Бүхнийг нэгтгэж, зөөллөж, холбож байдаг зүйл энэ ертөнц дээр юу юм бэ гэх асуулт гарч ирвэл хариулт нь гарцаагүй хайр юм байна. Аль ч нутаг орон, хүн зоны дунд хайр л байж гэмээнэ бүх зүйл утгаа олж, уярлаа хөглөж, зөв сайхныхаа замд ордог аж. Үүнийг “UBS” телевизийн дөрөв дэх туульсын уран бүтээл болох “Дангина” уран сайхны кино бидэнд илүү ойртуулан үзүүлж, тодоор харуулжээ. Киноны амин гол санааг агуулсан түлхүүр нэгэн үг нь “Уудам санаа, ухаант хайр”. Театраас гарч явахдаа энэ үгийг тунгаан бодоход, эрхгүй нээрээ л хорвоогийн энэ уудам зайд хүн зөв санаатай байж, үнэнч сэтгэлээр нэгнээ хайрлан амьдрахад бэрх бүхнийг ая зөнгөөрөө даван туулж, зовлонгийн хучлагыг хуулан, жаргалын нөмрөгийг нөмөрдөг юм байна даа гэж бодогдсон юм.

Монголчууд ч уужуу, ухаантай бай гэж ярьдаг даа. Ерөөс хүний амьдралын гол утга учир уужуу ухаан, халуун сэтгэлд тогтон бүрэлдэж, хэлбэр, хийцээ олдог байх нь.

          “Дангина” киноны зохиолыг сэтгүүлч, зохиолч Б.Золбаяр бичиж, Б.Чингүүн найруулагч найруулжээ. “Содура”, “Говийн домог”, “Нарны садан” зэрэг үзэгчдийн сэтгэлд хоногшсон бүтээлийн гол продюсер, уянгалаг дуунуудын эзэн хөгжмийн зохиолч Л.Балхжав эрхмийн уран бүтээлийн энэ баг хэзээнээс л бидэнд сайхан бүтээлийг үзүүлж буйн ээлжит нь энэ “Дангина” юм. Нутаг гэдэг хэн бүхний сэтгэл зүрхэнд цэлэлзэж, цэнхэртэж, алсаас ивээн, дуудан залж, үргэлж үгүйлэн санагалзахын голд зогсоож байдаг тийм нэг увдистай, мөнхүү эдгээгч аж. Энэ ч үүднээс хэдий үзэгчийн хувьд Буриад нутгийн Басган биш ч өөрийн нутагтай дүйн бодож, Буриад зоны аж байдал, бодол санаа, хайр энэрлийг багахан ч болов ойлгохыг зорилоо. Дүрүүд, тэдний үг хэллэг, түүнийгээ өгүүлж буй байдал нь илүүтэй нүд, чих баясгалаа.

      Циркийн урлагийн тод уран бүтээлчдийн нэг МУГЖ Э.Лхагва-Очир, жүжигчин Ч.Сэлэнгэ нарын хоршил хэчнээн гоё зохицож байв аа. Эрхээдэйн эрэмгий шулуун, мөнхүү хайр татам төрх, энхрий гэгээн Дангинагийн байр байдал эрхгүй үзэгчдийг өөрсдөдөө уусган алдруулж, тэдний хиргүй тунгалаг хайр сэтгэлд саатан байхдаа хайрын мөн чанар, оршлыг илүүтэй мэдэрч, тунгааж байлаа. Нөгөөтэйгүүр гэрэлт хайр, гэгээн сайхны дэргэд хар санаа, хорон сэтгэл өнө мөнхөд биш түрхэн оршиж, удаж төдөхгүй мөдхөн арилан замхардагийг ч харуулжээ.

Эсрэг талын дүр хэр сайн байж гэмээнэ эерэг, гэгээн нь улам тодордог.

       “Дангина” киноны дүрүүдийн байдал эрхгүй хар, цагаан, харанхуй, гэрлийг улам ч ойлгомжтойгоор ялган тодруулж, хүнтөрөлхтний тийм нэг хоёр төрлийг ангилан үзүүлж чадсан уран бүтээлчдэд баяр хүргэе. Тийм ээ, домог, түүх мөнхөд үргэлжилж, хүмүүс тэднийг хүүрнэсээр байх нь энэ орчлонгийн нэгэн эргүүлэг ч тэнд ямагт сайхан хайр, гэгээн учрал оршсоор, бүгдийг зөөллөн, нэгтгэн холбосоор байдгийг “Дангина” кино, Буриадуудын түүхээр харуулж чадлаа. Хорвоогийн уудамд уужуу санаа, ухаант хайр л бүгдийг аварч, цөмийг холбоно.