Одохуй

    Цэл залуухан ханиа, жаахан хүүгээ орхиод, хэвлийдээ бойжиж буй охинтойгоо ч уулзаж амжилгүйгээр тэр даанч эрт буцчихлаа. Тайз, дэлгэцнээ дахиад ч олон дүр амилуулах байлаа. Үргэлж л сайхнаар инээмсэглэж, дүү нараа ах шиг түшиж, анд нөхөддөө анд шиг анд байж, алив бүхэнд зөөлөн зангаар, хайр энэрэл дүүрэн оршиж байсныг нь цөм л харуусан ярьж байна. Бусдыг хайрлан амьдарчээ. Хайрласан болохоор л тэр хайрласан бүхнийхээ сэтгэлд үүрд мөнх орших юм байна.

      “Гацуурхан” хүүхэд, залуучуудын театраас уран бүтээлийн гараагаа эхэлсэн тэрээр 2013-2023 он хүртэл Улсын драмын эрдмийн театрт жүжигчнээр ажиллаж, олон сайхан дүр бүтээснийг нь үзэгчид андахгүй мэдэх билээ. Тэдгээрээс онцлон дурдвал, Б.Лхагвасүрэн агсны  “Үгүйлэгдсэн хайр” жүжгийн Отгоолой, Л.Флеччерийн “Уучлаарай та дугаар андуурч” жүжгийн туслах найруулагч, туслах дүр, Уильям Шекспирийн “Ромео, Жульетта ” жүжгийн Бенволио, Лев Толстойн “Адууны түүх” -ийн Холстомер, Б.Цогнэмэхийн “Тэнгэрийн хүү” жүжгийн Аравтын баатар, Г.Ибсений “Нора” жүжгийн зарц, А.Шартолгойн “Саран хөхөө” жүжгийн Баруун хаалгач, М.Сервантесийн “Кихот ноён” жүжгийн Ноён, Софоклын “Эдип хаан”-ы харуул, Д.Намдагийн “Оролмаа эх” жүжгийн Санж, Я.Баяраа, Б.Хишигзаяа нарын “Царцаа Намжил” жүжгийн Намжил зэрэг бүтээлийн гол болон туслах дүрийг чадварлаг бүтээжээ.

 

     Мэдээж “Босго тотго”, “Тэрбумын хэрэг”, “Маш нууц-1”, “Аав”, “Застав”, “Бараг л аймшгийн кино”, “No rules-3”, “Чан Аны Литчи” тэргүүтэй дэлгэцнээ бүтээсэн дүрүүдийг нь ч энд дурдахгүй өнгөрөх аргагүй.