ТАЙЗНАА ХӨДӨЛГӨӨН УРЛАГЧ

2025-11-26, 468

Түүнийг тун саяхан нээлтээ хийгээд, үзэгчдэд хүрсэн “Гайжин” жүжгийн хөдөлгөөний найруулагчаар ажиллаж байхад нь бэлтгэлээс нь нэг ажсан юм. Урьд үнэндээ Улсын драмын эрдмийн театрын бүжиг, хөдөлгөөний найруулагч гэдгээр нь л мэдэхээс бусдаар хийдэг зүйлийнх нь тухай төдийлөн сайн ойлголтгүй байлаа.

“Гайжин” жүжгийн нэгэн уран бүтээлчээс ярилцлага авахаар сууж байтал үзэгчдийн танхимаас нэг хүн “За ихэмсэг алха, ихэмсэг алхаад өг. Баавартайхан гарч ирнэ шүү”гээд л ширүүхэн дуугарах нь эрхгүй анхаарал татна. Тэгснээ хаа нэг бүр ч ширүүсэж, тайзнаа гарч ирсэн уран бүтээдчдийг ёстой ч нэг цэргийн дарга шиг л командалдаг юм билээ дээ. Үнэхээр ч бас тэгж байж л хөдөлгөөнийг нь жигдэлж, уран бүтээлээ аятайхан болгодог биз ээ. Тэр дундаа мюзикл жүжиг гэдэг дуу, бүжигтэй хөдөлгөөн ихтэй байдаг. Тэгэхээр тэр бүхнийг эв зүйтэй, эвсэлтэй, утга уянга, эв донжтой болгохын тулд л түүний ажил оршдог шиг.

Тийм ээ, бид өчигдөрхөн Урлагийн гавьяат жүжигчин цолоор энгэрээ мялаагаад буй жүжигчин Г.Ган-Очир уран бүтээлчийн тухай ярьж байна. “Зүрхэнд гэрэлтэх од”, “Мама Миа”, “Мартагдашгүй намар”, “Нүдээ аниад төсөөл” зэрэг дэлгэцийн бүтээл, драмын театрын олон сайхан жүжигт хөдөлгөөний найруулагчаар ажилласан байдаг. Түүний хувьд УДЭТ-ын 1996 онд жүжигчнээр ажиллаад, 2019 оноос өдгөө хүртэл хөдөлгөөний найруулагчаар ажиллаж буй аж.

Энэ хугацаанд Т.Габбегийн "Үнсгэлжин", Д.Урианхайн "Харанхуйд харагдахуй буюу 2-1=0", С.Жаргалсайханы "Би эрчүүдийг хүснэ", Ч.Ойдовын"Далан худалч", П.Меримегийн "Кармен хүүхэн", У.Шекспирийн "Ричард ван III", О.Нилийн "Тамын дурлал", У.Шекспирийн "Ромео Жульетта", "Зуун шөнийн зүүд", Ш.Гүрбазарын "Надаар тоглосон хайр" жүжгүүдэд жүжигчнээр ажиллажээ. Харин Р.Куни "Эцсийн зогсоол зөвхөн чи", Х.Пинтер "Yesterday", Н.Коляда "Манекен", Дарио Фо "Чөлөөт хос", У.Шекспирийн “Ромео Жульетта”, Б.Лхагвасүрэнгийн “Үгүйлэгдсэн хайр”, Б.Хишигзаяа, Я.Баяраа нарын “Царцаа намжил”, Л.Толстойн “Адууны түүх”, Э.Оюун, С.Нинжбадгар нарын “Би эндээс явахгүй”, С.Өлзийтөгс “Бүсгүйн зурвас”, Б.Брехтийн “Сычуаны сайн хүн”, Н.В.Гоголийн “Тоглоомчид”, Б.Цогнэмэхийн“Тэнгэрийн хүү” гэхчлэн жүжгүүдэд бүжиг дэглээчээр ажилласан байна. Мөн 2016-2019, 2022, 2025 оны Үндэсний их баяр наадмын нээлт, хаалтын үйл ажиллагааны ерөнхий бүжиг дэглээчээр ажилласан билээ. Энэ бүхнээс бүр урьд түүнийг “Boom town” хамтлагийн ахлагч гэдгээр нь бид анх мэдсэн билээ.

Үүгээр ч зогсохгүй тэрбээр “Про” театрын “Шадар гурван цэрэг” зэрэг бусад театр, уран бүтээлчдийн бүтээлд ч хөдөлгөөний найруулагчаар ажилласаар байгаа. Ер аль нэг театрыг зориход нэр нь дуулдаж байдаг энэ эрхмийн уран бүтээлчдээр дамжуулан тайзнаа урлах хөдөлгөөн бүрийг, тухайн уран бүтээлийн амь амьсгаа, эрч хүч, энерги болсон тэр дуу, бүжгийг нь үзэхэд хэчнээн дотно, мөнхүү сэргэмээр байдаг билээ дээ. Хөдөлгөөн нь эв хавгүй, янз байдалгүй бол жүжиг, кино аль нь ч урагшлахад бэрх. Түүний уран бүтээл дотроос өмнө жил Улсын драмын эрдмийн театрын тайзнаа тавигдсан “The Lover” жүжгийг онцолмоор байна. Тэрбээр “Хайр хэнд хэрэгтэй вэ” гэх асуултын дор орчин үеийн залуусын сонирхлыг татсан, хөгжим, хөдөлгөөнөөр эл жүжгийг тавьсан бөгөөд үнэхээр ч хайрыг мэдрүүлсэн, түүний үнэ цэн, хүртээмжийг ойлгуулсан уран бүтээлийн нэг болж чадсан. Мөнхүү хайр хэнд хэрэгтэйг хүмүүсээс асууж чадсан тийм бүтээл. Хөдөлгөөнөөр сүлжигдэн бий болж, цул бүжиг, хөдөлгөөнөөр амилдаг бүтээл гэж бий. Манайд одоогоор бол яг тийм бүтээлийг Г.Ган-Очир найруулагч л найруулж байна даа. Жүжигчдийг шахаж, тэднийг давтуулан, дадуулдаг, хариуцлага оноодог бэлтгэл бүрийнх нь ард алга ташилт дүүрэн амжилт бий. Түүнд амжилт хүсэж, дахиад ч олон бүтээлийг бидэнд хүргэнэ гэдэгт итгэж байна.

ТАЙЗНАА ХӨДӨЛГӨӨН УРЛАГЧ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.