Хайр ямар ч үед хүнийг итгэлээр уяж, сэтгэлээр бөхөлж, харалган болгочихдог сонин зүйл шүү. Тэр дундаа эмэгтэй хүн  хайрлаж, дурлахаараа хэрхэн нүд нь сохорч, эргэн тойрныхноо ч анзаарах сөхөөгүй болдгийг “Событ фильм”-ийн бүтээл “Амьдралын өнгө” кино бидэнд харууллаа. Яаж ч байсан итгэлээ алдахгүй, дэмжинэ, ойлгоно, бүр бүхнээ зориулна гэж шийдэж, түүндээ хүрэхээр тэмүүлж, жаргалтай оршдог хүмүүс бол эмэгтэйчүүд. Гэлээ гэхдээ амьдралаа сүйрүүлтлээ хайрлана гэдэг бол даанч өрөвдмөөр.

      Хоёр хүүхэдтэй өрх толгойлсон эмэгтэй мэдээж эр хүний хайр халамжаар дутаж байсан нь мэдээж. Хүн бүр л энэ хорвоо дээр хайр хүсэж, хайрлуулах гэж амьдардаг хойно. Өөрт нь халуун хоол цай хийгээд, “Ядарч байна уу” гээд  ирж байгаа хүнийг сайн хүн, итгэж болох хүн гэж ямар ч хүн бодно, найдна. “Ашгүй жаргал, зовлонгоо хуваалцах хүнтэй боллоо” гэж баярлаж, одоо л нэг нуруу тэнийх нь гэж битүүхэндээ горьдоно. Гэтэл өнөөх нь сайн хүний дүртэй мөрийтэй тоглоомчин, хулгайч, дарамтлагч байх. Киноны турш үнэндээ жүжигчин Г.Чулуунцэцэгийн бүтээсэн дүрийг л хамгийн их өрөвдсөн. Хайрласан л болохоос яасан юм бэ. Өөр ямар буруу байгаа гэж. Хэрэв бурууг ирвэл “Ингэтлээ хайрлах гэж дээ” л гэж хэлмээр байна. Хайрласан л буруудсан. 

          Ерөөс жүжигчин Г.Чулуунцэцэг хошин урлагийн тайзнаа үзүүлдэг цоглог, эрч хүчтэй, галзуу дүрүүдээсээ огт өөр зөөлөн, хүлцэнгүй, итгэмтгий дүрийг дэлгэцнээ бүтээдэг. Үүнийг бид түүний тоглосон “Өвөл”, “Маш нууц”, “Үлгэрийн баатар гэртээ харих замд”, “Хожлын нүүдэл” тэргүүтэй киноны дүрээр нь андахгүй мэднэ. Тас тас инээж байгаад л гуниглачихдаг хүн шиг түүний тайз, дэлгэцийн дүр нь тийм нэг эрс ялгаатай байдаг нь уран бүтээлчийн чадварыг үзэгчдэд илүү нээж өгдөг шиг. , “Маск” продакшны тоглолтыг түүний тас, тас инээд, хөгжилтэй номергүйгээр төсөөлөшгүй. Түүний тайзнаа үзүүлсэн номероос хамгийн содон нь нэг тийм цоглог, галзуу ээжийн дүр.