Шинэ жилийн баярыг Цөмөөхэйгүйгээр, түүний ид шидгүйгээр төсөөлөхийн аргагүй. Энэ ч утгаар арванхоёрдугаар сар гарахад хүн бүхэн Дуурь, бүжгийн эрдмийн театрыг зорьж, “Цөмөөхэй”-д саатдаг билээ. Энэ жилийн тухай тус театрын уран бүтээлчид “Цөмөөхэй” балетыг 12 удаа тоглож байгаа бөгөөд тоглолт 27-н хүртэл үргэлжлэх юм. Ингээд бид Цөмөөхэй болон Цасан хааны дүрд гоцлон бүжиглэж буй ДБЭТ-ын балетын гоцлооч Б.Анандтай ярилцсаныг хүргэж байна. Тэрбээр “Цөмөөхэй”-н хувьд олон дүртэйгээрээ, мөн жил бүр хүүхдүүд нь шинээр солигддогоороо онцлог” гэснээр бидний яриа эхэлсэн юм.

       Сонгодог урлагийн уран бүтээлч болон үзэгчдэд өгдөг чухал зүйл бол мэдрэмж. Энэ ч утгаар дүр бүхэн өөр мэдрэмж, дүрийг анх удаа бүтээх гэж байгаа, дахин тайзнаа дүрээ амилуулж байгаа бүжигчинд ч ондоо нэгэн мэдрэмж ургана. Энэ талаар балетчин Б.Ананд “ Мэдээж цоо шинээр энэ дүрд гарах гэж буй хүний хувьд нэг өөр мэдрэмж байх. Миний хувьд Цөмөөхэйн дүрд хоёр дахиа тоглож байгаа учир харьцангуй ондоо. Гэхдээ тоглолт бүр өөр мэдрэмжээр явдаг болохоор аль болох алдаа гаргахгүйг хичээдэг. Мөн нэг онцлог нь 12 удаа тоглох энэ балетад би зөвхөн Цөмөөхэйгийн дүрд тоглохгүй. Цасан хаан, олон үндэстний хөгжимтэй хэсэгт гарах гэхчлэн өөр өөр дүрд орж байгаа нь сонирхолтой” гэсэн юм. Хүүхэд насны мартагдашгүй нэгэн дүр Цөмөөхэй хэмээх модон тоглоомыг балетын уран гоё хөдөлгөөнөөр тайзнаа амилуулж, хүүхдүүдийн мөрөөдөд, зүүд, дурсамжинд түүгээрээ дархлагдан үлдэнэ гэхээр яах аргагүй уран бүтээлчээс илүүтэй авьяас чадвар, бэлтгэл шаардана.

   Бодоод үзье л дээ. Энэ жил анх удаа “Цөмөөхэй” балет үзэж байгаа хүүхдийн сэтгэлд түүний дүр мартагдашгүйгээр хоногшиж, дараа жилийн шинэ жилийн баярыг хүлээн догдолсон хүүхэд, түүний бүтээснээр “Цөмөөхэй”-г зүрх сэтгэлдээ хадгална. Ингээд бодохоор сайхан мөртлөө яах аргагүй л өөрийнх нь хэлснээр алдаа гаргахгүй тоглох нь чухал аж.

         Б.Анандын хувьд  Хөгжим бүжгийн коллеж төгсөөд, 2022 оноос Дуурь, бүжгийн эрдмийн театрт ажиллаж эхэлсэн залуу уран бүтээлч. Театрт ороод мэдээж шууд балетын гоцлооч болохгүй. Ах, эгч нараасаа суралцаж, тэднийг дэргэдээс нь үзэж, өөрөө ч өөрийгөө уйгагүй бэлтгэж байж сая нэг бүтээлд дүр авч, түүндээ ажиллана. Анхны бүхэн догдлол дүүрэн. Гэхдээ дахин бүтээхэд сэтгэлд хэдийнэ дотно. Түүний анхны гоцлон бүжих бүтээл нь Цөмөөхэй. Гол дүрээс гадна Цасан хаан, балетын тавилтын нэгэн шийдэл олон үндэстний хэсэгт ч гарчихна. араа нь алдарт “Хунт нуур”-ын эсрэг дүрд бүжиглэж, эхнээсээ ингээд л мөрөөдлөө биелүүлж, дэлхийн болон Монголынхоо сонгодог бүтээлүүдийн гол болон туслах дүрд гарах замдаа ийнхүү амжилттай яваа нь энэ. Нэгэнтээ бага наснаасаа балет үзэж, урлагийн энэ хамгийн үзэсгэлэнтэй төрөлд дурлаж, өөрийгөө сорьж шалгуулснаар өдгөө ийнхүү тайзнаа бүжиглэж байна. Тэрбээр хэвлэлд анх балетаар хичээллэх болсон талаараа “Өвөө минь намайг жаахан байхад анх удаа театр дагуулж яваад балет үзүүлж байлаа. Тэгж л дурласан. Балетчин болох тухайгаа өвөө, ээждээ хэлэхэд дуртай хүлээн авсан” гэж ярьсан байдаг. Түүний энэ сонголтод тусалж, гараас нь хөтөлсөн багш нь балетын багш Х.Гэрэлчимэг,  Гавьяат багш Х.Мөнгөнхөлөг нар байна.

      Үргэлжлүүлэн түүнээс балетын урлагт үлгэр дуурайлал авч, “Энэ уран бүтээлч шиг болох юм сан” гэх хүн хэн байв” гэж асуухад, “Айхтар “Энэ уран бүтээлч шиг болох юм сан” гэж боддоггүй байсан. Харин “Энэ хүн энэ хөдөлгөөнөө ингэж гоё хийж байна. Би ингэж хийвэл болох юм байна” гэж харж, суралцаж үздэг байсан. Тэр бүхэн минь намайг мэргэжилдээ улам хөгжихөд нөлөөлсөн” гэж байв. Мөн цаашлаад “Балетчид төрдөг гэдэг. Гэр бүлийнхэн дунд нь бүжиглэдэг хүмүүс бий юү. Мөн таны онцлогийг багш нар болон уран бүтээлчид юу гэж тодорхойлдог бол. Гар, хөлийн онцлог шинж гэхчлэн тодотгодог шүү дээ” гэх асуултыг тавихад “Гэр бүлд маань балетчин хүн байхгүй. Одоогоор би л урлагийн энэ төрлөөр ажиллаж байна. Балетаар багаасаа хичээллэсэн хүнд онцлог, шинж гэхээс илүү мэдрэмж чухал санагддаг. Мэдрэмж сайн байж дүрээ илүү бодитоор амилуулна. Түүнээс мэдрэмж муу мөртлөө гоё гар, хөлтэй байх юм бол дүрээ гаргаж чадахгүй. Тиймээс мэдрэмжээрээ, дотроосоо дүрээ бүтээхийг багш нар маань зааж сургасан. Энэ тал дээр ч уран бүтээлчид бид их анхаарч ажилладаг” гэж гол онцлогоо дурдан өгүүлсэн юм.

        Дуурь бүжгийн эрдмийн театрын балетын гоцлооч Б.Ананд, Б.Марал нар өнгөрсөн зун бидэнд нэгэн том амжилтыг дуулгасан нь Хятадын олон улсын тэмцээнээс хүрэл медаль авчирсан явдал. Мөн Япон Улсад урилгаар очиж тоглолтод оролцсон. Энэ тухайгаа ч мөн онцлон ярьсан. Энэ ч үүднээс бид залуу уран бүтээлчийн хувьд цаашдын зорьж буй зүйлээс нь асуухад, Дуурь, бүжгийн эрдмийн театрынхаа хуваарьт тоглолтуудад оролцохоос гадна залуу уран бүтээлчийн хувьд боломж гарвал гадны улс оронд очиж илүү суралцах хүсэлтэй явдагаа ч илэрхийлж байлаа.