Түүнийг бид “Нэг талын тасалбар”, “Тэгри чину”, “Ар хөвч”, “Сэр сэр салхи”, “Зүрхэн зүг”, “Ээж”, “Ацаахийморь”, “Шинжээч” зэрэг киноны гол болон туслах дүрийг бүтээснээр нь мэдэх билээ.  Тэр дундаа “Ацаахийморь” киноны хошууч Мөнх-Аз бол ажил мэргэжилдээ гарамгай, чадварлаг, эр зоригтой нэгэн. Ерөөс гярхай, хянуур цагдаагийн дүр түүнд тун зохих аж.

    Харин эдгээр өдрүүдэд тэр бидэнтэй “Шинжээч” киноны Гэрэлээ эмчийн дүрээр уулзаж буй. Мөн л мэргэжилдээ мэргэшсэн, туршлагатай, нухацтай нэгэн. Тэр цогцсыг бүрэн дүүрэн шинжилж дуустлаа, өөрийн шинжилгээний дүгнэлтийг баттай болготлоо огтоос алдахгүй, зөрүүлэхгүй ажилладаг нэгэн. Түүний зөв онош, оновчтой дүгнэлтээр хоёр ч том хэрэг илрэхэд гол дөхөм болсон. Тэгэхээр шинжээч хүн хэрхэн нарийн ажиллаж, шинжилж, хэрэг илрүүлэхэд ямар гол нөлөө тусгал үзүүлдгийг эл кино, түүний дүрээс харж болох юм. Жүжигчин Ч.Булганыг бид дуу оруулагч гэдгээр нь бүтээсэн дүрүүдээс нь илүүтэй мэдэх болов уу.

      Тэрбээр “Орчуулгын кинонд оюутан байхаасаа ажиллаж эхэлсэн. Анх дуу оруулж ирэхэд чадахгүйн бэрхшээлүүд их гарсан. Гэхдээ дуртай ажил болохоор сурах, хөгжих хүсэл их байсан. 2015 оноос Хятадын орчуулгын жүжигчнээр ажиллаж байна. Одоогоор 5000 гаруй ангид ам барьж, дуу оруулсан байна” гэж ярьсан байдаг.  Түүнчлэн түүний бүтээсэн дүрээс Б.Тамир найруулагчийн “Тусгаар тогтнол” киноны Цыси хатны дүрийг нь онцлохгүй өнгөрч болохгүй. Энэ тухай өөрөө ч “Би түүхэн кинонд дуртай. Жүжигчнээс уран чадвар шаардсан, тоглолт ихтэй түүхэн дүр дээр тоглох юм сан гэж боддог.  

      Тэр ч үүднээс “Тусгаар тогтнол” кинонд би Манжийн хатан Цыси буюу өөрөөсөө 40 насаар ахмад хүний дүрд тоглосон” гэжээ. Ингээд найруулагчаас оноосон дүр бүрээ тод томруун, үзэгчдэд хүргэж бүтээдэг түүнд уран бүтээлийн өндөр амжилт хүсье. Цагдаа, шинжээч эмчийнх нь дүр бол үнэхээр онцгой, сонирхолтой, үзэхэд ч энэ төрлийн мэргэжилтэй болох хүмүүс урам зориг авам тийм дүрүүд болсныг онцлон хэлье. Гэрэлээ эмч олон ч хэргийг зөв шинжилгээ оношоороо илрүүлэхэд тусалж, харин Мөнх-Аз хошууч хотоос томилолт өвөртлөн Ацаахийморь суманд ирсэн хэргээ бүтээж, хэрэгтнийг барьна гэдэгт үзэгчид итгэн хүлээсээр байгаа.