Монголын хамгийн том хөгжмийн фестиваль болох Playtime Festival нь Азийн  ТОП 5 хөгжмийн наадмуудын эгнээнд багтах зорилгодоо хүрэх бодит алхмуудыг жилээс жилд хэрэгжүүлсээр ирсэн билээ. "Playtime Festival 2026" долдугаар сарын 2-4-ний өдрүүдэд Playtime хүрээлэнд нийт гурван өдрийн турш зохион байгуулагдана.

Энэ жилийн наадам нь фестивалийн 24 жилийн түүхэнд шинэ стандарт тогтоох, олон улсын түвшний хөгжмийн экосистемийг бүрэн хэмжээгээр нэг дор бүрдүүлсэн онцгой жил болж байна. Энэ жилийн онцлог нь олон улсын хэмжээний уран бүтээлчид, дэлхийн жишигт нийцсэн продакшн, тогтвортой хөгжлийн шийдлүүд болон үзэгч төвтэй үйлчилгээний шинэчлэлүүдийг нэгтгэн, фестивалийн туршлагыг шинэ шатанд гаргахаар зорьж буй явдал юм.

ФЕСТИВАЛИЙН ТҮҮХЭН ДЭХ ХАМГИЙН ӨНДӨР ТӨСӨВТЭЙ LINEUP

    Playtime Festival 2026 нь фестивалийн түүхэн дэх хамгийн өндөр төсөв зарцуулсан хөгжмийн хөтөлбөрийг бүрдүүлснээрээ онцлог болж байна. Амьд хөгжим болон электроник хөгжмийн чиглэлээр дэлхийд танигдсан 21 улсын 123 хамтлаг, уран бүтээлч уран бүтээлээ толилуулах бөгөөд энэ нь фестивалийн 24 жилийн түүхэн дэх хамгийн өргөн цар хүрээтэй Lineup болж байна.

Наадмын үндсэн тайзууд болох Playtime, The Bunkr, 989 Tent, Нааглихац, Grove, Fire тайзууд, мөн “La Vie En Rose”, “Waldo” асруудад олон улсын 31, дотоодын 92 хамтлаг, уран бүтээлч уран бүтээлээ толилуулна.

• Фестивалийн 2026 оны голлох уран бүтээлчдийг дурдвал амьд post-punk урсгалаар танигдсан Беларусийн Molchat Doma, indie folk урсгалын алдарт Норвегийн “Kings of Convenience”, АНУ-ын dream pop урсгалыг төлөөлөх DIIV, Өмнөд Солонгосын indie rock хамтлаг Hyukoh, indie pop урсгалыг үндэслэгч Их Британи, Францын Stereolab зэрэг амьд хөгжмийн домог болсон уран бүтээлчид болон Хятадын Horse Radio, Fazi, Тайландын JPBS, Японы реппер Shing 02, Италийн CSI зэрэг олон улсын томоохон уран бүтээлчид хүрэлцэн ирэх юм.
• Электроник хөгжмийн хувьд орчин үеийн техно урсгалын нөлөө бүхий уран бүтээлч Rhom Omit, Испанийн электрон хөгжимчин Jasss, Германы техно DJ Helena Hauff, Детройт техно урсгалыг төлөөлөх DJ Stingray 313, мөн Jesse You нар оролцох онцлох үйл явдлаар дүүрэн энэ жил үзэгчдэдээ бэлэг барин ажиллах гэж байна.

ОЛОН УЛСЫН ПРОДАКШН БАГУУД

         Playtime Festival 2026 нь Монголын фестивалийн салбарын хөгжилд шинэ хуудас нээж, олон улсын хэмжээний фестиваль, тайзны урлаг, гэрэлтүүлэг, визуал дизайны чиглэлээр ажилладаг мэргэжлийн багуудтай хамтран ажиллаж байна. Энэхүү хамтын ажиллагаа нь зөвхөн техникийн шинэчлэл бус, фестивалийн орон зайн шийдэл, үзэгчийн мэдрэмж, тайзны хэлбэр дизайныг дэлхийн жишигт ойртуулах стратегийн алхам болж буйгаараа онцлог юм.

Фестивалийн тайз, орон зайн ерөнхий концепц дээр Японы архитектор, гэрэлтүүлгийн дизайнер, фестивалийн орон зайн найруулагч Jiro Endo болон түүний үүсгэн байгуулсан SOIHOUSE studio ажиллаж байна. Тэрээр Тайландын Big Mountain Music Festival-ийн дизайны удирдагчаар олон жилийн турш ажилласан туршлагатай. Мөн Амстердам хотод төвтэй, уран бүтээлч Rene van Dijk-ийн үүсгэн байгуулсан rene.studio баг фестивалийн тайзны дүрслэлийн шийдлүүд дээр хамтран ажиллаж байна.

Үүнээс гадна олон улсын туршлагатай системийн инженерүүд Томас болон Роберт де Вриес нар фестивалийн техникийн гүйцэтгэл, системийн найдвартай ажиллагааг ханган ажиллаж байна. Ийнхүү Playtime Festival 2026 нь уран бүтээлчдийн бүрэлдэхүүнээс гадна продакшн, тайзны шийдэл, визуал орчны хувьд ч бүрэн утгаараа олон улсын түвшний фестиваль болох зорилгодоо хүрч байна.

ӨНДӨР ТҮВШНИЙ ЗОХИОН БАЙГУУЛАЛТ

    Playtime Festival 2026 нь үзэгчдийн тав тух, аюулгүй байдал, үйлчилгээний чанарыг дараагийн түвшинд хүргэхэд онцгой анхаарч байна. Өсөн нэмэгдэж буй үзэгчдийн тоо, олон улсын хэмжээний фестивалийн стандартад нийцүүлэн зохион байгуулалтын бүхий л чиглэлд томоохон сайжруулалтуудыг хийж байгаа юм.

Энэ жилийн фестивалийн хүрээнд хяналтын камерын сүлжээ, харуул хамгаалалт, аюулгүй байдлын зохион байгуулалтыг өргөжүүлэн ажиллуулж, үзэгчдийн аюулгүй оролцоог хангах нөхцөлийг бүрдүүлж байна. Мөн ариун цэврийн байгууламжийн тоо болон үйлчилгээний хүртээмжийг нэмэгдүүлж, цэвэрлэгээ үйлчилгээний давтамжийг сайжруулснаар олон мянган хүнийг нэгэн зэрэг хүлээн авах хүчин чадлыг нэмэгдүүлжээ.

Түүнчлэн автомашины зогсоол, дотоод хөдөлгөөний урсгал, нэвтрэх гарцуудын зохион байгуулалтыг шинэчлэн төлөвлөж, талбай руу нэвтрэх болон гарах процессыг илүү хурдан, ойлгомжтой, саадгүй болгоход анхаарч байна.

НААДМЫН ТАСАЛБАРЫН ШИНЭЧЛЭЛ

       Энэ жилийн онцлох өөрчлөлтийн нэг нь тасалбарын бодлогын шинэчлэл юм. Үзэгчдэд зориулан 2 болон 3 өдрийн тасалбарын сонголтыг санал болгож байгаа нь хувь хүний цаг зав, сонирхолд нийцсэн илүү уян хатан оролцоог бүрдүүлж байна. Мөн түүнчлэн, өмнө жилээс хэрэгжүүлээд буй олон улсын жишигт нийцсэн тасалбар баталгаажуулалтын системийг үргэлжлүүлэн ашигласнаар хуурамч тасалбарын эрсдэлийг бүрэн арилгаж, үзэгчдийн мэдээллийн аюулгүй байдлыг хамгаалах юм.

Наадмын тасалбар албан ёсны борлуулагч Shoppy.mn-ээр борлуулагдаж буй бөгөөд одоогоор тасалбарын Second Release шат үргэлжилж байгаа ба тасалбар 20%-ийн хөнгөлөлттэй үнэтэйгээр борлуулагдаж байна. Энэ үед тасалбараа авах нь үзэгчдэд наадмыг хамгийн бодит үнэ цэнээр, хамгийн таатай нөхцөлөөр мэдрэх боломжийг олгож байна.

ЭХ ДЭЛХИЙГЭЭ ХАЙРЛАХ PLAYTIME FESTIVAL

earth. music. art. love уриан дор зохион байгуулагддаг Playtime Festival нь хөгжим, урлаг, соёлоор дамжуулан залуусыг эерэг хандлага, хариуцлагатай амьдралын хэв маягт уриалж, тогтвортой хөгжлийн үнэт зүйлсийг түгээн ажилладаг.

Наадмын хүрээнд үүсэх хог хаягдлыг ангилан ялгаж, дахин боловсруулах тогтолцоог хэрэгжүүлэхийн зэрэгцээ олон дахин ашиглах боломжтой Reusable Cup хэрэглээг хэвшүүлснээр байгальд ээлтэй фестивалийн соёлыг бүрдүүлээд байна.

Мөн шинэ фестивалийн талбайдаа мод, бут сөөг, ургамал тарьж ургуулан таримал ой байгуулах зорилт дэвшүүлээд байгаа нь Монгол орны экосистемийг дэмжих, биологийн олон янз байдлыг хамгаалах, байгаль орчны боловсролыг түгээн дэлгэрүүлэх урт хугацааны хөрөнгө оруулалт болох юм.

Playtime Festival нь зөвхөн хөгжмийн наадам бус, харин хүн өөртөө, бусдад болон эх дэлхийдээ хайр түгээх соёлыг төлөвшүүлэх хөдөлгөөн байхыг зорьдог.