Загвар өмсөгч С.Төгсийг бид цөөнгүй дүрээр нь ч мэдэх билээ. Тэрбээр 2010 оноос хойш загварын салбарт ажиллаж байгаа бөгөөд 2011 оны Берлиний загварын долоо хоногт цорын ганц ази моделиор оролцсон нэгэн. Түүнчлэн Vision 2013 наадмаар топ моделиор шалгарсан бөгөөд Asia’s next top model season дөрвийн шилдэг 13-т багтсан байдаг.

     Тэрбээр “Би бага байхдаа генетикч болохыг их хүсдэг байсан. Эмээ минь Хөдөө аж ахуйн их сургуульд багшилдаг доктор байсан. Тэр үед эмээгийнхээ мэргэжлийг өвөлж авахыг их хүсдэг байлаа. Тэгээд яг сургуулиа төгсөх болсон чинь сонирхол өөрчлөгдөөд загвар өмсөгч болъё гэж шийдсэн. Би уул нь загвар өмсөгч болохыг нэг их хүсдэг байгаагүй. Make up artist болно гээд сургуульд нь ч сурч байлаа. Тэгтэл нэг зуныхаа амралтаар “Торго” загварын агентлагт очсон юм. Тэр үед О.Болд дизайнер нь намайг “Чи ер нь загвар өмсөгч болох хүүхэд байна” гээд “Торго”-ын нэг оройн шоунд оруулснаар би анх тайзан дээр алхаж байлаа. Яг тайзан дээр алхаж байх үед надад үнэхээр их кайфтай, гоё санагдсан. Тэгж л анх шийдэж байсан” гэжээ.

     Мөн “Би энэ мэргэжилд үнэхээр дуртай байгаагүйсэн бол аль хэдийнээ хаячих байсан. Ямар ч нөхцөлд ажиллаж чаддаг байх ёстой болдог. Жишээ нь, өвөл уулын орой дээр найман цагийн турш тасралтгүй зуны хувцастай зураг авалт болно, эсвэл нэмэх 40 хэмийн халуунд өдөржингөө ноолуурын зураг авалт хийх зэрэг ямар ч хүнд нөхцөлд байсан зураг авалтаа хийж дуусгах л ёстой болдог. Гадаадад ажиллаж буй тохиолдолд байнгын дэглэмтэй байхыг шаарддаг. Моделиудын хамгийн дээд хэмжээ нь 90:60:90 байх ёстой. Болж өгвөл үүнээс бага. Тэр хэмжээгээ барьж чадахгүй дэглэм алдвал шууд л “Чи бүдүүн байна” гэж хэлүүлээд л сэтгэл санаагаар унах магадлал өндөр. Наад захын жишээнүүд гэхэд л ийм байна” гэсэн байдаг.
    
  Түүнчлэн дүр бүтээсэн кинонуудаас нь нэрлэвэл, “Төгс хайр”, “Үхлийн тойрог”, “Тэнгэр газрын хязгаарт”, “Балай санаа” гэхчлэн үргэлжилж буй юм. Үзэгчид санаж буй бол тэрбээр мөн М.Батболд найруулагчийн “Шөнө дундын бүжиг” жүжигт ч оролцон тоглосон билээ. Харин С.Төгсийн зан чанарын тухайд “Хүнийг ойлгож ярилцдаг, сайн сонсогч гэж үнэлдэг. Нэг тийм хамт байхад ханьтай, хөгжилтэй, юманд санаачлагатай, эелдэг тэр зан чанартай” гэж ойр дотныхон нь тодорхойлдог байна. Түүнд уран бүтээлийн өндөр амжилт хүсье.