Бид энэ удаагийн “Залуус” буландаа “Зэв” филмын зохиолч, продюсер Х.Чойлхагвыг урьж, шинэ уран бүтээлийнх нь талаар цөөн хором ярилцсанаа хүргэж байна.

        “Зэв” филмын ээлжит уран бүтээл болох “Мад” уран сайхны кино энэ сарын 24-нд бүх кино театруудаар үзэгчдийн хүртээл болох гэж байна. Тэдний хувьд өмнө нь “Гэгээн учрал”, “Reaction production”-тай хамтран “GHOST”,  “Цасан ширхэг”, “17” продакштай хамтран “Орлон тоглогч” олон ангит кино, “Алдуул” уран сайхны киногоор үзэгчидтэйгээ уулзсан билээ.

-Сайн байна уу. Шинэхэн уран бүтээлээ нээх гэж буйд баяр хүргэе. Киноныхоо болон дүрийнхээ талаар ярьж өгөөч?

              -Сайн байна уу. “Зэв” филмын зохиолч, продюсер Х.Чойлхагва байна. “Мад” уран сайхны кино бичсэн анхны кино зохиол болохоор догдлол дүүрэн хүлээж байна. Үзэгчдээрээ дүнгээ тавиулах мөч уран бүтээлчдийн хувьд хамгийн сайхан цаг үе байдаг шүү дээ.

-"Мад" уск зураг авалтаа хийгээд бараг гурван жил болсон байна. Олон жил "дарсан" шалтгаан юу вэ?

              -Зураг авалтаа хийгээд бүх зүйл бэлэн болсон хэр нь нээгээгүй байсан шалтгаан нь сонирхолтой. Бид “Одоо нээе, энэ жил л нээе” гэхээр нэг л болж өгдөггүй байсан. Магадгүй цаг үе нь таарч өгөхгүй байсан байх. Аливаа зүйл өөрийн гэсэн цаг хугацаатай гэдэг шүү дээ. Бас кино маань өөрөө гарах тохиромжтой цагаа хүлээж байгаад үзэгчдийн хүртээл болохооо хүлээсэн байх.

-Яагаад “Мад” гэж нэрлэсэн юм бэ. Шатраар төлөөлүүлж, төсөөлсөн болов уу?

              -Манай киноны гол болон эсрэг дүрүүд хоорондоо тулаан гэхээсээ илүүтэй оюун санаагаараа тулалддаг юм. Нэгнийхээ эсрэг хийх үйлдэл бүрээ маш сайн төлөвлөж, тооцоолж эрх мэдлийн төлөөх нэг төрлийн оюуны тулаан хийдэг. Тийм болохоор шатрын спортод өрсөлдөгчөө мадлаж гарах гарцгүй болгож хождог шиг “МАД” гэж нэрлэсэн.

- Энэ кино өмнө “Зэв” продакшны хийж байсан бүтээлүүдээс юугаараа онцлог вэ, юуг харуулахыг зорив?

              -“Мад” уран сайхны кино “Зэв” филмын бүтээсэн уран бүтээлүүдээс бүх зүйлээрээ онцлог бүтээл болсон гэж би хувьдаа харж байгаа. Өнөөгийн нийгэмд манай залуусын нийгэмд оролцох оролцоо маш муу байгаа нь анзаарагдсан.  Тиймээс "МАД" киногоороо эх орноо хайрлаж, эзэн нь байгаарай гэж залууст хэлэхийг хүссэн. Бид үр хойчдоо эрүүл өсөх орчин, эрх тэгш амьдрах нийгмийг  өвлүүлэн үлдээх үүрэгтэй шүү дээ. Одоо энэ нийгмийнхээ төлөө шудрага бус байдлыг өөрчлөхгүй бол оройтно. Үүнийг манай кинонд өрнөх үйл явдлаас харж болно. Залуу уран бүтээлчдийн хувьд маш том сэдвийг зоригтойгоор барьж авсан.

-Кино зурагт авалт хаана хийгдсэн бэ?

              -Монголдоо бүх зураг авалтаа хийсэн. Гэхдээ кинонд энэ улсын энд тийм газар гэж гарахгүй. Бүх зураг авалтын орчин зураачийн гараар бүтсэн.

-Та кино зохиолчийн анги төгссөн үү?

              -Би 2015 онд Соёл Урлагийн Их Сургуулийг Соёлын удирлагын мэргэжлээр сурч төгссөн. Сургуулиа төгсөөд “Фантастик” продакшны “37-р точка” олон ангит уран сайхны киноны арын албанд туслахаар ажиллаж анхны киноны гараагаа тавьж байсан.  Тэр үед ах нараасаа их зүйл сурч, мэргэжилдээ илүү дурласан. Өнөөдрийг хүртэл хэлэх боломж гараагүй юм байна.  Энэ дашрамд “Фантастик” продакшны ах нартаа маш их баярлаж явдаг шүү гэж хэлье.  Бас тухайн үед киноныхон дундаа шүдэнз хочоороо алдартай байлаа. Мөн “17” продакштай хамтран “Орлон тоглогч” олон ангит киног бүтээхдээ Б.Амарсайхан ахаасаа маш их зүйл сурч мэдсэндээ талархаж явдаг.

-Урлагийн өөр салбарыг сонгож болох байсан шүү дээ. Юу нөлөөлсөн бэ?

              -Миний аав, ээж цэргийн хүмүүс байдаг. Тэднийг дагаад миний бага нас Өмнөговь аймгийн Хилийн 0166 дугаар цэргийн анги дээр өнгөрсөн дөө. Багадаа цэргийн дарга болж тоглох дуртай. Аавыгаа дагаад  цэргийн хурандаа болно гэж мөрөөддөг байлаа.  Гэтэл  2009 онд Монгол Улсын хилийг бүтэн тойрч байсан Монголын Үндэсний Олон Нийтийн Телевизмйн хамт олон “Босго тотго” кино зураг авалтаа Өмнөговь аймагт хийсэн юм. Кино зураг авалтын 14 хоногийн хугацаанд хамт байх боломж надад тохиосон юм. Тэр үеэс л кино урлагт дурлаж эхэлсэн дээ. Би ийм мэргэжилтэй болж болох юм байна гэсэн шинэ бодол, мөрөөдөлтэй болсон. Одоо зорьсондоо хүрч мөрөөдлөөрөө амьдарч байгаадаа баярлаж явдаг даа.

-Завгүй ажлынхаа үеэр цаг гаргасанд баярлалаа. Ярилцлагын төгсгөлд хэлэх үг байна уу?

              -Үзэгч, уншигч та бүхэн манай киног гэр бүл, найзуудаараа зорьж үзээрэй. Танд эх орон ямар үнэ цэнтэй, эрх тэгч байдал ямар чухал гэдгийг бага ч гэсэн ойлгуулах болно гэж хэлмээр байна.