ХАЙР ГЭГЧ АМЛАСАН АМЛАЛТДАА ЭЦСЭЭ ХҮРТЭЛ ХҮРЧ ДУУСАХЫН НЭР АЖЭЭ…

2025-12-03, 703

Эмэгтэй хүн гэдэг их эмзэг, турьхан атлаа дотроо асар их хүч чадлыг агуулж байдаг их сонин улс. Итгэл, сэтгэл, бодол, хайр гээд тэдний бүх юм бат бэх, утга учиртай. Хорлоо ач охин Номин шигээ арван долоохон настай жаахан охин явахдаа магад түүн шиг дуулгавартай, хэрсүү охин явсан байх. Дараа нь харин гурван хүүхдийн ээж болсон насан дээрээ хэчнээн сайхан гунхалзан байлаа. Даанч орь залуу насандаа хайртай хүнээсээ хагацаж, хорвоогийн өдөр хоногуудыг амлалтандаа хүрэх өртөө болгож амьдарсан. Хүнд амлалт өгөөд түүндээ эцсээ хүртэл хүрч дуусна гэдэг амаргүй мөртлөө биелүүлэх нэгэнд бардам, бахархал дүүрэн мэдрэмж.

Ингээд харахаар хайр бүхний ялагч, мөнхүү хэнийг ч бүгдийг даван туулуулагч юм аа. Бүгдийг өр зүрхнээсээ өөрийн мэт хайрлаад явахад л угаас зөөлөрч, аз жаргал, гэрэл гэгээ, өнгө нь тодроод ирдэг амьдрал аж. Тэгэхээр хэнийг ч хайрлах л зүйтэй.

Хувь тавилан их сонин учралыг бидэнд илгээдэг. Санамсаргүй атлаа санаан туршид, насан уртад салахааргүй тийм учрал. Хэн бүхэнд тодорхой байдаг нэг зүйл бол өөрийн гэснээ л хүн хайрлана. Өрөөлийг барагтаа хайрлахгүй дээ гэх санааг ч өөр хооронд нь сольж, гайхашруулж мэднэ. Хувь тавилан ийм л тааварлашгүй. Яруу найрагч Х.Тэргэлийн “Хадам ээж” өгүүллэгээс сэдэвлэн, найруулагч Л.Таванбаяр зохиолыг нь бичиж, найруулсан “Хадам ээж” киног үзсэн минь энэ ээ.

Сэтгэл татсан зураглал, дүрсээр нүдээ баясган суухуйд энгийн тоглолттой уран бүтээлчдийн ухаарал дүүрэн харилцаа, зөрчил, уужуу хүлээцтэй зан чанар гээд аргал түүдэг шиг энэ бүтээлээс өөрөө л цуцахгүй бол мөн ч олон санаа түүхээр байна аа. Талд аргал түүж яваа хүн бодол болж явдаг шиг л эрхгүй бодол боллоо. Үр удмаа үлдээн хүмүүний урсгал үргэлжилж, цаг цагийн эргэлтэд цөм үүргээ гүйцэтгэн амьдарч, ээлжээ хүлээлгэн өгч хорвоо ертөнц зогсолтгүй эргэсээр.

Эмэгтэй хүн бүр охин, бүсгүй, ээж, хадам ээж болж, ижил хувь тавилангаар биш ч хаших алба нь ийнхүү адил байсаар хорвоог элээнэ. Харин сайн, муу, ямархан байх нь цэвэр өөрсдөөс нь хамаарах асуудал шиг. Гэхдээ ээжийн алдар бол энэ ертөнцийн хамгийн сайхан, сонсоход л нөмөр түшиг, хайр энэрэл дүүрэн хүндтэй. Аав, ээж байна гэдэг өндөр хувь тавилан заяа биз ээ. Тэгэхээр энд ирсэн хэн бүхэн ийм өндөр хувь заяаны эзэд болж, үр хүүхдээ өсгөн бойжуулчихаад морддог ийм л орон зай юм байна. Үүнийг хүмүүний амьдрал, хүн болж төрсний утга учир гэдгийг эл бүтээлээс уншигч та гарцаагүй тунгаасан болов уу.

ХАЙР ГЭГЧ АМЛАСАН АМЛАЛТДАА ЭЦСЭЭ ХҮРТЭЛ ХҮРЧ ДУУСАХЫН НЭР АЖЭЭ…

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.