удаа оролцов уу. Азийн наадмын барилдаанууд хэр болов?

-Азийн наадамд анх удаа оролцсон. Энэ удаагийн наадамд хэсэг толгойлж барилдсан. Эхний тойрогт Казахстан Улсын тамирчинтай барилдаж, үндсэн цагаа дуусгаад, нэмэлт цаг сунгаж вазари үнэлгээгээр ялсан. Зооны аваргын төлөөх барилдаан дээр Өмнөд Солонгосын бөхөд ялагдаад хүрэл медалийн төлөө Энэтхэг Улсын бөхийг ялж Азийн наадмын хүрэл медаль хүртсэн.

 –Өмнөд Солонгосын Ким Хаюүнд ялагджээ. Түүнийг ялах боломж байсан уу. “Чингис хаан” гран при тэмцээн дээр Ким Хаюүнийг цэвэр ялж байсан байх аа?

-Өмнөд Солонгосын бөхтэй өмнө нь таарч барилдаж ялж байсан. Түүнийг хожиж магадлал 100 хувь байсан. Барилдааны дундуур хавиргаа хугалаад барилдаан маань өөрчлөгдсөн. Тэгээд л барилдаан болж өгсөнгүй дээ.

-Азийн наадмын хүрэл медалийн төлөө барилдсан Энэтхэгийн бөх их бяртай байв уу. Түүнийг торгуулиар ялах тактиктай дэвжээнд гарсан юм уу?

-Энэтхэгийн бөх надаас том биетэй, биеэрхүү, бяртай бөх байлаа. Би бэртлээ хөндөхгүй ялахын тулд торгуулиар ялах тактиктай гарсан. Түүнтэй барилдахаасаа өмнө өвчин намдаагч хийлгээд бие халаалт хийх гэсэн чинь ерөөсөө хөдөлч чадахгүй байлаа. Аргагүй эрхэнд дэвжээнд гарсан. Багийнхан маань намайг дэмжиж байгааг сонсоод бараг л өвчнөө мартчихсан.

-“Улаанбаатар 2023” “Их дуулга” тэмцээнд Д.Номинзулд хожигдсон бил үү. Түүнээс хойш барилдаан чинь жаахан суларсан тал ажиллагдаад байх шиг. Сэргэлт авч амжихгүй явна уу?

-Тийм ээ. “Улаанбаатар-2023” гранд сламаар Номинзулд  хожигдсон. Тамирчин хүнд ялж, ялагдах үе зөндөө л гарна. Ялагдлаа гээд гутрах биш, алдаагаа олж хараад, дахин алдаа гаргахгүйн тулд, алдаан дээрээ л ажиллах чухал байдаг.

+78 кг-ын дэлхийн шилдэг бөхчүүдтэй өөрийг чинь хариуцуулан харахад арай л жижигдээд, бярдуулаад байх шиг харагддаг. -78 кг-ын жинд барилдах боломж байхгүй юу?

-Миний жин өмнө нь 90 кг байв. Одоо жин нэлээн нэмэгдээд 100 кг болсон. Энэ жингээ барьж барилдана. Яг одоогоор 100 кг дээр жин тогтоод, энэ жиндээ дасаад байгаа. Харин хурд, хөдөлгөөнөө алдахгүй гэж хичээж байна. Тэгэхээр -78 кг-ын жинд барилдах боломж байхгүй.

– “Алдар” спорт хорооны гавьяат тамирчин, дасгалжуулагч Д.Цэрэнханд багшийн шавь уу. Хэдэн оноос жүдо бөхөөр хичээллэв. Яагаад чухам жүдо бөхийн сонгож хичээллэх болов?

-Би 2019 онд жүдо бөхийн үндэсний шигшээ багт хамрагдаад Д.Цэрэнханд багшийн удирдлага дор бэлтгэлээ хийж эхэлсэн юм. Манай гэр бүлийнхэн ер нь бөхөд дуртай. Тэр тусмаа аав маань бөхийн төрлүүдийг тэмцээнийг бүгдийг нь шимтэн үздэг. 2014 оны есдүгээр сард Спортын төв сургуулийн Г.Эрдэнэбат багшийн удирдлага дор анх жүдо бөхийн спортоор хичээллэж эхэлсэн.

 –Одоо шинэ он гарахаас өмнө ямар  гран при, гранд сламын тэмцээнүүдэд оролцох төлөвлөгөөтэй байгаа вэ?

-Шинэ он гарахаас өмнө хоёр “Их дуулга” гранд слам тэмцээн байгаа. Эхний ээлжинд бэртлээ хурдан эдгээгээд бэлтгэлдээ орно.

-Дэлхийн чансааны хэдэд жагсаж байна. Олимпын онооны бүсэд ойрхон байгаа юу?

-Дэлхийн чансааны 14-т эрэмбэлэгдсэн байгаа. Олимпын онооны бүсэд бий. Надад үргэлж тусалж, дэмжлэг үзүүлдэг “Алдар” спорт хороо, “АПУ” ХХК, Б.Энххуяг ах, Жүдо бөхийн үндэсний шигшээ багийн багш, дасгалжуулагч нар болон гэр бүл, ах, эгч, найз нөхдөдөө бүгдэд нь баярлалаа гэж хэлмээр байна.