Уудам буруу булхай бүхнийг хийхийн тулд  шүүх, цагдаа, сэтгэл зүйч, гишүүн гээд улсын аль эрх мэдэлтэй гэсэн бүхнээр багаа бүрдүүлсэн нэгэн. П.Дэлгэрбаяр найруулагчийн ээлжит нэгэн бүтээл “Харанхуйгаас сонсогдох орь дуу” киног үзэж буй хэн бүхэн түүнийг андахгүй. Тэр ямагт сэрэмжтэй, хянуур байж, анхаарлаа бүрэн төвлөрүүлж байгаа онодог мэргэн буудагч. Алдаж, зөрүүлж буудна л гэж байхгүй.  Ийм нэгэн нүгэлтний дүрийг жүжигчин Ж.Алтаншагай бүтээжээ. Түүнийг бид “Бууны сум буцааж болдоггүй”, “95%”, “Тойрог” зэрэг кинонд дүр бүтээснээр нь мэдэх билээ. “Бууны сум буцааж болдоггүй”-н эх орныхоо төлөө амиа үл хайрлан тулалдах цэргээс эхлээд л дүрээ өөрийн өнгө аястайгаар гаргаж эхэлсэн. Үүний оргил нь, тэр дундаа зэвүүнээс зэвүүн дүр нь Уудам байлаа.

    Сүүлд гэхэд тэр өөрийн итгэлт өмгөөлөгчөө өөрөөс нь урвасныг мэдээд, шууд хөнөөдөг. Тэгэхдээ “Надад хумсаа шигтгэх гэж байгаад тасарсан сарвуу хэрэггүй. Би цаад толгойг нь олмоор байна” гэж тэр өгүүлдэг. Үүгээрээ тэр ямар босс, хэн бэ гэдэг нь илэрдэг. Багтаа нэгэнтээ авсан бол хэнийг ч тэр өөртөө үнэнч зүтгүүлэх бөгөөд шаардлагатай бол өөрөө амийг нь хөнөөхөөс нааш хэнийг ч тавьдаггүй. Эсрэг, тэр тусмаа зэвүүн эсрэг ийм дүрийг хүний жицүүцэл төртөл бүтээнэ гэдэг амаргүй. Олон ч эсрэг дүр бий л дээ. Гэхдээ газар дээр нь шийтгэж, хөнөөж, дуусгадаг хараа тод, мэдрэмж хурц нэгний дүрийг бүтээнэ гэдэг гарцаагүй уран бүтээлчээс чадвар чансаа шаардана. Үүнийг нь ч мэддэг болохоор П.Дэлгэрбаяр найруулагч түүнд зориулан зэвүүн жигтэй, мэргэжлийг нь сорьсон дүрүүдийг кино зохиолдоо бичдэг биз ээ. Бодож бичсэн дүрийг нь чинээнд нь тултал бүтээнэ гэдэг ч ажиллаж чаддаг, авьяас дүүрэн уран бүтээлчийн чадвар байх. Энэ хоёр нийлж тэдний онцгой, өвөрмөц, сэтгэмж, сэтгэл дүүрэн уран бүтээл төрдөг биз ээ.