Залуу жүжигчин Б.Тэргэлтэй шинэ уран бүтээлийнх нь талаар ярилцаснаа хүргэж байна.

     Түүний хувьд найруулагч П.Лхагвадуламын "Сэр сэр салхи" (City of Wind) уран сайхны кинонд бөө хүү Зэ-гийн дүрийг бүтээсэн. Энэ уран бүтээлээрээ Венецийн олон улсын кино наадмын "Шилдэг жүжигчин", Азийн кино наадмын "Шилдэг шинэ залуу авьяастан" зэрэг шагналыг хүртсэн. Мөн “Хурд хамтлаг”-ийн “Бүсгүй” уран сайхны кинонд тоглож байсан билээ.

ЗАЛУУ ҮЕЭ ҮНЭЛДЭГ, ХҮНДЭЛДЭГ НАЙРУУЛАГЧТАЙ АЖИЛЛАХ ХАМГИЙН САЙХАН БАЙДАГ

-Сайн байна уу. Сүүлийн үед уран бүтээлийн олз арвин харагдлаа. Энэ талаар яриагаа эхлэх үү?

      - “Өнчин”, “Сүүлчийн алиалагч” уран сайхны кинонууд маань бүх кино театрын дэлгэцээр гарч байна. “Өнчин” уран сайхны кинонд Оргил гэх бүтэн өнчин хүүгийн дүрийг бүтээсэн. Харин “Сүүлчийн алиалагч” кинонд туслах дүр болон арын албанд ажилласан.

-Оргилын дүр сонирхол татаж байлаа. Дүрийнхээ талаар?

         - “Сэр сэр салхи” кинонд 17 настай бөө хүүгийн дүрийг бүтээж байсан. Энэ удаа мөн л 17 настай Оргил хүүгийн дүрийг бүтээсэн. Насанд хүрээд асрамжийн газраасаа гарч төрсөн эцэг, эх, гэр бүлээ хайж  буй хүү. Асрамжийн газарт орхигдсон хүүхдүүд ихэвчлэн ширүүн зан ааштай, хэрцгий талдаа хүн болж өсөх тохиолдол байдаг. Гэхдээ миний дүрийн хувьд үүнээс эсрэгээрээ сурлага сайтай, хүмүүжилтэй, зөөлөн сэтгэлтэй. Нийгмийн амьдралд асран хамгаалах хүнгүй, хэнийг ч танихгүй тэр хүү хэрхэн хөл тавьж, яаж амьдрахыг киноноос дэлгэрэнгүй үзээрэй.

-Дүрийн судалгаа хэр хийв?

         -Манайх асрамжийн газартай ойрхон учраас тэднийг харж өссөн. Хажуугийнх нь тоглоомын талбайд тоглож байхад хашааны завсраар дуудна. “Тамхи авч ир. Ийм юм хий” гэнэ. Хэрвээ чамайг хийж өгөхгүй бол эндээс гараад ална гэж сүрдүүлнэ. Ер нь аав, ээжтэй хүүхдүүдийг үзэн ядах хандлагатай. Гэхдээ бүгд тийм биш. Оргил шиг хүүхдүүд ч бий.

Маргааш би эндээс гарна… гэхдээ намайг ямар амьдрал хүлээж байгааг төсөөлж ч чадахгүй байна... “ӨНЧИН” УСК

-Чиний хувьд “Сэр сэр салхи” кинонд тоглосноос хойш нэг хэсэг чимээгүй байлаа.  Сургуульд сурсан уу?

        - Найруулагч П.Лхагвадулам эгч маань тухайн үед надад өөрийнхөөрөө тоглох боломж олгосонд талархаж явдаг. Жүжигчний гарааг минь сайн тавьж өгсөн. Арван жилээ төгсөхөд СУИС болон БНСУ-ын Урлагийн академиас суралцах санал ирсэн. БНСУ-ыг сонгож суралцаад ирсэн.

-Монголдоо анхдагч гэгдэх хоёр олон улсын шагналыг хүртсэн шүү дээ. Тухайн үед сэтгэгдэл ямар байв?

                -Шагналаа авах гээд очиход гадны иргэд хүндэтгэж, зургаа даруулсан. Ур чадварыг минь үнэлсэн. Тухайн үедээ би анхны шагналыг нь хүртсэн шүү дээ гэж эгогоо тэжээмээр байсан. Гэвч эх орондоо ирэхэд энэ шагнал үнэ цэнгүй мэт санагдаж байсан. “Азаар авсан. Авьяастай биш” гэх мэтээр хүмүүс хүлээж авсан. Тухайн үедээ гомдсон. Гэхдээ дэлхийн уран бүтээлчид, Монголын урлагийнхан сайхнаар хүлээж авч, хүлээн зөвшөөрсөн нь хангалттай гэж бодох болсон.

-Жүжигчний хажуугаар өөр ажил эрхэлж байна уу?

                -Гаднын оронд жүжигчин мэргэжлээрээ ажиллаад хангалттай сайхан амьдрах боломжтой байдаг. Харин манайд зах зээл бага учраас боломжгүй. Тиймээс маркентгаар ажиллаж эхэлсэн. Мөн портер машинаараа кино зураг авалт бусад зүйлд ачаа зөөж байна. Би урлагийн хүн гээд ажил голоод суугаад байж болохгүй. Хийж чадах бүхнээ л хийнэ.

-Бага нас хэрхэн өнгөрсөн бэ?

                -Би айлын том хүү. Нэг охин дүүтэй. Гэр хороололд үеэлүүдтэйгээ эмээ, өвөө дээрээ өссөн. Гэр хорооллын хүүхдүүдийн л адил ус зөөж, түлээ, нүүрсээ бэлдэж өссөн дөө. Тэд маань хайрлах үедээ хайрлаж, хатуу байхдаа хатуу байж хэрсүү болгож өсгөсөн. Ер нь багаас минь хөдөлмөрт сургасан. Өсвөр наснаасаа эхлэн зөөгч, барилгын туслах зэрэг ажил хийж эхэлсэн.

-Цаашдаа жүжигчнээрээ ажиллах уу?

          -Мэргэжлээ дээшлүүлж АНУ-д суралцахыг хүсдэг. Хүүхэд байхаас л мөрөөдсөн. Гэхдээ одоогоор боломжгүй учир эх орондоо ажиллаж, суралцана.