Бид энэ удаагийн “Уран бүтээлчийн цаг” буландаа “MXrningstar” хамтлагийн дуучин Б.Аззаяаг онцолж байна.

           Тэрбээр 2002 оны хоёрдугаар сарын 27-нд төржээ. Хүүхэд насных нь зургаан жил Говьсүмбэр аймагт өнгөрч, түүнээс хойш Улаанбаатар хотын иргэн болсон гэдэг. Бага байхаасаа л дуу хөгжимд хайртай, уран зураг зурах дуртай, хөлбөмбөгийн талбайд цагийг өнгөрөөдөг байсан. Харин  17 нас хүрэхдээ үг холбож, аялгуу хөглөж эхэлжээ. Магадгүй түүний багаас хайрлаж ирсэн уран зураг, гоо зүйн мэдрэмж нь хожим хөгжмийнх нь "өнгө"-ийг тодорхойлсон биз ээ.

       Б.Аззаяаг залуус “Morningstar” гэх нэрээр нь илүүтэй мэднэ. Энэ нэрээ "Ертөнцийн ханхүү" хэмээн тайлбарладаг нь түүний өөрийн гэсэн хөгжмийн "хаант улс"-ыг байгуулах мөрөөдөлтэй нь холбоотой. Түүний анхны уран бүтээл болох “Pluto Planet” дуу нь анх “Азаа” нэртэй байсан бөгөөд 2019 онд цацагдсан. “Pluto Planet” дууныхаа шүлэг, аялгууг гаргачихаад таньдаг хүндээ үзүүлснээр Man On The Moon-тэй танилцаж, анхны дуугаа бичүүлж байсан түүхтэй. Энэ дуу гарсан даруйдаа хит болж, залуусын аялах дуртай дуунуудын нэг болсон юм. Ингэж тэр

“…Харанхуй бодлууд бүгд хийсээд

Хаа сайгүй түгэн одлоо

Хэзээ ч дахиж бодогдохгүйгээр алсын алсад хаян одлоо

Амар амгалангийн ертөнцөд амьдармаар байна

Ахиж эргэж харахгүйгээр тайван амьсгалмаар байна

Үүлэн чөлөөний наранг үүрд мөнхөд хармаар байна

Үсэг нийлүүлж сурсан насандаа эргэж очмоор байна… гэж дуулсаар 18 настай хүү  урлагийн хаалгыг зөөлхөн тогшиж бус, "өшиглөж" орж ирсэн. Тэрбээр анхны дууныхаа талаар хэвлэлд өгсөн ярилцлагадаа. “Төгсөх ангид орох үед надад хамгийн таалагддаг хичээл уран зохиол, монгол хэлний хичээл байсан. Хэдий эсээ их бичдэг байсан ч, тэрийгээ тухайн үедээ нэг их ойлгож байгаагүй. Дараа нь нэг ая аваад шүлэг бичээд, дуулаад үзсэн чинь болохоор байсан тул дууны шүлэг бичиж эхэлсэн юм. Анх Pluto Planet дууны шүлгийг хийгээд аялгууг нь гаргачхаад таньдаг хүндээ үзүүлсэн чинь намайг Man On The Moon ахтай танилцуулж, миний анхны дууны хоолойг бичиж өгсөн. Дараа нь олон дуун дээр минь хамтарч ажилласан” хэмээжээ.

    Түүнийг тайзнаа гарахад үзэгчдийн дунд нам гүм ноёрхож, удалгүй огторгуйн мэт содон аялгуу эгшиглэж эхэлдэг. Тэр бол зүгээр нэг дуучин биш, өөрийнхөө бүтээсэн "өөр ертөнцийн" хөтөч гэдгийг “Night star”, “No Place To Find ft The C”, “Side effect ft The C”, “Бодлын гүнээс”, “Мэдэхгүй”, “Chihiro” зэрэг дуунуудаас нь харж болно.  Тайзан дээр үсэрч, цамцаа тайлж, нүдээ аниж дуулна. Ингэхдээ үзэгчдийг бүрэн хөгжим, мэдрэмжийн ертөнцдөө оруулдаг нь түүний давуу тал.

МӨРӨӨДӨЛДӨӨ ХҮРСЭН "MXRNINGSTAR" ХАМТЛАГИЙГ БАЙГУУЛАВ

   Дуу хөгжимтэй холбогдсон цагаасаа амьд хөгжмийн хамтлагтай болох хүсэлтэй байсан. Morningstar  зорилгодоо хүрч “MXrningstar” амьд хөгжмийн хамтлагаа байгуулсан юм. 2019 онд анх “Playtime” наадмыг үзээд төрсөн тэрхүү амьд мэдрэмж нь түүнийг хамтлаг байгуулах зорилгод хөтөлжээ. Тэрхүү зорилго нь 2023 онд биелэлээ олж, “MXrningstar” амьд хөгжмийн хамтлаг байгуулагдсан юм. Харин 2020 оны хавар хамтлагийн ахлагч Эрка тэднийг цуглуулж, тавуулаа нийлж бэлтгэл хийх болжээ. Хамтлаг анх байгуулагдахдаа гишүүн бүр тус тусын ажилтай байсан ч дуу хөгжмийг хоёрдугаарт тавихгүй гэсэн чин хүсэлдээ хөтлөгдөн бүгд ажлаасаа гарч, зүрх сэтгэлээ зориулахаар шийдсэн гэдэг.

     Тайзан дээр үзэгчдийг "огторгуйд аялуулж", өөрийгөө "хар хун" мэт мэдэрч дуулдаг тэрбээр одоо “MONADD” лэйбэлтэй хамтран уран бүтээлээ туурвиж байна. Сонсогчид түүнийг дуугаа мэдэрч, үг бүрээ бусдын зүрхэнд хүргэж байгаагаар нь бусдаас ялгаж, хайрцаглагдаагүй авьяасыг нь хүндэлдэг.

Өнгөрсөн жил МУГЖ Т.Ариунаатай хамтран “Чамтай бас чамгүй” дууг шинэчлэн гаргасан.

“Тэвэр дүүрэн цэцэг өгч

Сэтгэл гаргах сайхан байдаг ч

Багадах биш үү

Тэнгисээр хамтдаа аялна гэж

Амлалт өгөх өчнөөн гайхам ч

Дутуу биш үү

Ойр байх гэж ядна аа

Хол байх гэж ядна аа… ” гэх түүний хэсэг, энэ дууны харизм нэг хэсэгтээ л сонсогчдыг байлдан дагуулсан.