Э.Батхүү жүжигчний бүтээсэн дүрүүд өвөрмөц, сонирхолтой, тухайн уран бүтээлийн чимэг байдаг. “Би чамд хайртай” кинонд гэхэд багахан хэсэгт гардаг хэрнээ хүмүүст инээд бэлэглэж, одоо ч санахад “Согтуу хүнд үйлчилдэггүй” гэж хэл муутайхан хэлэх таксины жолоочийн дүр нь мартагддаггүй. Тэгээд л өөртэйгээ адил таксины жолоочдыг дуудчихаад, “Наад нэг юм чинь мөнгөө өгөхгүй заваарч байна” гэдэг дээ. Энэ мэтээр хөгжилтэй, содон дүрүүд түүнийх байдаг.

      “Татар ажиллагаа”, “Тусгай ажиллагаа”, “Эр хүн болгож өгөөч”, “Том толгойтын романс”, “Биелэгдэшгүй төлөвлөгөө”, “Амьдралоги”, “Бумеранг”, “Толбо”, “Өндгөн толгойт”, “Карантинд 21 хоног”, “Төлөөс”, “Гайхамшигт ертөнц”, “Гэрэлт ертөнц”, “Гадны нөлөөгүй”, “Монгол bro”, “Шувуун хээр”, “Жаргаж үзээгүй нар”, “Зуун гулууз”, “Алтан хүргэн” гээд тоглосон бүтээлүүд нь хөвөрнө. Эдгээрэс “Татар ажиллагаа” киноны Колягийн дүрийг нь онцлохгүй өнгөрч болохгүй байх. Сайн хамтрагч, итгэлт нөхрийн дүр.  “Том толгойтын романс” киноны туслахын дүр нь байна. “Шинжилгээний хүрээлэнгийн ахлах дэслэгч Тодбаяр. Марш тактикийн уралдааны 2014, 2015 оны аварга” гэж өөрийгөө танилцуулдаг даа. Ийнхүү хөгжөөнтэй, шигтгээ дүрийг тэр оролцсон кино бүрдээ урлаж байдаг.

     Тэрбээр “Анх 2003 онд "Мөрөөдлийн театр"-ын Г.Эрхэмбаяр, жүжигчин Р.Анхням нартай хамтарч "Сүүлчийн хөхөөн дуу" нэртэй уран сайхны киноны гол дүрд тоглосон. Гэхдээ тэр кино нэг их гараагүй юм. Дараа нь "Би чамд хайртай 2" киноны туслах дүрд тоглосон. Хамгийн сүүлд "Татар ажиллагаа" киноны Колягийн дүрд тоглолоо. Би 2003 оноос хойш "Hero Entertainment "-тай хамтарч ажиллаж байгаа. "Драмын дөрвөл", "Hero Entertainment"-aap клип хийлгэж байх үед бид танилцсан юм. Бид онигоо ярьж байгаад намайг Коля гээд хочилчихсон юм. Тэр үед "Татар ажиллагаа" киноны зохиол гарчихсан байсан. Кинонд тоглох санал тавиад намайг Коля хочоор нэрлэсэн юм” хэмээн ярьсан байдаг.

       Тэр 1998 онд Улаанбаатар хотоос Багануур дүүрэгт шилжин очиж, аравдугаар ангиа төгсжээ. Энэ тухай”Тэнд шилжин очдог жил, сургуулийн урлагийн үзлэг боллоо. Тэгээд ангийн багш "Чи хотоос ирсэн юм чинь ангийн урлагийн үзлэгийг зохион байгуул" гэсэн юм. Тэр үед би урлаг уран сайхны тухай юу ч мэдэхгүй хүүхэд ангийнхныгаа нааш, цааш болгож байгаад тэр жил түрүүлсэн. Манай анги урьд нь хэзээ ч түрүүлж байгаагүй юм билээ. Тэгээд багш нар намайг магтаж, хотоос ирсэн хүүхэд гээд их хөөргөж билээ. Тэгээд дараа нь дөрөвдүгээр сарын 1-ээр "Инээцгээе хүмүүсээ" нэртэй байгууллагуудын дунд уралдаан зарласан юм. Тэр уралдаанд би сургуулийн багш нараа төлөөлөн баг бүрдүүлж оролцоод 10 гаруй байгууллага дундаас түрүүлсэн юм. Тэгсэн чинь Багануур дүүргийн "Ноён" телевизээс манайд ажиллаач гэсэн санал ирж тэнд хөтлөгч, найруулагч хийж байгаад урлагийн хүн болохоор шийдсэн юм” гэж урлагтаа холбогдох болсон түүхээ өгүүлсэн байдаг. Гол ташуур нь ерөөсөө л урам байж. Урлагийн үзлэг, уралдаан тэмцээнд орж амжилт гаргаж, түүнээсээ урам авсаар л нэг мэдэхэд жүжигчин гэх мэргэжлийг эзэмшиж, олон сайхан дүрийн эзэн болсон байна.  Хошин урлагийн “Шинэ үе” продакшнаас эхэлсэн тэрбээр драмын урлагт ч тэр сонирхолтой юм билээ. 

   Хөгжилтэй, эерэг зөөлөн, тусч, энэрэнгүй сэтгэлээр баялаг дүрүүд нь үзэгчдийн сэтгэлд хоногшиж, амттай, чанартай туслах дүр байдаг гэдгийг нь онцлон хэлмээр байна. Сайн туслах дүр заримдаа гол дүрээсээ ч илүү үзэгчдийн сэтгэлийг татаж, "Энэ уран бүтээлч тэр киноны хэсэгт гардаг" гэж мартагдахгүйгээр дүрээ гаргана гэдэг уран бүтээлч бүрд байдаг зүйл биш. Энгийн, эгэл боргил хүмүүний амьдралд өөрсдийн амьдран буй газартаа содон сонин дүр болчихсон, аль нэгэн хочны эзэн болсон улс зөндөө. Тэдгээрийг тэр чигээр нь дэлгэцнээ үзүүлж, дэлгэнэ гэдэг л сайхан. Хүмүүс "Говийн зэрэглээ" кинонд Г.Доржсамбуу гуайн бүтээсэн Арслангийн дүрд хайртай байдаг шиг Э.Батхүүгийн тийм нэг зурвасхан хэсэг дээр тодхон үлдчихдэг дүрүүдэд их ч дуртай. Түүний дүрүүд ерөөсөө Арслан л гэсэн үг.