Энэ хаврын нээлтийн жүжгүүдийн нэг болох Ц.Балдорж агсны зохиол “Хориотой” жүжгийн Жавхаагийн дүр дээр ажиллаж буй жүжигчин Ц.Энхжинтэй завгүй бэлтгэлийнх нь үеэр цөөн хором ярилцсанаа хүргэж байна.

            Түүний хувьд Б.Отгонбат багшийн удирдлага дор 2018 онд Соёл Урлагийн Их Сургуулийг жүжигчин мэргэжлээр төгссөн. Сургуулиа төгсөөд удаагүй байхдаа “Сүүдэрт ургасан цэцэг”, “Нийслэл хүүхэн-2”, “Итгэл” зэрэг бүрэн хэмжээний кинонд гол болон туслах дүрийг бүтээж байсан туршлагатай. Харин сүүлийн жилүүдэд АНУ-д мэргэжлийн зэргээ дээшлүүлээд “Хориотой” жүжгээр эргэн ирж буй нь энэ юм.  

-Сайн байна уу. Юун түрүүнд урлагийн салбартаа эргэн ирсэнд баяр хүргэе. “Хориотой жүжиг” постдрамын тухай яриагаа эхлэх үү.  Энэ жүжиг жүжигчнээс багагүй чадвар шаардах байх.

            -Баярлалаа. Урлагаас хөндийрөөд багагүй хугацааг өнгөрүүлсэн. Би он гарахаас өмнө эх орондоо ирсэн. Ирээд П.Дэлгэрбаяр найруулагчийн “Орь дуу” богино хэмжээний кинонд дүр бүтээсэн. Найман жилийн өмнө дипломын жүжигтээ тоглож байсан. Эргээд ажиллахдаа тайзны уран бүтээлд дүр бүтээж байгаадаа талархаж байгаа. Бас догдолж, айж байна. Ер нь чадвар шаардсан сорилтуудтай нүүр тулж өөрийгөө шахаж ажиллаж байна даа. Соёлын гавьяат зүтгэлтэн, сэтгүүлч Ц.Балдоржийн “Хориотой” драмын жүжиг өнөөдрөөс 20 жилийн өмнө “Х ТҮЦ” продакшны тавилтаар үзэгчдийн хүртээл болж байсан.. Харин энэ удаа “Орфей” театрын найруулагч М.Батболд, “Xermel” багийнхан хамтарч ажиллаж байна. Бид илүү орчин үеийн болгож тайзнаа амилуулахаар зэхэж байгаа.

-Анхны тайзны уран бүтээл гэдэг утгаараа ихээхэн сорилттой нүүр тулж байгаа болов уу. Дүрийнхээ тухай болон тулгарч буй бэрхшээл, ололтынхоо тухай яриач.

            -Миний дүрийн хувьд айлгүй зантай, задгай сэтгэлгээтэй эмэгтэйн дүр байгаа. Харин би бол дүрээсээ тэс ондоо. Өөрөөсөө өөр хүнийг бүтээх нь жүжигчин хүний ажил гэхдээ үзэгчид шууд хүлээж авдаг талтай. Хөндийрсөн дээрээс нь анхны тайзны уран бүтээл болохоор асуудал гарч байгаа. Уншлагаас уншлага хооронд өөрийгөө засаад  явж байна даа. Хэр хэмжээний жүжиглэж байгааг минь найруулагч, үзэгчид шүүнэ шүү дээ.

-Тайз, дэлгэц хоёрын ялгааг өөрийнхөө зүгээс тайлбарлавал?

            -Дэлгэцийн урлаг бол засаж янзалж, өөрийнхөө өнцгийг хүртэл тааруулж болдог өршөөлтэй шүү дээ. Харин тайз урлаг бол өршөөл байхгүй. Жүжигчин хүний чадвар чансааг жинхэнэ утгаар нь сорьдог урлаг шүү дээ. Үзэгчдээс ирж байгаа мэдрэмж нь ч илүү амьд сайхан байдаг.

-Ц.Энхжингийн бага нас хаана, хэрхэн өнгөрсөн бэ?

            -Сургуульд ортлоо Баянхонгор аймагт өвөө, эмээдээ эрхэлж өссөн дөө. Өвөөгийнхөө хажуугаас салдаггүй амины зээ нь байлаа. Эрэгтэй хүүхэд шиг дүрсгүй, дураараа охин байсан гэдэг. Олон эрэгтэй хүүхэдтэй хамт байсан болохоор тэр байх. Одоо гаднаасаа эмэгтэйлэг харагддаг ч эршүүд зантай хэвээрээ байгаа. Харин арван жилдээ орос сургуульд сурч байгаад  “Шинэ Монгол Харүмафүжи сургууль”-ийг төгссөн.  

-Таны хувьд сайхан эмэгтэй хүн гэж ямар хүнийг хэлэх вэ. Та ямархуу зан чанартай эмэгтэй вэ?

            -Хамгийн сайхан эмэгтэй хүн гэвэл миний ээж. Сайхан эмэгтэйд байх гоо үзэсгэлэн, зан чанарыг агуулсан эмэгтэй байдаг. Миний бодлоор биеэ зөв авч явдаг, орчноо мэдэрдэг, хүн чанартай. Үг, үйлдэл зөв, боловсролтой тийм л эмэгтэйг хэлэх байх гэж  боддог доо. Харин би зөрүүд, шударга, тууштай, эрх зантай эмэгтэй.

- Яагаад жүжигчний мэргэжлийг сонгох болов, хүүхэд насны мөрөөдөл байв уу?

            -Хүүхэд байхын нээлттэй, урлагийн бүхий л төрлөөр хичээллэдэг байсан. Гэхдээ эмээ маань хүний их эмч байсан болохоор эрүүл салбарт ажиллана гэж боддог. Урлагийн салбарт ажиллаагүй байсан бол хүүхдэд их хайртай болохоор хүүхдийн эмч болох байсан байх. Тэгээд ахлах ангид ороод загварын дугуйланд явж  эхэлсэн юм. Тэнд драмын хичээл ордог. Тэр цагаас л жүжигчний мэргэжил гэдэг чинь ийм сайхан зүйл байдаг юм байна гэж бодох болсон. Гэр бүлд маань урлагийн салбарын хүн байхгүй болохоор багагүй эсэргүүцэлтэй тулж байсан. Тэгээд гэрийнхэн маань “Чи үнэхээр хүсэж байвал үсээ хусуул” гэсэн. Хатуу чангадаа биш даахиа үргээгүй болохоор тэр л дээ. СУИС-д халзан охин орж байсан даа. Тухайн үед хүссэн зүйлээ л хийж байвал бусад нь хамаагүй гэж л бодож байлаа.

-Ахмад жүжигчдээс хүндэлдэг, чадварлаг нь гэвэл хэнийг нэрлэх вэ?

            -МУГЖ И.Одончимэг эгчийг чадвартай, дотортой, мундаг жүжигчин гэж  хүндэлж явдаг.

 -Жүжигчин хүн бүрд бүтээхийг хүсдэг дүр бий байх, таны хувьд?

            -Ихэнх эмэгтэй жүжигчид түүхэн хатны дүр бүтээхийг хүсдэг гэдэг. Харин миний хувьд тулаантай киноны зэвүүн эмэгтэйн дүр бүтээх юм сан гэж бодож явдаг. Анжелина Жолигийг бүтээсэн дүрүүд шиг гэж хэлж болно. Би өөрөө буудлагын спортоор хичээллэдэг. Үүнийгээ ашиглаж цагдаа эсвэл тагнуулч эмэгтэйн дүр бүтээхийг мөрөөддөг.

-Жүжигчин хүний хувьд хүрэхийг хүсэж буй хэтийн зорилго тань юу вэ?

            -АНУ-д санхүүгийн чиглэлээр магистраа хамгаалаад ирсэн. Ер нь урлагаас хэсэг хугацаанд хол байя л гэж явсан. Гэсэн ч урлаг гэдэг зүйл зүрхэнд уяатай байдаг болохоор орхиж чадахгүй юм байна лээ. Эх орондоо ирэнгүүтээ л ажиллаж эхэлсэн. Цаашдаа урлагийн салбартаа бол тууштай ажиллана. Мөн өөр салбарт өөрийгөө сорьж үзэх бодол бий.

 -Тэгвэл та урлагийн салбарт ажиллахыг зорьж буй дүү нартаа юу гэж зөвлөх вэ?

            -Хүчтэй, тууштай байгаарай. Тэр тусмаа энэ салбар эмэгтэй хүнд харгис байдаг. Тийм учраас биеэ зөв авч яваарай л гэж хэлмээр байна.

            Найруулагч М.Батболд найруулгын хэв маяг, өвөрмөц тайзны шийдлээрээ үзэгчдэд шинэ зүйлийг харуулж, сэтгэлийн таашаал мэдрүүлж байдаг. Тэгвэл энэ хавар “Хориотой” жүжгээрээ чухам юуг илэрхийлэхийг хүлээх л үлдэж байна.