Италийн тайзнаа Ж.Вердийн “Макбет”, “Травиатта”, “Трубадур”, “Аида” зэрэг дэлхийн том сонгодог дууриуд түүний хоолойгоор эгшиглэдэг.

      Дуурийн урлагийн нэгэн том уран бүтээлч, МУГЖ, Соёлын элч Э.Анхбаярыг бид энэ удаад соёл урлагийн буландаа онцолж байна. Тэрбээр МУГЖ Ө.Уянга, СТА С.Бат-Эрдэнэ нартай хамтарсан “Арвайн тал” тоглолтоо маргааш төрөлх нутаг Өвөрхангай аймагтаа хүргэх гэж байгаа юм байна. Ингээд түүний тухай уншигч танд хүргэж байна.

      
     Өвөрхангай аймгийн уугуул тэрбээр багаасаа л дуулах дуртай, дуулдаг хүү байсан тухайгаа өөрөө ч онцлон ярьдаг. Мэдээж хүүхэд бүр л багадаа аль нэг урлагийн номерт оролцож, авьяас билгээ сорьдог ч бусдаасаа цойлж, бүр нэг дурлан татагдаж, түүгээр гэрэлтэн тодордог нь ховор. Э.Анхбаярын дуулах авьяас үндсэндээ дөрөвдүгээр ангидаа орсон“Улаан бүч” чуулгын шалгалтаар илүүтэй илэрчээ. Тэрбээр “Тэр шалгалтад тэнцээд би гоцлол дуучин болж байсан. Гадаад руу явахдаа өөрийгөө дуучин болчихсон юм шиг санаж, гадаад орныг биширч байсан. Одоо дэлхийн хэмжээний том тайзан дээр аав, эх орноороо овоглож дуулах сайхан байдаг. Энэ бол миний бахархал. Гэхдээ Монголоос минь илүү нутаг, монгол сонсогч, үзэгчдээс илүү үзэгч гэж байхгүй юм шиг санагддаг даа” гэж омогшин ярьсан байдаг.

      Мэдээж хүний амьдрал, хүсэл мөрөөдөлдөө хүрэх зам цэлгэр, уудам, ямар ч саад бартаагүй биш. Мөрөөдөл рүүгээ тэмүүлэх тусам сорилт бэрхшээлийн чулууг өрсөн байх бөгөөд тэр бүхнийг хүн өөрөө хичээл зүтгэл, итгэл сэтгэлээрээ холдуулж гэмээнэ сая амжилтын гэрлээс атгадаг шүү дээ. Э.Анхбаяр хүү ч мөн л тэр л замаар өөрийгөө хөгжүүлж, боломж бүрийг харж, шантралгүй зүтгэсээр өнөөдөрт хүрчээ. Сургуульд байхдаа аавтайгаа микронд кондуктор хийдэг байж. Оюутан болоод ямар л уралдаан, тэмцээн, өөрийгөө нээж, өсгөх, харуулах, улам дээш шат ахих юу л байна цөмд нь өөрийгөө дайчилж, зүтгэсний нэгэн жишээ нь хоёрдугаар дамжааны оюутан байхдаа “Universe Best Songs” тэмцээнд оролцож шилдэг 15 оролцогчийн нэг болж байсан нь.

     Энэ тухай “Тэр үеэс хүмүүс намайг таньдаг болсон. Тэгээд кондуктор хийх боломжгүй болсон. Хүмүүс таниад эхлэхээр кондуктор хийхээсээ ичсэн гэх юм уу даа. Мөн хичээлийн хэрэгсэл зардаг байлаа. Тухайн үедээ өөрийнхөө хэмжээнд хөдөлмөрлөдөг байсан санагдаж байна. Одоо энэ дурсамжууд л сайхан санагддаг. Хүүхэд байхдаа ичдэг, санаа зовдог, шантардаг байсан байх” гэжээ. Тэгсэн ч мөрөөдлөөсөө, амжилтанд хүрнэ гэсэн итгэлээсээ алхам ч ухраагүй явсаар дуурьтай нөхөрлөж, сонгодог урлаг хэмээх том сүр хүч, далбаан дор өөрийгөө өндөр хэмжээнд бэлдэж, тив, дэлхийн улсын тайзнаа гарч, хол замыг туулж яваа. Тиймдээ ч сургуулиа төгсөөд 10 гаруй жил болсноос хойш дэлхийн хэмжээний бүх тэмцээнд оролцож, 80 хувьд нь шагнал авсан амжилт түүнийх.

      Өдгөө дуурийн өлгий Италид дуулж байгаа. Түүний томоохон амжилтуудаас дурдвал,  ОХУ-ын Владивосток хотноо болсон дуурийн залуу дуучдын уралдаанд хоёрдугаар байр, Улаан-Үд хотноо зохиосон ЗХУ-ын Ардын жүжигчин Л.Линховоин нэрэмжит дуурийн дуулаачдын уралдааны "Лучший голос" болон тэргүүн дээд "Гран при" шагналыг хүртэж байжээ. Мөн ОХУ-ын алдарт хөгжмийн зохиолч М.Глинкийн нэрэмжит дуурийн дуулаачдын уралдааны дэд байр, Казахстаны алдарт дуучин Бибигуль Тулегеновагийн нэрэмжит уралдаан, Унгарын алдарт дуучин Эва Мартоны нэрэмжит уралдаанд тус бүр тэргүүн шагнал хүртжээ. Түүнчлэн Төрийн хошой шагналт, Ардын жүжигчин Б.Дамдинсүрэнгийн нэрэмжит "Учиртай гурван толгой" дуурийн шилдэг дүрийн улсын уралдаанд Юндэнгийн дүрээр оролцон дэд байрын шагнал хүртэж, ОХУ-ын Санкт-Петербург хотноо зохион байгуулсан сонгодог урлагийн “Олимп” гэгдэх П.И.Чайковскийн нэрэмжит олон улсын XVI уралдаанд амжилттай оролцож, гоцлол дууны төрөлд эх орныхоо нэрийг гарган IV байрын шагналыг хүртсэн гэхчлэн амжилтын тухай мэдээ нь ар араасаа хөвөрнө.