“ТЭНГРИ” ХҮРТЭЛХ “THUNDER”

2026-01-21, 822

“Тэнгри” төслийнх ээлжит уран бүтээл “Гэгээн” ёстой сонсогчдын хувьд тэсрэлт байлаа. Зохиол, дүрүүд, үг, дуулалт гээд давтагдашгүй, шинэлэг, өөр өнгө аяс, эрэл хайгуул байж чадлаа. Тиймдээ ч үзэгчдэд хүрээд ердөө тав хоноход хоёр сая гаруй хүн хэдийнэ үзэж, Наваан ламтан, Ренчинмядаг бүсгүй хоёрын тухай ярилцаж байна. Хайр дандаа л аль байгаа газартаа аз жаргал, баяр догдлол авчирдаг хэрнээ заримд нь хориотой, эмгэнэлтэй, амьдралынх нь турш хүлээлттэй байдаг их сонин зүйл.

Сахил хүртсэн лам гээд хайрлаж, дурлахгүй байна гэж үгүй. Хүн л учир сэтгэл алдарч л таараа. Үүнийг богино хэмжээний киноны түвшинд үзүүлсэн клип, үгс нь сэтгэлд аяархан бууж ирсэн сайхан бүтээл “Гэгээ” байв. Олон хүн үзсэн учир одоо энэ клипнийхээ нээлтийг хүртэл хийхээр тов гарчээ. “Тэнгри” үнэхээр монгол хүний сэтгэлийн илэрхийлэл, монгол уран бүтээлчийн дотроос төрөх сайхан төсөл юм. Энэ хүрээнд хийгдсэн “Хээр морь”, “Dayga”, “Jureem” гээд цөм зохиол сайтай, бүтээлчээр бүтээгдсэн хит дуунууд.

“Хангай өөдөө

Харуулдана даа хө

Хатирах хүлэг минь

Хаа ч хүрнэ ээ…” гээд аялахад л мэдэхгүй хүн байхгүй. Эдгээр бүтээлийнхээ тухай тэрбээр “Сүүлийн хоёр, гурван жил монгол дуугаа эргэн сонсоход яагаад ч юм их гоё санагддаг болсон байсан” гэжээ. “Гэгээн” дууны тухайд харин нэрт зохиолч Л.Түдэв гуайн “Оройгүй сүм” романыг уншаад, клипнийхээ санааг олж, бүтээсэн гэдгээ онцолсон.

“Thunder”-ийг бид хэзээнээс л “Бүгд 0-ээс эхэлдэг”, “Авдрын ёроол”, “Нисээрэй”, “Гэрэлт хот”, “Од нь байж болох уу”, “Дандаа даардаг охин”, “Эрэгтэй минь буруу”, “Та намайг мэднэ, ээж ээ”, “Ганцхан шалтгаан” гэхчлэн нэг тийм асуудал дэвшүүлсэн, ярилцсан, ойлголцсон, өөрийгөө нээсэн, хайрласан, аргадсан, хүний эрхийг эрхэмлэсэн сэдэвтэй бүтээлүүдээр нь мэдэх билээ. Сонсоход заримдаа бидэнд тулгардаг асуудлыг бүтээлдээ шингээж, шийдэж, хуваалцсан нь ч байдаг. Анхнаасаа нэг түүгээрээ ондоо, өөрөө ч дотоод хүн зөв нь мэдрэгддэг. Тиймээс “Тэнгри” хүртэл алхан ирж, сэтгэлд хүрч очих, бүр хоногшин эгшиглэх сайхан бүтээлүүдийн эзэн байж чадлаа. Энэ л Б. Өлзий-Учралын том амжилт, ололт байв.

Тэрбээр “Backyard” тэмцээний ялагч болсноор “Тоонот” прокдашнд харьяалагдаж, олонд танигдаж эхэлсэн байдаг. Сонирхолтой нь программ хангамжийн мэргэжилтэй атлаа ийнхүү дуу хөгжим рүү орж, өдгөө хэдийнэ өөрийн амжилтаа тогтоочихоод одоо хоёр дахь тоглолтоо үзүүлэхээр бэлтгэлдээ оржээ. Нээрээ тэр анх “Авдрын ёроол” нэр дор уран бүтээлээ хүргэж байсан. Авдрынхаа ёроолд ч жор дүүрэн байж, түүнээсээ хүмүүст харамгүй хүртээж, өөрийгөө таниулж эхлээд одоо харин “Тэнгри” дээр илүү өсөн томорч, өөрийгөө харуулсаар байна. Айлын ганц хүүхэд болохоор хип хоп хөгжмөөр хань хийж, сонсож өссөнөөс бүх юм эхлэлтэй байна. Тэрбээр энэ тухай “Айлын ганц хүү болоод ч тэр юм уу, би нэлээд зожиг, ганцаараа байхыг илүүд үздэг хүүхэд байсан. Бас нэлээд “шар”-тай бууж өгөх дургүй байлаа. Хорооллын эцсийн хойд хэсэг Улаанбаатарын хамгийн харанхуй газрын нэг байхад би тэнд өссөн. Тэр үед ах нар өргөн өмд өмсөж, томдсон малгайтай цамцтай гудамжаар хип хоп дуу дуулдаг байлаа. Тэрийг нь дуурайж явсаар нэг л мэдэхэд энэ урсгалд автсан байсан даа. Ер нь миний үеийн хүүхдүүд хип хоп хөгжмөөр хүмүүжсэн.

Ганцаараа байх дуртай хүн чинь дуугаар “хань” хийж, хэт их сонсох тал байдаг. Тэр утгаараа миний хүүхэд насны хамгийн сайн найз дуу хөгжим байсан. Би багадаа шүлэг зохиодог байлаа. Тэрийгээ “Авьяасаа ашиглаад, яагаад дуу хийж болохгүй гэж” бодоод, сурагч байхдаа анхны дуугаа хийж байлаа” хэмээн ярьсан байдаг. Түүнд амжилт хүсье. Цэнгэлдэх хүрээлэнд болох тавдугаар сарын тэр нэгэн үдшийн Цэнгэлдэх хүрээлэнд болох тоглолтыг олон ч хүн хүлээж байна даа. “Тэнгри” холын хол давхих болтугай.

“ТЭНГРИ” ХҮРТЭЛХ “THUNDER”

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.