ЭСРЭГ ДҮР НЬ ИЛҮҮ ЗОХИДОГ Х.ЦАСЧИХЭР

Д. Бямбасүрэн:
Соёл урлаг

2026-04-16, 393

Эдгээр өдрүүдэд тэр “Яруу арт” продакшны “Амьдралд хайртай” киноны Баатарын дүрээр үзэгчидтэйгээ уулзаж байна.

Баатар байгаагүй бол Сараа магад ухаарахгүй байсан. Хань гэдэг амьдралын алдаа, оноо, жаргал, зовлонгийн алинд ч хувирахгүйгээр хамт байхыг, бүр зарим тохиолдолд ухааруулж, сэхээрүүлж, ойлгуулагч нэгэн гэдгийг жүжигчин Х.Цасчихэрийн бүтээсэн “Амьдралд хайртай” киноны Баатарын дүр бидэнд харуулж чадсан байна лээ.

Тэрбээр хошин урлагийн “Маск” продакшнаас уран бүтээлийн гараагаа эхэлж, өөрөө мөн жүжигчин Э.Тодгэрэлтэй хамтран продакшн байгуулж, "GHOST" уран сайхны кино, “Чи надад хайртай” жүжгийг үзэгчдэд толилуулсан хийсэн билээ. Түүнчлэн “Соёлын довтолгоо” “In da house”, “Гэрэл”, “Алдарт ээжүүдийн ажил хаялт”, “Ээж”, “Маралгоо”, “Чи өөрөө хайр”, “Тойрог”, “Андгай”, “Халуун бороо” зэрэг кинонд гол болон туслах дүрийг чадварлаг бүтээсэн. Түүний дүрүүдийн тухай хүргэе.

Тайз

“Маск” продакшны ухаарал, уучлал дүүрэн тоглолтуудад түүний бүтээсэн дурлалт залуу, дуу аялсан нэгэн, итгэлт ах, түшигт андын эерэг гэгээн, хайр түгээсэн дүрүүд бий. Үзэгчид түүнтэй хошин урлагийн дүрүүдээр нь танилцаж, дараа нь драмын жүжиг, дэлгэцийн дүрийг нь ч сонирхон үзэх болсон.

“ГЭМ ЗЭМ” ЖҮЖГИЙН ЗОСИМОВ ЭМЧ

“Гэм зэм” жүжгийн сэтгэцийн эмч Зосимовыг Х.Цасчихэр жүжигчин бүтээнэ гэхэд төдийлөн гайхаж, нөгөө талаар хүлээлт дүүрэн байв. Яагаад чухам Раскольников, Соня, улсын яллагчийн дүр ч биш Зосимовыг тэгж онцгойлсон гэхээр энэ бол уран бүтээлчээс их чадвар шаардсан дүр гэдгийг зохиолыг нь уншиж байхад л мэдрэгддэг. Тэгвэл Х.Цасчихэр этгээд сонин, өөрөө ч сэтгэцийн асуудалтай байж болох Зосимов эмчийн дүрийг бүр тэгэхээс тэгтэл нь янзын бүтээж чадсан. Тэр хувцаслалт, нүүр будалт, улсын яллагчийн дуунаар нүүрний хувирал, хоолойны өнгө аясаа өөрчилж байгааг нь гээд Зосимов гэж ийм л нөхөр байх учиртай гэж баяр төртөл бүтээж чадсанд өнөө хэр баярладаг. Түүний бүтээсэн Зосимов энэ.

“ЧИ НАДАД ХАЙРТАЙ” ЖҮЖИГ

Жүжигчин Э.Тодгэрэлтэй хамтран “Реакшн” продакшныг байгуулж, Оросын нэрт зохиолч Красногоров В.С-ын "Дуулалт баатрын шунал тачаал" сонгодог мюзикл инээдмийн жүжгийг “Чи надад хайртай” нэртэйгээр тайзнаа амилуулсныг үзэгчид мэднэ байх. Хайрын үнэ цэн, үнэнч хайр сэтгэлийн дуулал энэхүү инээдмийн жүжиг нь одоогоос дөрвөн жилийн өмнө үзэгчдэд хүрсэн бөгөөд залуу уран бүтээлчдийн авьяас билгийг тод томруунаар харуулж байв. Энэ бол түүний уран бүтээлийн чухал нэгэн бүтээл.

Одоо харин киноны дүрүүд рүү нь орьё.

“Андгай” киноны Нарсуу

Түүнд эерэгээс эсрэг дүр нь илүү зохидог юм байна гэдгийг үзэгчид “Андгай” киноны Нарсуугийн дүрээс харсан байх. Хар тамхичин болоод найз нөхөд, хайртай бүсгүйгээ хүртэл танихын аргагүй хордож, живж, өөрийг нь ийм болгосон харгис нэгнээс ч харгис, зэвүүн гар болсон байдаг. Х.Цасчихэрийг тийм нэг муухай харцтай, хүйтэн хөндий дүрээр харах сонин мөртлөө жихүүцэм байв. Хүн хэрхэн өөрчлөгдөж, танигдахын аргагүй болдгийг, өнөөдөр хамгийн сайхан үгээ хэлж инээгээд гарсан хүн маргааш танихгүй нэгэн болж хувирдгийг түүний эл дүр тод харуулж байв.

Бусад дүр нь яг л “Соёлын довтолгоо” кинон дээр “Сайн байцгаана уу” гээд инээмсэглэн орж ирэх дүр шигээ эерэг гэгээн, гэрэл цацруулсан. Соёлгүй, бүдүүлэг, олон зүйлээс алс ахуйд соёлыг түгээх, өөрсдөөрөө үлгэрлэж буй нэгэн бол түүний эл бүтээлийн дүр. Мөн түүний бүтээсэн дүр дотроос эрэлхэг зоригтой гал сөнөөгчийн дүрийг ч онцлохгүй байх аргагүй. Ямагт халуун галтай улаан гараараа тулалдаж, өөрсдийгөө умартаж явдаг Онцгой байдлын албаныхны ажил, ахуйг гаргасан кино бол “Халуун бороо”. Энэ мэтээр олон сайхан дүр Х.Цасчихэрийнх.

Тэрбээр анх жүжигчин мэргэжлийг сонгох болсон тухайгаа “Анх дуучин болно гэж боддог, хүүхдийн ордны дууны дугуйланд явдаг байлаа. Өөрийгөө их гоё дуулдаг гэж боддог тэгээд дуулдаг, жүжиглэдэг хүн болно гэж төсөөлөөд жүжигчнээр шалгалт өгсөн ч тэнцэж чадаагүй. Тэгээд шантралгүй нэг жил бэлдэж байгаад дахин жүжигчний ангид шалгалт өгч тэнцсэн” гэж байв. Харин “Маск” продакшны гишүүн болсон тухай “Гуравдугаар ангийн оюутан байхдаа "Маск" продакшнд шалгалт өгч тайзны туслахаар орж байлаа. Жүжиг хоорондын тайзыг засаж, жижиг хэрэглэл бэлддэг байж байгаад бүжигчин болж, цаашлаад жүжгийн эхлэл төгсгөл дээрээ гардаг боллоо. Сургуулиа төгсөөд хоёр жилийн дараагаас тайзан дээр гарч хамт жүжиглэдэг болсон. Хамгийн анхны байгууллага минь намайг тэгж элгэмсэг, дотноор угтаж авсад баярлаж явдаг” гэсэн байдаг.

ЭСРЭГ ДҮР НЬ ИЛҮҮ ЗОХИДОГ Х.ЦАСЧИХЭР

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.