“Алтаргана-2026” олон улсын наадам долдугаар сарын 1-5-ны өдрүүдэд ОХУ-ын Бүгд Найрамдах Буриад Улсын нийслэл Улаан-Үд хотноо ёслол төгөлдөр зохион байгуулагдаж өндөрлөв. Хоёр жил тутамд зохион байгуулагддаг тус наадамд ОХУ, БНХАУ, Монгол Улсын 50 мянган зочид төлөөлөгч оролцжээ. Энэхүү наадам нь Буриад түмний эв нэгдэл, өв соёл, хэл бичиг, ёс заншлыг өвлүүлэн түгээн дэлгэрүүлэх зорилготой. Тус наадамд Монгол Улсаас нийт 26 төрлийн тэмцээнд 720 оролцогч албан ёсоор бүртгүүлсэн хэдий ч 1280  монголчууд өрсөлдсөн байна.