“Амьдралд хайртай” хэмээх шинэхэн уран бүтээл энэ сарын 10-наас эхлэн бүх кино театрт нээх гэж байна. Архинд донтох, асуудалд нугарах гэхээр бид эрэгтэй хүн биз гэж эхлээд боддог. Гэтэл эмэгтэйчүүдийн тоо ч энэ хар дансыг нэмж байгаа нь харамсалтай. Хүнд боловч нийгэмд нүүрлээд буй эл бодит асуудлыг тус бүтээлд тодруулан харуулах болно.

            “Яруу арт” продакшны бүтээл энэхүү кинонд хүүхдээ алдсаны дараах сэтгэл гутралаа дийлээгүйн улмаас архийг сонгон амьдралаа алдахад хүрсэн нэгэн бүсгүйн түүхийг өгүүлнэ. Хагацал, гутралын араас амьдралд бууж өгсөн хүнийг хэрхэн эдгээх, тухайн үед хэн, юу хэлэх хэчнээн чухал байдгийг харуулсан эрэлхэг дүр ч энэ кинонд бас бий. Ямар ч гарцгүй болсон мэт хүнд мөчүүдэд хүн яаж босож, тэмцэх ёстойг, зам зуурын алдааг ухаанаар хэрхэн туулдгийг, амьдралд хайрлаж болох хором мөч хэчнээн олон байдгийг энэхүү кино үзэгчдэд харуулах нь дамжиггүй. Нөгөөтээгүүр, мэдээний эхэнд дурдсан айхавтар тоо баримтууд монголчуудын анхаарах ёстой сэдвүүдийн нэгд гарцаагүй багтана. Асуудлыг согтууруулах ундаа, хорт зуршлаар хэзээ ч даван туулдаггүй, харин ухаан, тэвчээр, хайраар даван гардгийг ойлгуулах зорилго агуулснаа уран бүтээлчид онцолж байлаа.

    МУСТА, жүжигчин Х.Цасчихэр, Г.Золзаяа, Г.Чулуунцэцэг, М.Саранцэцэг, Б.Батмэнд тэргүүтэй жүжигчид, 50 гаруй залуусын сэтгэл, зүтгэл, зорилго шингэсэн шинэхэн бүтээл ийнхүү үзэгчдийн хүртээл болоход бэлэн боллоо. Сүүлийн үед залуу уран бүтээлчид маань урлагаар дамжуулан нийгэм дэх асуудлыг шүүмжлэх, урьдчилан сэргийлэх сэдэл төрүүлэх, сэтгэл зүйг нь анагаах, мэдлэг, мэдээлэл түгээх зэргээр онцгой анхааран ажиллаж буйн нэг жишээ энэ юм. “Амьдралд хайртай” уран сайхны киног 4-р сарын 10-наас эхлэн бүх кино театраас хүлээн авч үзээрэй.