“Бахрейн 2025” Азийн залуучуудын III наадам 2025 оны аравдугаар сарын 22-31-ний өдрүүдэд Бахрейн Улсын Манама хотноо Азийн олимпын зөвлөлийн ивээл дор 12 жилийн дараа дахин зохион байгуулагдаж байна.  Тус наадамд Монгол Улс спортын 23 төрлөөр 135 тамирчин оролцож, тивийн шилдэг залуу тамирчидтай авхаалж самбаа, ур чадвараа сорин өрсөлдөхөөр эх орноосоо мордлоо.

      Энэ удаагийн наадамд муайтай спорт анх удаа хөтөлбөрт багтаж байгаагаараа онцлог бөгөөд Монголын муайтай спортын холбооны өсвөрийн багийн хоёр дасгалжуулагч, таван тамирчин аравдугаар сарын 23-26-ны өдрүүдэд муайтай тулаан болон вай кру төрөлд эх орноо төлөөлөн оролцоно.

Багийн бүрэлдэхүүнд:

“Галт дэвжээ” клубийн дасгалжуулагч СМ Н.Идэрмөрөн,

“Виктори” клубийн дасгалжуулагч Э.Мөнхбаатар нараар ахлуулсан,

М.Энх-учрал 14-15 нас 48 кг “Галт дэвжээ” клуб

Ч.Есүй 16-17 нас 48 кг, вай кру “Виктори” клуб

Б.Бадам 14-15 нас 51 кг “Виктори” клуб

М.Бямбацогт 16-17 нас 54 кг “Виктори” клуб

С.Бямбажав 16-17 нас 57 кг “Галт дэвжээ” клуб

    Азийн залуучуудын наадам (Asian Youth Games)-ын түүхийг сөхвөл:  2009 онд Сингапур Улсад анх удаа, 2013 онд БНХАУ-ын Нанжин хотод хоёр дахь удаагаа зохион байгуулагдсан бөгөөд гурав дахь удаагаа буюу 2025 онд Бахрейн Улсад үргэлжилж байна. Энэ удаагийн наадамд Азийн 45 орны 4000 гаруй шилдэг залуу тамирчид төр, тивийнхээ нэрийн өмнөөс өрсөлдөж байна.