Түүнийг бид “Зэрлэг цэцэгсийн хүлэмж” киноны Чингисийн дүрээс нь эхлэн мэдэх болсон билээ. Аав нь зураглаач болохоор багаасаа л тэр урлагийн хүн болох хүсэлтэй хүү байж. Энэ тухай “Манай аав зураач, кино зураглаач, ер нь л зураачтай холбоотой мэргэжил. Зүгээр энгийн зураглаач биш, кино зураглаач гэдэг найруулагчийн хүсэж байгаа өнцөг, өнгө төрхийг уран зураг шиг харагдуулахын тулд ажилладаг.

Багаасаа л надад "Би урлагийн хүн болох ёстой" гэсэн бодол төрдөг байлаа. Тэгээд урлагийн хүн гэхээр жүжигчин гэдэг үг л орж ирдэг. Арван жилээ төгсөөд ганцхан сургуульд шалгалт өгсөн нь Кино урлагийн дээд сургууль байсан, тэр сургуульдаа ч тэнцсэн. "Зэрлэг цэцэгсийн хүлэмж" кинонд тоглосны дараа өөр хэд хэдэн кинонд тоглосон. Зарим зүйлээс шалтгаалж "Би жүжигчин болж бол чадахгүй юм байна" гэж санагдаж эхэлсэн. Тэгж санагдсан учир нь би өөрөө үнэхээр дуртай байсан бол юу ч хамаагүй хийгээд явах л байсан. Кинонд тоглох санал ирсэн ч тогломооргүй санагдана гэдэг чинь дүр бүтээх нь миний хийх ажил биш гэсэн үг шүү дээ. Би олон ажил хийсэн, Юнител группт менежер, төрийн албанд хүртэл ажилласан. Тэгж байгаад түрүү жилээс кино урлагтаа зураглаачаар ирсэн гэх үү дээ. "Тал нутгийн зомби" кинонд нэг найз минь ажиллаж байгаад, хамтрах санал  тавьж, тус кинонд хоёрдугаар найруулагчаар ажилласан. Дараа нь их сургуулийн найзтайгаа "Молко" киноны зураглаачаар ажиллалаа. Тэндээс “Би зураг авах ёстой юм байна. Миний чадах зүйл, дуртай зүйл зураг, зураглал юм байна”гэж ойлгож, мэдэрсэн” гэж ярьсан байдаг.

     Харин анхны дүр болох “Зэрлэг цэцэгсийн хүлэмж” кинонд тоглох болсон нь хоёрдугаар курсдээ гэнэ. Кино урлагийн дээд сургуульд тухайн үед урлагийн наадам болж, МУГЖ Д.Ганцэцэг эгч шүүгчээр ажиллаж байж. Тэгэхэд түүнд дүрийн сонгон шалгаруулалтад орох санал тавьж байсан нь Чингисийн дүр байна. “Тэр шалгаруулалтад тэнцээд "Зэрлэг цэцэгсийн хүлэмж" кинондоо тоглоод, нэг сая төгрөгийн цалин авч байлаа. Тэр үед чинь дотроо “Хөөх, ямар их мөнгө вэ” гэж бодоод, ямар их догдолж байсан гээч. Кино маань дараа жилийнх нь есдүгээр сард нээлтээ хийж, олон хүнд хүрсэн” гэжээ.

    Тэрбээр “Атганд үлдсэн эрдэнэ”, “Мөрч”, “Орь дуу”, “Ирээдүйгээс ирсэн зочид”, “Өнчин”, “Ацаахийморь” тэргүүтэй кинонд тоглосон. Үзэх бүрд л шинэлэг, сонирхолтой дүртэй нь тэр мөн бөгөөд үзэгчдийн сэтгэлд ч мартагдашгүй байдаг. Цөөнгүй ярилцлагадаа тэр дүр бүтээхээс илүү зураглаачийн ажилд сонирхолтой гэдгээ онцолсон байдаг. Түүний дүрүүдээс “Мөрч” киноны дөрвөн хүүхдийн аав, ноёны туслах Нанзадын дүрийг онцлох нь зүйтэй байх. Яах аргагүй киноны сонирхолтой, содон, баялаг, өнгөтэй дүрийн нэг. Үзэгчид ч түүнийг гол хэрэгтэн байж мэднэ гэж таамаглаж байсан. Ийнхүү өвөрмөц, сонин дүрийн эзэн тэр одоо үзэгчидтэйгээ “Өнчин” киноны Хангайгийн дүрээр уулзаж байна. Хангай хэн байсныг үзэгчид аяндаа илэрхийлэх биз ээ. Түүнд уран бүтээлийн өндөр амжилт хүсье.