СЭТГЭЛД ДОТНО ДУУ ХООЛОЙН ЭЗЭН МУГЖ Ө.НАРАНБААТАР

2025-10-30, 81

Монголын 50 гаруй дэлгэцийн бүтээлд гол болон туслах дүр бүтээж, 30 мянган кинонд дуу оруулсан гэдгээ ам бардам хэлж, бахархал дүүрэн зогсоно, тэр. Үнэхээр ч сэтгэлд дотнохон хоолойгоор "Монголын үндэсний дуу бичгийн студид хөрвүүлэв..." гээд уншихад нь хэн бүхний дурсамж сэргэдэг билээ.

1990 он.

Улсын багшийн дээд сургуулийн Кино драмын анги болон бусад хөгжим, дуулаачийн ангийнхан Соёлын ордны байр руу шилжиж СУИС-г бие даан үйл ажиллагаа явуулах болсон тэр жил. Кино драмын ангид тэнцэн, элссэн Ө.Наранбаатар хүү ангийнхантайгаа хамт сургуулиа нүүлгэж байжээ. Эндээс л түүний өнөөдрийн амжилт эхэлсэн байна.

Оюутан хүүг тэгэхэд ирээдүйн нэртэй дуу оруулагч, жүжигчин болно чинээ хэн ч санаагүй биз ээ.

Гэтэл цаг хугацаа хэдийнэ 30 гаруй жилээр улиран өнгөрч өнөөдөр тэр МУГЖ хэмээх эрхэм алдрыг хүртээд зогсож байна. Тэрбээр энэ тухай "Телевизийн олон ангит , баримтат кино, уран сайхны бүрэн хэмжээний кино гээд 34 жилийн хугацаанд 30 мянган кинонд дуу оруулжээ. Би өөрөө монголын уран сайхны 50-аад кинонд гол ба туслах дүр бүтээсэн. Миний анхны дуу оруулсан кино оюутан байхдаа МҮОНРТ-д дадлагад гарахдаа Германы телевизийн олон ангит "Банштай зутан" гэж кино байсан. Сургуульд байхдаа урлагийн үзлэг хөтөлдөг, сургуулийн алиалагч болдог урлагийн авъяастай хүүхэд байсан" гэнэ. Урлагийн хүн болох сонголтыг нь ээж нь илүүтэй дэмждэг байсан ч кино драмын ангид тэнцээд очиход нь бурхан болчихсон байсан гэдэг.

Энэ талаараа "Ээж маань дөрөв, тавдугаар ангиас эхлээд гадаад, дотоодын олон ном өгч уншуулсан. Гэрийн номын сан дээр “Номтой нөхөрлө” гээд оёдлоор бичээд тавьчихдаг байлаа. “Миний хүү урлагийн хүн болно доо, урлагийн хүн болох ёстой” гэдэг байсан юм. Харамсалтай нь жүжигчний ангид тэнцээд очиход сонсож чадалгүй бурхан болчихсон. Харамсаж явдаг" гэж хэвлэлд ярьсан байна лээ. Мэдээж ээж нь тэнгэрээс хүүгээ хараад баярлаж, бахддаг нь гарцаагүй биз ээ.

Монголын кино урлагт ийм их гавьяатай, бүтээлтэй хүүгээрээ бахархахгүй байхын ч аргагүй юм.

Дадлага. Телевизэд хуваарилагдан очлоо. Дуу хоолойг нь радио, дэлгэцээс бахдан сонсдог өнөөх алдарт нэвтрүүлэгчид чинь ёстой дүрээрээ ажиллацгааж байх нь тэр. Тэднийг биширч суухын сацуу дадлагын эхний даалгавраа авлаа. Тэр бол өдгөө дуу оруулсан 30 мянган киноны хамгийн анхных нь болох Германы телевизийн олон ангит кино “Банштай зутан”.

Дүр аваад, дуу оруулж үзлээ... телевиз гэж ийм газар, дуу оруулагч, нэвтрүүлэгчид ингэж ажилладаг байх нь ээ гэх анхны мэдрэмж, сэтгэгдэл буулаа.

Ингээд дадлага дуусахад телевизийнхэн түүнийг багтаа авчээ. Тун товчоор телевизэд орсон түүх нь энэ аж. Дунд нь хоёр жил Хүүхэлдэйн театрт ч ажиллаад амжсан байдаг. Гэсэн ч сэтгэл татагдаж, үйл бүтээлээ зориулах телевиздээ эргэн орж энэ цаг үе хүртэл үнэнчээр зүтгэсэн нь түүний явсан зам мөр.

Бидний сэтгэлд хоногшиж, зүрхэнд мөнхөрсөн олон сайхан кино, нэвтрүүлэг түүний дуу хоолойгоор бидэнд хүрч, одоо ч сонсогдож байна. Өчигдөр Гавьяат цол хүртээд, "Халтар царайт" киноны төгсгөлийн хэсгээс уншсан байна лээ. Кино дуусахад срнсогддог тэр дуу хоолой хэчнээн их дурсамж сэдрээдэг гэж санана. Бид яагаад ч юм кино дуусчихлаа гээд босдоггүй, төгсгөлийн тэр хэсгийг сонсож, бүр заримдаа дагаж хэлж байж өндийдөг байж билээ.

“Утгын чимэг” наадмын тайзнаа мөн олон сайхан өгүүллэг уншсан. Үлгэр, кино, нэвтрүүлэг, зохиол, бүтээл гээд цөмийг нь сэтгэлд хоногштол өгүүлдэг дотно дуу хоолой. Одоо ч сонсогдох шиг…

СЭТГЭЛД ДОТНО ДУУ ХООЛОЙН ЭЗЭН МУГЖ Ө.НАРАНБААТАР

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0

Шинэ мэдээ

Нийтлэлчид