Монгол Улсын Их Хурлын дарга С.Бямбацогтын урилгаар Бүгд Найрамдах Социалист Вьетнам Улсын Үндэсний Ассамблейн дарга Чан Тань Ман 2026 оны есдүгээр сарын 9-11-ний өдрүүдэд Монгол Улсад албан ёсны айлчлал хийнэ.

   Тус айлчлал нь Вьетнамын Үндэсний Ассамблейн даргын түвшинд Монгол Улсад 23 жилийн дараа хэрэгжиж буйгаараа онцлог бөгөөд Монгол, Вьетнамын “Иж бүрэн түншлэл”-ийн харилцаа, хамтын ажиллагааг бэхжүүлэхэд чухал ач холбогдолтой юм. Айлчлалын үеэр УИХ-ын дарга С.Бямбацогт, Вьетнамын Үндэсний Ассамблейн дарга Чан Тань Ман нар албан ёсны хэлэлцээ хийж, парламент хоорондын хамтын ажиллагааг өргөжүүлэх чиглэлээр холбогдох баримт бичгүүдэд гарын үсэг зурах аж.

   Мөн парламентын бүлэг, Тамгын газар хоорондын ажил хэргийн харилцаа, хамтын ажиллагааг хөгжүүлэх, харилцан туршлага солилцох асуудлыг хэлэлцэх юм. Монгол Улс, Бүгд Найрамдах Социалист Вьетнам Улс 1954 оны арваннэгдүгээр сарын 17-нд дипломат харилцаа тогтоосон. Хоёр улсын дипломат харилцаа тогтоосны 70 жилийн ойг тохиолдуулан 2024 онд “Иж бүрэн түншлэл”-ийн харилцаа тогтоох тухай Хамтарсан тунхаглал гаргасан билээ. Монгол Улсын Их Хурлын дарга нар Вьетнам Улсад өмнө нь хэд хэдэн удаа айлчилж байжээ. Тухайлбал, 1998 онд УИХ-ын дарга Р.Гончигдорж, 2004 онд С.Төмөр-Очир, 2010 онд Д.Дэмбэрэл, 2018 онд М.Энхболд нар тус улсад төрийн айлчлал хийсэн байна.

   Энэ талаар Улсын Их Хурлын Нээлттэй парламентын газраас мэдээлэв.