Түмэн тэргүүтэй олон сайхан дүрийг бүтээх гэж эл эрхэм Армийн театраас уран бүтээлийн гараагаа эхэлсэн юм билээ. Мэдээж өөрөө дэлгэцнээ тийм, тийм дүрүүд бүтээнэ гэж мэдэхгүй, бүр бодоо ч үгүй л яваа шүү дээ, хүний бага нас гэдэг. Сумын төвийн буйдхан, нам гүм, гэхдээ дурсамж дурдатгалын хамгийн том орон зайд ээж, эгч, дүү нартайгаа аавыгаа үгүйлж, хүн санахын их хүндийг гүнээр мэдэрч байгаад дараа нь ээж нь аймгийн төв рүү тэднийгээ аван нүүжээ. Дараа нь хот руу мөн шилжицгээсэн. Ээжийн ийм зоригт нүүдлүүд л М.Дорждагва гэх хүүгээ урлагт хөтөлсөн мэт.
 

     Тэрбээр ээжийнхээ тухай “Миний ээж ямар ч эр хүнээс илүү эрэмгий, дайчин хөдөлмөрч эмэгтэй. Өглөө ажилдаа явна, орой ирээд дээл эсгээд сууж байдаг. Өглөө сэрэхэд дээлээ оёод дууссан эвхээд аваад гардаг байлаа. Ийм л ажилсаг бахархмаар ээж дээ” хэмээн ярьсан байдаг. Ингээд хүү өсөж цэрэгт мордлоо. Хилийн цэргийн 019 дүгээр ангид цэргийн хөгжимчин боллоо. Багаас хөгжимд дуртай, ямар ч хөгжмийн арга эвийг олоод тоглочихдог байсан болохоор энд тэр ингэж тодорч буй нь тэр л дээ. Тромбон, труба үлээнэ. Хилийн ангиудаар явж тоглоно. Дуу хуур, аялгуу эгшгээр дүүрэн он жилүүд цэрэгт өнгөрлөө.

      1986 онд Армийн театр байгуулахад дагалдан жүжигчнээр ажиллажээ. Энд түүнийг Ардын жүжигчин Б.Мөнхдорж, Урлагийн гаььяат зүтгэлтэн Б.Баатар нар тосон авч, дүр бүтээх, дүрд амьдрах их эрдмийг заажээ. Кино, жүжгийн оргилуудтай ч энэ л театр учирсан нь Гавьяат жүжигчин Б.Тунгалаг, ЛЧаминчулуун,  Д.Жагдаг, Б.Баатархүү, талийгаач Я.Оюунцэцэг, Б.Нармандах байна. Тэднээс жилийн дараа У.Батбаатар, Г.Золбоот жүжигчид  сургуулиа төгсөөд ирсэн байна. Тэрбээр “Ардын жүжигчин Б.Мөнхдорж, Урлагийн гавьяат зүтгэлтэн Б.Баатар хоёр намайг театрт мэргэжлийн жүжигчин болоход урам хайрлаж, сайхан дүрүүдийг өгч байлаа. Олон сайхан жүжигчдийн дундаас Б.Баатар найруулагч намайг тоож, “Чи чадна” гэж итгэж, “Цэргүүд” жүжгийн Сергей Буштецийн дүрийг өгсөн. Дараа нь “Эзоп” жүжигт эзэндээ үнэнч, үргэлж ёгт утгаар ярьдаг, харахад энгийн нэгэн боловч мундаг сурган хүмүүжүүлэгч, гэгээрсэн, хар арьст боолын дүрд тоглож, мэргэжлийн олон хүнээс өндөр үнэлгээ авсан” хэмээсэн.