НҮБ-ын Цөлжилттэй тэмцэх тухай конвенцын талуудын 17 дугаар бага хурал “COP17” Монгол Улсад зохион байгуулагдаж буйтай холбогдуулан Богд хааны ордон музей “Дотоод хувьслаар гадаад хувьслыг даван туулах нь” тусгай үзэсгэлэнгээ олон нийтэд толилуулж эхэллээ. Үзэсгэлэнгийн үзэл санаа нь байгаль, нийгэмд тулгарч буй аливаа өөрчлөлт, сорилтыг зөвхөн гадаад хүчин зүйлээс бус, хүний дотоод ухамсар, хандлага, үйлдэлтэй холбон авч үзэхэд оршино. Хүн дотоод сэтгэлээ танин, зөв хандлага, зөв үйлээр амьдрах нь өөрийн амьдрал төдийгүй хүрээлэн буй орчин, сав шим ертөнцөд эерэг нөлөө үзүүлнэ гэсэн гүн ухааны санааг үзэсгэлэнгээр дамжуулан илэрхийлж байна.

    Энэхүү үзэл санааг буддын гүн ухаан, тэр дундаа Дүйнхор буюу Цагийн хүрдний (Калачакра) номлолын үүднээс тайлбарлавал, гадаад ертөнц болон хүний дотоод ертөнц нь харилцан шүтэлцээтэй хэмээн үздэг. Дүйнхорын бясалгалын уламжлалд хүн гадаад ертөнцийг шууд өөрчлөхөөс урьтаж өөрийн дотоод сэтгэл, бие, судал, хий, энергийн зохист харьцааг танин боловсруулснаар гадаад орчинтойгоо харилцах харилцаа, түүнд үзүүлэх нөлөөгөө өөрчлөх боломжтой хэмээн тайлбарладаг.

    Иймээс “Дотоод хувьслаар гадаад хувьслыг даван туулах нь” үзэсгэлэн нь байгаль орчны доройтол, цөлжилтийн асуудлыг зөвхөн экологийн сорилт төдийгүй хүний ухамсар, хэрэглээ, хандлага, хариуцлагатай салшгүй холбоотой асуудал болохыг соёл, шашин, гүн ухааны өвөөр дамжуулан эргэцүүлэн харахыг зорьж байна. Тус үзэсгэлэнд Богд хааны ордон музейн сан хөмрөгт хадгалагдаж буй Дүйнхор буюу Цагийн хүрдний номлол, шүтээн тахилга, зан үйлтэй холбоотой түүх, соёлын дурсгалуудаас дээжлэн дэлгэн үзүүлж байна. Үзэсгэлэн 2026 оны наймдугаар сарын 14-30-ны өдрийг хүртэл Богд хааны ордон музейд үргэлжилнэ.